Kommuneqarfik Sermersuup angalanissamut aningaasaateqarfia katillugit 715.000 koruuninik agguaaqqammerpoq
Iluattitsisut ilagaat Conny Rasmussen Nuumminngaanneersoq.
– Nuannaaqaanga. Anaanaq kisimiittuuvunga ukiunilu kingullerni meeqqakkalu angalanissamut periarfissaqarsimanngilagut. Maani Nuummiiginnartarpugut, sissaliartarpugut immaqaluunniit atuagaateqarfimmukartarluta. Aasamulli Danmarkimukarsinnaanngorpugut ilaquttat ikinngutillu tikeraarlugit. Naatsorsuutigivara sap. ak marluk Københavnimiissasugut Lolland Falster-milu. Meeqqat neriorsoreerpakka Tivoliliassasugut Blå Planet-mullu. Angalaartussanngorpugut, nuannissaqaarlu Conny Rasmussen oqarpoq, taanna tallimanik ukiulimmik paneqarpoq sisamanillu ukiulimmik erneqarluni.
Kommuneqarfik Sermersuumi innuttaasut tamarmik qinnuteqarnissaminnut periarfissaqarput. Taamaattorli ilaqutariit meerartallit isertitakinnerusullu pingaartinneqartarput. Angalanissamut aningaasaateqarfiup siunertaraa innuttaasut nunatsinni avataanullu angalasarnissaat.
Aningaasaateqarfimmi siulittaasoq Rasmine Geisler: – Nuanneqaaq ilaqutariippassuit nuannersumik misigisaqartissinnaagatsigit. Ilaqutariippassuit imaaliallaannaq angalasinnaaneq ajorput, taamaattumillu aningaasaateqarfimmiit akiliunneqarnerminni ilaquttaminnut tikeraarsinnaalissapput. Nunatsinni Danmarkimiluunniit nuannersorpassuarnik misigisaqarlutik kulturikkut pikialaartitsineq peqataaffigisinnaalissavaat.
Aamma ukioq manna qinnuteqartut amerlapput. Qinnuteqartut 134-t akornanni 54-t aningaasaliiffigineqarput.