Kommueqarfik Sermersuup juullimi ammartagaa juullernissaata tungaanut ingerlavoq. Kommunalbestyrelsimi ilaasortat apersornikuuagut ukiup ingerlanerani suliaminni suut nuannarinersaasimaneraat aamma inuunerminni juullimi eqqaamasaminni suna nuannernersaanersoq.
Kommunalbestyrelsimi ilaasortaasimaninni isumaqarpunga, 2017 annertunerpaat ilaannik aalajangiiffigisarsimagipput.
Susoqarneranik innuttaasunik malinnaatitsinermi kommunip pikkorinnerulernissaa ilaasortaanerma nalaani sulissutigisimavarput. Iserimmi atuisut aalajangeeqataasinnaanerulersimapput, najukkami ataatsimiititaliat pilersinneqarsimapput, kommune ammasoq ingerlanneqartalersimavoq innuttaasunillu ataatsimiititsinerit amerlisimapput. Pitsaanerulersimavoq siunissamilu pitsaanerulersinnaavoq pitsaanerulissallunilu. Pingaarnersaavorli Nuummi inissaaleqinerujussuup akiorniarnera aallartissimagatsigu.
Kommunalbestyrelsimi ataqatigiinneq pitsaaffigigipput aamma isumaqarpunga. Pisariaqarnerpaaffiani annertuunillu aalajangiisussaatilluta ataqatigiittuaannarpugut. Pingaaruteqarpormi kikkut tamarmik peqataatinneqarnissaat, tamannalu aallaavigalugu sulinitsinni innuttaasut peqataatinneqarnerunissaat sulissutigisimavarput.
Massakkut neriuuteqarfiginerpaasakka meeqqanut tunngasuupput. Unammilligassat iluarsisariakkagut pillugit annertuumik sukumiisumillu pilersaarusiortoqarnikuuvoq. Tamannalu siunissami qaninnerusumi suli initunerulertussaavoq. Suliassaq tamanna aamma tamattaalluta suliariniartussaavarput. Kommunalbestyrelse, atuarfinni siulersuisut, ilinniarsimasut angajoqqaallu akornatsinni. Meeqqatsinnummi tunngavoq, taakkulu, illit uangalu siunissarput.
Juulli meeqqat nuannaarfigigaat nalunngilarput. Soorlu uanga aamma juullimi eqqaamasakka nuannernerit meeraaninneersut. Tassanimi kinguaariiaat sisamaalluta aanaqqiimi aataqqiimilu katersuulluta juulliortaratta. Aanaqqiima qeqqaniit meeqqani, ernuttani ernutaqqiutinilu qimerloorujoortarpai. Nammineq anaananngoriarama juulli allatoqqinnaaq ilaqalerpoq – soorlumi aatsaat juulli issiup, aputip, juullip qaammaqqutaasa tussiarpalunnerullu ataani pilluarfiusoq.
Ilaqutariiusugut ataatsimoorneq nuannareqaarput periarfissaqartillutalu katersuuttuaannarluta, ingammik maanna amerlanerulersimanitsinni.
Kommuneqarfik Sermersuup juullimi unammisitsinerani #julenuuk-mut peqataanissat eqqaamajuk. Hashtag #julenuuk atorlugu Facebookimut Instagramimulluunniit assimik ikkussiguit unammisitsinermut peqataassaatit.