Innuttaasut 70-it missaanniittut peqataapput Paamiuni utoqqaat illussaani nappaanersiortoqarmat. Pølset, sodavandit, kaffi, tii kaagillu najuuttunut sassaalliutigineqarput.
Borgmester Asii Chemnitz Narup inupparsuarnut tikilluaqqusivoq ilaatigullu oqarluni:
”Nuanneqaaq maaneeqatigalusi sanaartorfimmi. Ulloq una assut qilanaarisimavara. Suliaq sivisuumik ingerlasimavoq. Kommunit 2009-mili kattummata Paamiuni utoqqaat illussaannik nutaamik sananiarneq pilersaarutaalersimavoq, maannakkullu kiisami iluatsippoq. Inuppassuit suliffeqarfiillu suliap piviusunngortinnissaanut suleqataasimasut qutsavigerusuppakka.”
”Suliap naammassivinnissaa qilanaaraarput, taamaasillutillu utoqqaat inissianut pitsaanerusunut nuussinnaanngussapput,” Asii Chemnitz Narup oqarpoq.
Isumaginninnermut suliffeqarnermullu ataatsimiititaliami siulittaasoq, Charlotte Ludvigsen aamma oqalugiarpoq.
”Tamassinut qujarusuppunga uunga killiffitsinnut. Ammaanersiornissatsinnut qilanaarpunga, minnerunngitsumik atuisussat qilanaarput. Atuisussanut 24-nut inissaqartitsissaagut, naatsorsuutigisinnaavarpullu 2040-mi atuisut amerlanerussasut.”
Utoqqaat illussaat ukiaru naammassissaaq. Illoq 1951 m2-voq 56 million koruuneqarsimalluni. Aningaasartuutit Kommuneqarfik Sermersooq Namminersornerullutillu oqartussat akornanni avinneqarsimapput.
Sulisut nunatsinneersut
Sanaartorfimmi aqutsisoq Finn Olesen Frederikshåb Betoncentral-meersoq aamma tulluusimaarpoq.
”Ulloq manna tikillugu nunatsinneersuinnarnik sulisoqarsimavugut, tamannalu assut tulluusimaarutigaarput. Nuanneqaaq aningaasat maani nunatsinni kaaviiaartissinnaagatsigit, kisianni aamma nuanneqaaq suliaq taamak annertutigisoq nammineq kivissinnaagatsigu. Tulluusimaarnaq.”
”Betoni 825 kubikmeteriusoq atorsimavarput, siornatigullu suliarisimasatsinnut sanilliussagaanni tamanna assut annertuvoq. Sulisorisimasagut tulluusimaarutigeqaakka,” Finn Olesen oqarpoq.