Tunuliaqutaa:

Februaarip ulluisa 14-ianni piginnittut ataatsimiinnerat innersuussutigalugu Ineqarnermut Attaveqaqatigiinnermullu Naalakkersuisoqarfiup kommunimut kommuninilu inissiaatileqatigiiffinnut attartortitsinermut nutaamik inatsisiliornissamut ilanngukkusutanik piumasaqaataa innersuussutigalugu matumuuna allannguutissatut siunnersuutit ilaat nassiunneqarput.

Allannguutissatut siunnersuutit:

Kapitali 1: Atuuffia

Oqaaseqaateqartoqanngilaq.

Kapitali 2 – Innersuussinermi malittarisassat

§ 5 Inissiamik innersuussinermi tulleriinneri allanngortittariaqarput:

– Isumaginninnermi inissiamik tunniussineq (8.) Innuttaasunut nalinginnaasumik utaqqisut allattorsimaffiannut allatsissimasut taassuminnga neqeroorfigitissimasunut tunniuinneqassaaq, aamma ”qujaannarsimasunut”. Imm. 8 tulleriinnerini imm. 10-mut paarlaanneqassaaq.

§ 23: (Isumaginninnermi innersuussinermi annaasaqarnermi qularnaveeqqut): Aningaasat annerpaaffissaat

60.000 kr. peerneqartariaqarpoq. Misilittakkat naapertorlugit iluarsartuussinermi aningaasartuutit amerlanerujussuusinnaasarput aammalu attartortut allat (ineqarnermut akiliutit aqqutigalugit) isumaginninnermut oqartussat pinnatik aningaasartuutinik amerlasuutigut qaffaseqisunik akiliuteqarnissaat naapertuutinngilaq.

Kapitali 3 – Najugaqartut oqartussaaqataanerat

Oqaaseqaateqartoqanngilaq.

Kapitali 4 – Ineqarnermut akiliutit annertussusilerneqartarnerat, ineqarnermut akiliutit iluarsiivigineqartarnerat allaffissornikkullu aqutsineq: 2

§ 31: Namminersorlutik Oqartussanut kommuninullu aningaasanik iluanaarutaasunut tunngasoq. Nutaamik inissialianut aalajangersimasumik procentimut akigititaq atorunnaarsikkiartuaartariaqarpoq taarsiullugulu sanaartornermut inaarutaasumik aningaasartuutaasussanut taarserneqarluni. Aammattaaq nutaanik inissialiornermi kvadratmeterimut annerpaamik minnerpaamillu aningaasartaritinneqartut 15.000 kr. aamma

7.000 taarsertariaqarput inaarutaasumik sanaartornermi aningaasartuutivinnut.

Kapitali 5 – Qularnaveeqqusiissummik aamma ineqarnermut akiliuteqarneq

§ 37: Qularnaveeqqusiissummik naafferartumik akiliuteqarsinnaaneq atorunnaarsinneqartariaqarpoq. Taarsiullugu initaarniartoq sioqqutsilluni akiliutissaminik toqqorterisariaqarpoq. Najugaqatigiinnut isertitakitsunut tamanna ajornassappat taarsigassarsiniarnissamut kommunimit qularnaveeqqusiisoqarnissaanik qinnuteqaateqartoqarsinnaavoq. Qularnaveeqqusiissutip annertussusia qaffattariaqarpoq qaammatini arfinilinni ineqarnermut akiliutip amerlaqataanik. Tamatuma kingunerisaanik attartukkamik qimatsinermi iluarsartuussinermi aningaasat amerlanerit atorneqarsinnaalissapput.

Taamaasillutik allamut nuuttut nuunnerminnut atatillugu amerlasuunik akiligassaqalernissaat pinngitsoortinneqassaaq.

Kapitali 6 – Imermut, kiassarnermut il. il. akiliutit

Oqaaseqaateqartoqanngilaq.

Kapitali 7 – Aserfallatsaaliineq, iluarsartuussineq atuinerlu

§ 49, Imm. 2 Ilimasaarinissamut piffissaliussaq sapaatip akunnerinut pingasunut allanngortissasoq kissaatigineqarpoq (maannakkut sapaatip akunnerinut arfiniliusunut taarsiullugu), sulineq attartortumut annertuumik akornutaanngippat aammalu suliassanut allanut qaammatini pingasuni ilimasaarinissamut piffissaliussaq allanngortinneqassasoq qaammatip aappaata affaanut.

Kapitali 8 – attartortup attartukkamik atuisinnaanera

Oqaaseqaateqartoqanngilaq.

