Services

Sermersooq pisortamik misilittagartuumik atorfinitsitsivoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersuup Isak Nielsen Kleist Isumaginninnermut Suliffeqarnermullu Ingerlatsivimmi pisortatut atorfinitsippaa.

Isak Nielsen Kleist Kalaallit Nunaanni Namminersorlutik Oqartussani Inuussutissarsiornermut, Suliffeqarnermutm Niuernermut Nukissaqarnermullu Naalakkersuisoqarfimmi pisortap tulliatut atorfini qimappaa, maanna atorfittaani tassani qanimut suleqatigisimallugu.

Namminersorlutik Oqartussani Suliffeqarnermut Immikkoortortaqarfimmi pisortatut susassaqarfiit makkua ilaatigut akisussaaffigisimavai; Majoriamik inerisaaneq, nunat allamiut pillugit suliassaqarfik, ilinniarsimanngitsunillu pikkorissaaneq. Suliassaqarfiit maanna Kommuneqarfik Sermersuumi akisussaaffigilikkani. Pisortartaallu suna iserfigilernerlugu nalunngilluinnarpaa.

”Maanna atorfigisanni suliniutit arlallit kommunit suleqatigalugit ingerlassimavakka, Kommuneqarfik Sermersoorlu suleqatitut eqeersimaartutut pikkorissutullu misigiuarsimavara. Taamaammat Isumaginninnermut Suliffeqarnermullu Ingerlatsiviup annertuumik suliniuteqarnera siuttuuffigilissallugu qilanaaraara,” Isak Nielsen Kleist oqarpoq.

”Taamak annertutigisumik aqutsinermik misilittagalimmik, suliarilerumaagassaminillu taamak ilisimasaqarluartigisumik pissarsisinnaasimanerput nuannaarutigeqaara. Siunissamut assut isumalluarnarpoq,” Kommuneqarfik Sermersuumi borgmesteri, Asii Chemnitz Narup, atorifinitsitsiniarnermi ataatsimiititami peqataasimasoq oqarpoq.

Isumaginninnermut Suliffeqarnermullu Ingerlatsivimmi pisortatut atorfik oktober 2017-imiit inuttaqarsimanngilaq.