Innuttaasunut

Asii Ukiortaami oqalugiaatimini: Nutaanik isumassarsiortariaqarpugut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersuumi borgmesterip ukiortaami oqalugiaani, meeqqat atugarliortut annertuumik sammineqarput.

Kommuneqarfik Sermersuumi borgmesterip, Asii Chemnitz Narupip ukiortaami oqalugiaatimi annersaani meeqqat atugarliortut sammivai.

Kommuneqarfik Sermersuumiinnaanngitsoq nunatsinnilu tamani annertuumik iliuusarsimasut naammassimannginnerat, borgmesterip takusinnaanerarpaa nutaamillu eqqarsartoqartariaqalernerarlugu.

”Isumaqarpunga pisartut artornartut qaangerniarnerini aqqutissat nutaat ujartortariaqarigut.

Kissaatigivara meeqqanut pineqartunut angerlarsimaffiit toqqissisimanartut aalaakkaasullu pilersissagigut, meeraanertik tamaat inersimasunngornerminnullu attavigisinnaasaannik – inuunertik tamaat. Soorlu ilaqutariit nukissaqarluartut meerartaat ilaquttaminnut inuunertik tamaat attaveqartartut.

Tassaanngitsut ”paaqqinniffiit” nalinginnaasut. Angerlarsimaffiilli!”, Sermersuumi borgmesteri oqarpoq.

Asii Chemnitz Narupip ilanngullugu mianersoqqussutigaa, meeqqat atugarliortut ikiorniarlugit suliassaq imaalitsiaannaq naammassineqarsinnaanngitsoq.

” Ajornaatsunik aaqqiissutissaqanngilaq – kommuninut Inatsisartunullu. Suut tamarmik piffissamik pisariaqartitsiffiusarput, aamma amerlanertigut aatsaat piffissap sivisuup ingerlareernerani isumaginninnerup iluani suliniutit kinguneri ersarissut uuttorneqarsinnaasullu takuneqarsinnaalersarput.

Pitsaasunik siunertaqarneq qaffasissunillu anguniagaqarnerit kisimik naammanngillat. Aamma angajoqqaat matumani peqataalluinnartariaqarput”, Asii Chemnitz Narup oqarpoq.

Borgmesterip uparuarpaa ullumikkut Kommuneqarfik Sermersuumi missingersuutit arfineq pingasorarterutaat meeqqanut inissinneqarallarsimasunut atorneqartartut, ukiunilu aggersuni aningaasartuutit suli amerlanerulerumaartut.

Borgmesterip ukiortaami oqalugiaataa 2017-2018