Kapitali 9 – Atuisinnaassutsip allanut tunniunneqarnera

§ 58, Imm 2 “Nuutikkallarneqarneq” Paragraffimi tassani ”Nuutikkallarneqarneq” qanorpiaq paasineqassanersoq nassuiaatitaqassaaq. Qaammatit pingasut pineqarpat, qaammatit 15-it, imaluunniit ”nuutikkallarneqarnermi” ukiut tallimat aamma pineqarpat? Aamma ilanngullugu kissaatigineqarpoq sulisitsisumiit uppernarsaatit qanoq ilusilersorneqassanersut. “Napparsimaneq”: Paragraffimi ”napparsimaneq” qanorpiaq paasineqassanersoq nassuiaatitaqassaaq. Kalaallit Nunaanni illoqarfimmut allamut imaluunniit DK-mut nakkutilliiartorneq pineqarpa? ADHD/damp (ingammik meeqqani) nappaatitut isigineqarpa? Aamma Kalaallit Nunaanni illoqarfimmi allami imaluunniit DK-mi napparsimalluni nammineq toqqarlugu katsorsartinneq pineqarpa, nammineq ”kajumissuseq” tunngavigalugu

katsorsartikkiartorluni nuunneq pineqarpa, imaluunniit nappaat illoqarfimmi pineqartumi imaluunniit DK-mi taamaallaat katsorsarneqarsinnaasoq pineqarpa? 3

§ 58, Imm. 4. Ilanngullugu allaqquneqarpoq, attartortoq inissamik qulakkeerissunneqarsinnaanngitsoq atukkiussinerup qaangiunnerani. Erseqqissarneqassaaq, attartortoq IMA ILIORSINNAAMMAT atukkiussineq IMALUUNNIIT inissamik pissarsinissaa qulakkeerneqarsinnaavoq. Taakku marluk PINNAGIT.

§ 59 Ilanngullugu allaqquneqarpoq, attartortoq inissiamik paarlaannissamik qinnuteqaammut ilanngullugu nassiutissagaa illoqatigiit qanoq amerlatiginersut pillugu uppernarsaat (najugaqarsimanermut uppernarsaat), taamaalilluni attartortitsisup qinnuteqaat tiguguniuk nalilersinnaammagu inissiamik paarlaattoqarnissaa akuerineqarsinnaanersoq illoqatigiit amerlassusaat tunngavigalugu. Inigisamik paarlaanniarluni qinnuteqaatini tigusartakkani amerlanertigut inissiamut allamut paarlaaqatigiinnikkut nuunnissamut piumasaqaatit (inissiap angissusia) qinnuteqartup aappaanit naammassineqarneq ajorput.

§ 59, Imm. 3 Ilanngullugu allaqquneqarpoq, inissiamik paarlaanniarneq akuerineqarsinnaasoq piumasaqaatigalugu attartortoq inissiami ataavartumik najugaqassasoq, tassunga ilanngullugu ”ataavartumik” qanoq paasineqassanersoq erseqqissaatigalugu. Ullumikkut killiffik tassaavoq, attartortut inissiamik paarlaaqatigiittarmata arlaata inissiami attartorneq taamaatissallugu eqqarsarpat, tamatumalu kingunerisarlugu inissiamik paarlaaqatigiittoqartarnera, attartortullu aappaa inissiamut nuuissanani, aqaguanilu inissiamik paarlaaqatigeereernerup kingornagut attartorunnaartarlugu.

§ NUTAAQ Ilanngullugu allaqquneqarpoq, suliffimmut atasumik inissiamik attartortut inissiaatileqatigiiffimmi ataatsimi attartortut kisimik paarlaaqatigiissinnaammata, inissiaatileqatigiiffiit assigiinngitsut akimornagit.

§ 62 Inatsimmi taaguut ”inoqutigiit”, ”illoqatigiit” aamma ”inooqatigiit” nassuiaateqarfiginissaat kissaatigineqarpoq.

– Inoqutigiit qanoq paasineqassava? Katissimalluni, imaluunniit arnat marluk ikinngutigiit aamma inoqutigiittut taaneqassappat? Inissiamut aningaasatigut avitseqatigiinneq pineqarpa, imaluunniit qanoq nassuiaateqartinneqassava?

Kapitali 10 – attartorunnaarneq

Oqaaseqaateqartoqanngilaq.

Kapitel 11 – Attartortitsisup attartornermik atorunnaarsitsisinnaatitaanera

§ 73 Najugaqartutut akiligassat akilerneqanngippata aamma attartortitsinerup atorunnaarsinneqarsinnaanera ilanngukkusunneqarpoq.

