Kommuneqarfik Sermersuumi sulianik uninngasunik misissuineq kinguneqarluarpoq.
Kommuneqarfik Sermersuumi Meeqqanut Ilaqutariinnut Immikkoortortami ineriartortitsinissamut pilersaarutip ilaatut meeqqat pillugit suliat ingerlasut tamarmik qaammatini kingullerni misissorneqarput, tamannalu tigussaasunik kinguneqareerpoq.
Meeqqat pillugit suliat 800-t sinneqartut naammassineqarput, taamalu Kommuneqarfik Sermersuumi meeqqat pillugit suliat ingerlasut 2000-imiit 1200-nut ikilisinneqarput.
Suliat imaaliallaannaq aaqqiivigineqarsinnaasut imaluunniit allaffissornikkut kukkuluttornikkut ingerlasutut allassimasut tamatumani pineqarput.
Suliat ikilinerisa kingunerisaanik suliassaviit amerlassusii naak annikillisimanngikkaluartut sulianik matusineq annertuumik siuariarnertut oqaatigisariaqartoq Meeqqanut Ilaqutariinnullu Pisortaq Martha Lund Olsen isumaqarpoq.
”Suliassat maanna pingaarnerutitassagut tamakkiisumik takusinnaaleratsigit aqutsisunut sulisunullu pingaaruteqaqaaq. Ulluinnarni nukissaqarnerulerlutalu eqqissisimanerulissutigissavarput”, oqarpoq Martha Lund Olsen.
Isumaginninnermut siunnersortit peqatigiiffiata NIISIP-p siornatigut oqaatigisarsimavaa, Nunatsinni, Danmarkimisut, isumaginninnermut siunnersortit sulianik ingerlasunik amerlanerpaamik 35-nik tigummiaqartassasut. Tamanna aaqqissuussereernerup kingorna Kommuneqarfik Sermersuumit naammassineqarsinnaanngorpoq.
”Nammineq isumaginninnermut siunnersortitut nalunngilara, suliat amerlavallaalinnginnissaat qanoq isumaqartigisarnersoq. Taamaattumik NIISIP-p kissaataa maanna malissinnaanngoratsigu assut nuannaarutigaara”, oqarpoq Martha Lund Olsen.
Kommuneqarfik Sermersuumi Meeqqanut Ilaqutariinnillu Immikkoortortami Ineriartortitsinissamut pilersaarut naapertorlugu ukiup aappaa affaa tulliuttoq meeqqat ilaqutariillu isumaginninnikkut ajornartorsiutillit sullinneqarnerat pitsanngorsaavigineqassaaq.