Innuttaasunut

Solution Camp: ”Sulisussarsiornermi oqaloqatiginneriaaseq pitsaanerpaaq”

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersuup Ilisimatusarfik suleqatigalugu inuusuttut suliffeqanngitsut ilinniagaqarsimanngitsulluunniit iliuuseqarfiginiarpai.

Pingasunngornermi Nuummi Hotel Hans Egede-mi ataatsimiittarfik Ilisimatusarfimmi atuartunik aamma Kommuneqarfik Sermersuumi sulisunik ulikkaarluinnarsimavoq. Ulloq atorlugu Solution Camp sammineqarpoq.

Peqataasut ataasiakkaatut, marlukkaatut suleqatigiikkaatulluunniit aalajangersimasumik qulequtaqarluni siunnersuusiornermut ulloq atorpaat, nutaaliorluni isumassarsiat aaqqiissutissallu pikialaartinneqarput. Nunatsinni inuusuttut amerlaqisut ilinnialersimannginnerat suliffissaaleqinerallu qaangerniarlugu qanoq iliortoqarsinnaanerannut isumassarsiornissaq suliassaraat.

Jesper Thinnesen ullormut aqutsisuuvoq. AAU-mi (Aalborg Universitet) Innovationimi nutaaliornermut tunngasunik siunnersortaavoq.

Jesper, Solution Camp sumik siunertaqarpa?

”Siunertaa tassaavoq, suliffeqarfik – uani tassaalluni kommune – ilinniartunut suliakkiisuussaaq. Tamatumalu kingunerisaanik suliakkiissutigineqartumut suliarinnissinnaasut eqqortut Ilisimatusarfiup nassaariniartussaavai. Ullumikkut suliarput tassaavoq 16-it 25-llu akornanni ukiullit amerlaqisut sapanginneqartuusisartut – aamma ilinniagaqaratillu suliffeqanngitsut. Kommunimi suliassaqarfimmut tunngasumik suliallit tamanna annertuumik ilisimasaqarfigaat, tamannalu ilinniartut atorluarsinnaavaat soorlu aamma ilinniartut ilisimasanut nutaanut tunngasunik kommunimut tunniussaqarsinnaasut. Taakku marluullutik ataatsimoortinneqaraangamik pissanganartumik pisoqartuaannarpoq.”

”Aamma kommunip ilisimatusarfiullu akornanni naleqqussarsinnaassuseqarnissaq pineqarpoq.  Tamannalu suleqatigiissinnaassuseqalernermik kinguneqarniartussaavoq. Ullormut isummat saqqummertut apeqqutaatillugit kommune ilinniartunik suleqatiserinnissinnaavoq. Solution Camp tassaavoq sulisussarsiornermi oqaloqatiginneriaaseq pitsaanerpaaq.”

Ilinniartunut nutaatut isumassarsiorfiusinnaasoq
Kommuneqarfik Sermersuup ullormut isummat saqqummiunneqartut katersussavai. Ullormut isumassarsiat tamarmik allanneqassapput. Kommunip tamatuma kingorna taakkunannga sorliit sulinikkut ingerlateqqinneqassanersut paasiniarlugu immikkoortitissavai.

Emil Skjervedal Kommuneqarfik Sermersuumi Ineriartortitsinermut Piujuartitsinermullu Allatseqarfimmi aqutsisuuvoq.

Emil, ullormut Solution Campimik sammisaqarneq Kommuneqarfik Sermersuumut qanoq pissarsiaqarfiua?

”Ilinniartut isumassarsiorfigilluarsinnaasatsinnik ilisimasanik nutaanik saqqummiipput. Nutaanik pissarsiaqarpugut aamma ilinniartunik oqaloqateqarluarluta. Ilisarisimanerulernissaannut periusiuvoq pitsaasoq. Tamanna Ilisimatusarfiup annertunerusumik suleqatiginerulernissaanik kinguneqarniartussaavoq. Ilinniartut ilai imaassinnaavoq kommunimi ilinniartunngorusulersut suliffimmilluunniit misileerusulersut ullormullu isumassarsiamut tunngasunik suliaqarlutik.”

Ullormut sammisaqarnissinni aaqqiissutissanut qanilliallappisi?

