Sulisutsialaat tunngavigilluarneqarsinnaapput, aammalu sulisut aqutsisullu allannguinissamik kajumissuseqarluarlutik. Suliniutit amerlanerpaat pilersaarutit malillugit ingerlanneqarput, suliassalli suli aannertoqaat. Kommuneqarfik Sermersuumi meeqqanut ilaqutariinnullu suliassaqarfimmi 2017-imiit 2020-mut ineriartortitsinissamut pilersaarutip killiffia pillugu nalunaarut taamatut naatsumik oqaatigineqarsinnaavoq.
Meeqqanut, Inuusuttunut Ilaqutariinnullu 2017-imiit 2020-mut Ineriartortitsinissamut pilersaarummi siunertat ilagaat, Meeqqanut Ilaqutariinnullu Ingerlatsiviup suliani pillugit qaammatit pingasukkartumik ataasiarluni Kommunalbestyrelsimut nalunaarutigisassavai. Qaammatit pingasukkaarlugit nalunaarusiortarnissami siulleq una tamanut ullumikkut saqqummiunneqarpoq.
Ineriartortitsinissamut pilersaarummi suliniutit aqqaneq-marluusuni qulit pilersaarutaasut malillugit ingerlanneqarput, suliassaqarfinnili marlunni naatsorsuutigisamit ilungersunarnerusumik arlalitsigut suliassaqarpoq. Sulisut sullissinerminni najoqqutassatut malitassaat naammassimanngitsut paasinarsivoq. Tamanna ima kinguneqassaaq, torersaanissamut sulinissaq aqutsisullu nakkutilliinissaat aallartitsinnagit, sullissinermut tunngavigisat pitsaanerusunngortinneqarnissaat naatsorsuutigisamit suliarineqarnerusariaqarput.
”Ineriartortitsinissamut sulinissaq naatsorsuutigisamit annertunerujussuusoq soorunami uggornarpoq. Taamaattoq sulinermi siuariartortoqartillugu pilersaarutit iluarsisarnissaat pisariaqartoq illuatungaatigut naatsorsuutigisariaqarpoq. Taamatut nalaataqarnerput kingulliunavianngilaq” taama oqarpoq Meeqqanut Ilaqutariinnullu Ingerlatsivimmi pisortaagallartoq, Helene Horsbrugh. ”Meeqqanut suliassaqarfiup siuariartortinnissaanut sulineq imaannaanngitsuussasoq ilisimaariuarparput, aamma ajornaatsunik iluarsiissutissaqanngitsoq ilisimaaralutigu. Ineriartortitsinissamut sulinitta ingerlarsorfiulereernera nuannaarutigaara”,
Martha Lund Olsen 1. decembarimiit Meeqqanut Ilaqutariinnullu Ingerlatsivimmi pisortatut siuttunngussaaq, tamatumalu kingorna Helene Horsbrugh ineriartortitsinermut pilersaarut akisussaaffigalugu ineriartortitsinermut pisortatut atorfeqalissalluni.