Innuttaasunut

Sermersooq: Atuartut iluarisimaarinninnerat misissorneqarli

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nunani avannarlerni meeqqat atuarfiini atuartut iluarisimaarinninnerat ukiut tamaasa misissorneqartarpoq. Sooq aamma tamanna Kalaallit Nunaanni pissanngila, Kommuneqarfik Sermersuumi Meeqqanut Atuarfeqarnermullu Ataatsimiititap siulittaasua taamatut aperivoq.

Norgemi, Sverigemi aamma Danmarkimi atuarfippassuarni atuartut ukiut tamaasa atuarnertik pillugu apeqqutit sukumiisut akissuteqarfiginissaannut qinnuigineqartarput: Atuarnerit nuannaraajuk? Klassinni qinngasaarisoqartarpa?
Apeqqutit akiortorneritigut atuarfinni sorlerni atuartut iluarisimaarinninnersut qulaajaasoqartarpoq, aammali klassit sorliit ingerlallualernissamut pisariaqartitsinersut tikkuussissutaasarluni.
”Meeqqatta atuarnerannik pitsanngorsaataasinnaasunik paasissutissanik nunatut pisariaqartitsivugut. Taamaattumik Ilinniartitaanermut Aqutsisoqarfik piaarnerpaamik kaammattorusuppara nuna tamakkerlugu atuartut iluarisimaarinninnerannik misissueqqullugu,” taama oqarpoq Kommuneqarfik Sermersuumi Meeqqanut Atuarfeqarnermullu Ataatsimiititap siulittaasua, Nivi Olsen.
Kommuneqarfik Sermersuuginnarmi misissuinissaq aallartisarneqassasoq ataatsimiititamit siusinnerusukkut eqqartorneqarpoq, tamakkiisumilli pitsaaqutai anguneqarunnanngitsut naggataatigut oqaatigineqarluni. Ataatsimut iliuuseqarnikkut tamanna taamaallaat anguneqarsinnaavoq.
”Nunatsinni atuarfinni atuartut iluarisimaarinninnerpaasut misissuititsinikkut paasissagutsigit, taakku periusaat kommuninut tamanut siammartertariaqarparput, ataatsimummi periuseqarnissarput ujartortariaqarnera pingaaruteqarpoq. Taamaattumik kaammattuinerput Ilinniartitaanermut Aqutsisoqarfimmit malinneqassasoq atuartullu iluarisimaarinninnerat piaarnerpaamik misissorneqassasoq neriuutigaarput”, taama oqarpoq Nivi Olsen.