”Una siullertut alloriarneruvoq. Siunertaavorlu ingerlateqqissinnaanissaa, taamaammat ulloq naggaserlugu suliffimmik misiliisinnaanermik ilinniartunngorsinnaanermullu tunngasunik saqqummiisoqarpoq, neriuutigineqarmat kommunip, Ilisimatusarfiup ilinniartullu akornanni suleqatigiinnerulertoqassasoq. Ilisimatusarfimmi piginnaasat suut nassaassaanersut paasisaqarfigineruagut. Immaqa taava ilisimasassarsiornertalimmik suleqatigiittoqarsinnaalissaaq. Nuuk ilinniartoqarfittut ilisimasaqarfittullu ineriartortinneqassaaq, taamaattumillu siammasissumik suleqatiginninnissaq pisariaqarpoq. Isumaqarpunga, ilinniartuunerup nalaani ilisimasanik annertusaaneq pissarsissutaalluartartoq sulilernissamullu piareersimanerulersitsisartoq.”

Ulloq sulisussarsiorluni oqaloqatiginninnertut isigaajuk?

”Ilinniartunik oqaloqatiginnilluaqaagut. Kommunitut ingerlalluassagutta sulisussat pitsaanerpaat pisinnaajumallugit suliffeqarfiit Namminersorlutillu Oqartussat unammillertariaqarpavut. Uani attavissarsivugut ilinniartullu paasivaat kommunimi sulineq pissanganartuusinnaasoq.”

Tamannalu nittarsaassilluarneruvoq
Pingasunngornermi Solution Campeqartitsinermi Ilisimatusarfimmi fagini toqqagassaasinnaasut ilagaat ”Sustainable Entrepreneurship”. Fagimi ilaatigut pingaarnerutinneqarluni aaqqissuussaanermi nutaaliorluni qanoq sulisoqarsinnaanersoq aamma niueriaatsit nutaat qanoq ineriartortinneqartarnersut.

Anne Lise Kappel Ilisimatusarfimmi Aningaasaqarnermut Inuussutissarsiornermullu ilinniagaqarnermut immikkoortortami aqutsisuuvoq.

Anne Lise, Solution Camp ilisimatusarfimmut ilinniartunullu qanoq pissarsiaqarfiua?

”Siullertut pingaarnertullu ilinniartut takorloorsinnaanngorpaat Ilisimatusarfiup avataani pissutsit qanoq ingerlanersut. Inuussutissarsiortut kommunilu attaveqatigineri pitsaalluinnarpoq. Nunatsinni pissutsit piviusut paasisaqarfigalugit pitsaalluinnartuuvoq.”

Ulloq sulisussarsiorluni oqaloqatiginninnertut isigaajuk?

“Tamanna qularutissaanngilaq. Ilisimatusarfimmi ullorli siulleq ilinniartunngortunut oqartarpunga Nunatsinni isikkiviginnerpaamut pisut. Ilisimatusarfimmi ilinniartunngoraanni sivitsunngitsoq inunnut avatangiisiniittunut attaveqalertarneq pisarpoq, taamaattumillu pingaaruteqarluni erseqqississallugu suliffeqarfinnut pisortaqarfinnulluunniit tunniussaqaqataasinnaasut. Suliffimmik misiliinermi, sulianut atatillugu allaaserinninnermi ullumikkullu pisunut assingusuni ilinniartut ilaat maluginiarneqalertarput. Ilinniartut imminnut nittarsaalluartarput.”

Suliffimmik misiliinermut ilinniartunngornissamullu nittarsaassineq Solution Campimi naggataarutigineqarpoq. Amerlanerusut ilinniagaqarlernissaannut suliffeqalernissaannullu tunngasumik inuusuttut peqataasut siunnersuutaat Kommuneqarfik Sermersuumi chefit aqutsisullu tusarpaat. Peqatigitillugulu ilinniartut Kommuneqarfik Sermersuumi periarfissaat suunersut chefit aqutsisullu oqaluttuaraat.

Aaqqissuussaq Kommuneqarfik Sermersuup, Ilisimatursarfiup aamma Aalborg Universitetip qanimut suleqatigiillutik pilersaarusiorpaat.