Nuummi pillorissaasut aamma timimik sungiusaasut suleqatigiit fitnessimik taallugu eqaarsaartitsisalertussangorput. Eqaarsaartitsineq eqarsisunut aamma timimik sungiusaasumit eqaarsarnermut ilitsersuunneqarnikkut ikiorneqarusuttunut neqeroorutaavoq. Imaassinnaavoq qeqqarippiarunnaarlutit orloqqajaasalersimasutit imaluunniit tummeqqakkoorneq ilungersunarilersimagit.
Eqaarsaartitsineq innuttaasut namminerminnut naleqqussakkamik sungiusarnermut najoqqutassiaq malillugu nammineq eqaarsaarsinnaasunut neqeroorutaavoq. Timimik sungiusaasoq ilinnut naleqqussakkamik ilitsersuutitalimmik sungiusarnermut najoqqutassiorumaarpoq.
Eqaarsaartitsineq siulleq eqaarsaartarfimmi Ippiarsummiittumi marlunngornermi apriilip 17-iani ingerlanneqassaaq, eqaarsaatitsinermilu timimik sungiusaasut marluk taamatuttaaq oqalutsi ataaseq nal. 15.00-imiit nal. 16.00-ip tungaanut najuutissapput.
Eqaarsaarnermut atortunik atuineq eqaarsaariaatsillu pillugit marlunngornikkut nal. 15.00-imiit nal. 16.00-ip tungaanut taamatuttaaq tallimanngornikkut nal. 8.30-miit nal. 9.30-p tungaanut ilitsersuisassaagut. Timimik sungiusaasoq ataaseq piffissani taakkunani najuuttarumaarpoq.
Taamatuttaaq pillorissaasut aammalu timimik sungiusaasut suleqatigiit eqaarsaartitsinermik inunnullu ataasiakkaanut naleqqussakkanik eqaarsaarnermut najoqqutassiornermik Paamiuni, Tasiilami Ittoqqortoormiinilu innuttaasunut neqerooruteqarumaarput. Taakkulu sulinerminnut atatillugu tikittarumaarput. Paasisaqarnerorusukkuit najugarisanni kommunimut saafffiginnissinnaavutit.
Paamiuni marloriarluni tassa sapaatip-akunnera 40-mi 41-milu eqaarsaartitsisoqarumaarpoq.
Tasiilami sisamariarluni tassa sapaatip-akunnera 23-mi 24-milu aamma sapaatip-akunnera 45-mi 46-milu eqaarsaartitsisoqarumaarpoq.
Ittoqqortoormiini marloriarluni tassa sapaatip-akunnera 33-mi 34-milu eqaarsaartitsisoqarumaarpoq.
Inuulluaqqusilluta
Pillorissaasut aammalu timimik sungiusaasut suleqatigiit