Kapitali 12 – Attartortup attartukkamik qimatsinera

Inissiamik iluarsartuussineq pissaaq attartornerup naalernerani, taamaalilluni attartortoq piffissami iluarsartuussinerup nalaani attartornermut akiliissalluni, maannakkutut pinnani piffissaq iluarsartuussiffiusoq immikkoortortamit (attartortitsisumit) akilerneqartarneranut taarsiullugu

”§77. Attartukkamik qimatsinermi…..” allanngortinneqassaaq ima ”§77. Attartukkamik qimatsinissaq sioqqullugu……… ” 4

§ 78 Inatsimmut ilanngunneqassaaq, attartortitsisup aserfallatsaaliisussaatitaaneq qaammatit 100-t qaangiunneranni aatsaat tigussagaa, attartortoq piffissami attartornermi nalaani aserfallatsaalineqarsimappat (qilaavinik qaqorsarlugit qalipaaneq, qalipaaneq aamma / imaluunniit tapertilersornissaat kiisalu attartornerup aallartinneranut naapertuuttumik natit lakkerneqartarnissaat takuuk § 45 Imm. 3). Attartortup aserfallatsaaliisussaatitaanini naammassisimanngippagu, attartortoq qaammatini 100-ni ilanngaanneqarnissaminik pisinnaatitaanngilaq, inissiap aserfallatsaalineqarsimannginnera pissutigalugu.

Kapitali 13 – Nakkutilliineq

Oqaaseqaateqartoqanngilaq.

Kapitali 14 – Ineqarnermut Naammagittaalliuuteqartarfik

§ 82, Imm. 2 Siunnersuutigineqarpoq, Iserit A/S ilanngunneqassasoq aammalu Inissiaatileqatigiiffik Ini A/S assigalugu pisinnaatitaaffeqassasoq, taamaalilluni Iserit A/S aamma naammagittaalliuuteqartarfimmi ilaasortamik toqqaasinnaaniassammat.

NUTAAQ § Ilanngunneqassasoq kissaatigineqarpoq, Iserit A/S´ip aamma Inissiaatileqatigiiffik Ini A/S´ip Ineqarnermut Naammagittaalliuuteqartarfimmi siulittaasoq qinnuigisinnaavaat aalajangiinernik erseqqissunik itisiliissasoq nassuiaateqarlunilu.

NUTAAQ § Ilanngunneqassasoq kissaatigineqarpoq, attartortup Ineqarnermut Naammagittaalliuuteqartarfimmut suliassanngortitaa pisoqalisoornermut piffissalerneqassasoq. TUNNGAVILERSUUTIT:

Iserit A/S´imit naammattoorneqarnikuuvoq attartortup (qimatsinermi akiligassaq) 2018-imi Ineqarnermut Naammagittaalliuuteqartarfimmut anngummagu, piffissaq qimatsiffiusoq 2013-meersuulluni. Suliaq taanna ukiut tallimat sinnerlugit pisoqaassuseqarpoq ”pisoq / suliaq” pinngormalli, aamma Ineqarnermut Naammagittaalliuuteqartarfiup suliap suliarineqarnissaa toqqarsimavaa, aammalu inuttaasup (matumani attartortup) suliami nammineq attuumassuteqannginnera avaqqutivillugu. Attartortoq Iserit A/S´imut naammagittaalliuuteqarsimanngilaq imaluunniit 2013-imi qimatsinermi akiligassaq pillugu arlaatigut akerliliiffigisimanagu, taavalu ukiut tallimat qaangiummata naammagittaalliuuteqartarfimmut suliakkiutigalugu. Inissiaatileqatigiiffik suliamik taama ittumik misissuinissamut periarfissaqarsimanngilaq, inissiami iluarsartuussineq pineqartoq sanasut pineqartut eqqaamanngimmassuk (matumani paarsinerlunneq aserorterinerlu), aammalu attartortoq nutaaq inissiamut isertereersimalluni (immaqa ukiut ingerlanerini attartortut nikerarsimassapput), taamaattumik inissiaatileqatigiiffiup attartugaq imaluunniit suliaq tamakkiisumik misissorsinnaasimanngilaa.

NASSUIAAT:

Attartortut suliakkiissutaat pillugit Ineqarnermut Naammagittaalliuuteqartarfimmit pisoqalisoornermut piffissaliisoqartariaqarpoq, attartortut “piffissami naammaginartumi” Ineqarnermut Naammagittaalliuuteqartarfimmut suliakkiisimanngippata. Assersuutigalugu pisoq / suliaq qaammatit arfinillit sioqqullugit pisimappat (assersuutigalugu inissiami qimatsinermi akiligassamik, inissiamik paarlaannissami il.il. mianersoqqussummik tunineqarsimappat). Suliaq qaammatit arfinillit qaangerlugit pisoqaassuseqarpat, Ineqarnermut Naammagittaalliuuteqartarfimmi suliap suliarineqarnissaanut piffissaq qaangiutereerpoq. Attartortoq suliamik ukiunik tallimanik imaluunniit ukiunik qulinik pisoqaassusilimmik suliaqartitsisinnaasariaqanngilaq.

Kapitali 15 – Ikaarsaariarnermi atortuulersitsinermilu aalajangersakkat

Oqaaseqaateqartoqanngilaq.

Eqikkaaneq:

Neriuppugut allannguutissatut siunnersuutit qulaani taaneqartut inatsisartut peqqussutissaata allannguuteqartinneqarnissaanut ilanngunneqarumaartut.