---
title: "Suliniuteqarfimmi intern supervisor"
description: "Suliniuteqarfimmi intern supervisor"
date: "2026-09-22"
created: "2026-09-22"
---

[Hjem](https://sermersooq.gl/)

                    [Suliffissat](https://sermersooq.gl/suliffissat)

                    [inuttaqanngitsut](https://sermersooq.gl/suliffissat/inuttaqanngitsut)

                [Suliniuteqarfimmi intern supervisor](https://sermersooq.gl/suliffissat/inuttaqanngitsut/suliniuteqarfimmi-intern-supervisor)

Qinnuteqarnissamut periarfissarititaasoq

13/10/2026

Suliffik

Nuuk

Sumiiffik

Forvaltning for Børn og Familier

Attaveqarfissaq

Maliina Junge Jørgensen / ks28maju@sermersooq.gl

Meeqqanik, inuusuttunik ilaqutariinnillu sullissinermi suliamut tunngasumik eqqarsaatersorneq pitsaassuserlu nukittorsaaqataaffigerusuppigit?

Meeqqanut Ilaqutariinnullu Ingerlatsivimmi Suliniuteqarfik intern supervisorimik sulisussarsiorpoq, Suliniuteqarfiup immikkoortortaqarfiini tallimani sulisut suliamut tunngasumik supervisionertarnissaannik isumaginnittussamik.

**Suliniuteqarfik ukuninnga immikkoortortaqarfeqarpoq:**

∙Sikkerneq – Siunnersuisarfik Ilaqutariinnillu Sullissivik

∙Kuserneq

∙Dudo – Arnanut Meeqqanullu Qimarnguik

∙Meeqqat Angerlarsimaffiat Tupaarnaq

∙Inuusuttut Sullissiviat

Suliniuteqarfimmi sulisut meeqqat, inuusuttut ilaqutariillu assigiinngitsunik, ilaannikkullu ajornakusoortunik, pisariaqartitsisut sullittarpaat. Supervisoritut sulisut suliamut tunngasumik toqqissisimasumik eqqarsaatersorfigisinnaasaannik sinaakkusiissaatit, tassani suliat aalajangersimasut, nammineq suliamut tunngatillugu inissisimaffik aammalu iliuusissat assigiinngitsut eqqarsaatersorfigineqarsinnaassallutik.

**Suliassatit:**

Intern supervisoritut ilaatigut makku suliassarissavatit:

∙Ataasiakkaanik eqimattanillu supervisionertitsineq

∙Suliat aalajangersimasut aallaavigalugit sulisunik supervisionertitsineq

∙Suliamut tunngasumik eqqarsaatersorneq aqullugulu sulisut suliaq assigiinngitsunit isiginnittaatsinit takusinnaanngornissaannut tapersersorlugit

∙Nammineq suliamut tunngatillugu inissisimaffik aammalu meeqqamut, inuusuttumut ilaqutariinnulluunniit attaveqarneq pillugu eqqarsaatersornissamut tapersersuineq

∙Suliat ajornakusoortut pillugit suliamut tunngasumik iliuusissanik sulisunut takunnissinnaalersitsineq

∙Meeqqanik, inuusuttunik ilaqutariinnillu sullissinermi suliamut attaveqarnermullu tunngasumik pissutsit pilersinnaasut pillugit suliaqarneq

∙Suliniuteqarfiup immikkoortortaqarfiini tallimaasuni suliamut tunngasumik ilinniarnermut ineriartortitsinermullu tapersiineq

∙Supervisionip ingerlanneqarneranut ersarissunik toqqissisimanartunillu sinaakkusiineq, tassunga ilanngullugit isertuussamik suliaqarneq nipangius-sisussaatitaanerlu

Intern sagssupervision tassaavoq suliamut tunngasumik eqqarsaatersorfiusoq. Sulisumut terapiiunngilaq katsorsaanerunanilu. Supervisoritut suliaq aalajangersimasoq akisussaaffigilersussaanngilat, taamatuttaaq aqutsinikkut aalajangiinissat akisussaaffiginngilatit.

**Kina ujartorparput:**

Terapeutitut attuumassuteqartumik ilinniagaqarsimasumik ujartuivugut, assersuutigalugu psykoterapeutitut imaluunniit allamik assingusumik terapeutitut ilinniagaqarsimasumik, teoriimut periutsinullu tunngatillugu pitsaasumik tunngaveqartumik.

Pingaartipparput:

∙Terapeutitut attuumassuteqartumik ilinniagaqarsimanissat

∙Supervisionimik misilittagaqarnissat, ajornanngippat ataasiakkaanik eqimattanillu supervisionertitsinermik

∙Meeqqanik, inuusuttunik ilaqutariinnillu sullissinermik misilittagaqarnissat imaluunniit pitsaasumik ilisimasaqarnissat

∙Isumaginninnikkut ilaqutariinnullu tunngasunik ajornakusoortunik ajornartorsiutinik paasinnissinnaanissat

∙Pitsaasunik attaveqaqatigiinnermut oqaloqateqarnermullu piginnaasaqarnissat

∙Suliamut tunngatillugu nalornissutinik, eqqarsaatersornermik ilinniarnermillu toqqissisimasumik inissaqartitsisinnaanissat

∙Tusarnaarsinnaanissat aammalu misissuisumik eqqarsalersitsisumillu apeqquteqarsinnaanissat

∙Suliat ajornakusoortut nalaanni aamma suliamut tunngatillugu kinaassusersiunngitsumik professionelimik inissisimasinnaanissat

∙Namminersorlutit sulisinnaanissat, peqatigisaanillu assigiinngitsunik sulialinnik aqutsisunillu suleqateqarsinnaanissat

Isumaginninnermut tunngasumik sulinermik misilittagaqaruit aammalu meeqqat, inuusuttut ilaqutariillu immikkut pisariaqartitsisut pillugit suliaqarnermik ilisimasaqaruit iluaqutaassaaq.

**Atorfik pillugu:**

Atorfik Suliniuteqarfimmi organisatoriskimik inissisimassaaq aammalu immikkoortortaqarfiit tallimat tamaasa sullisissallugit. Taamaattumik assigiinngitsunik sulialinnik aammalu assigiinngitsunik suliniutinik suleqateqartassaatit – siusissukkut pinaveersaartitsinermit ilaqutariinnillu katsorsaanermit inuusuttunut, qimarnguimmut ulloq unnuarlu paaqqinnittarfinnullu tunngasunut.

Atorfimmi pingaaruteqartoq tassaavoq supervisionimut ersarissunik sinaakkusiisinnaaneq aammalu sagssupervisionip, terapiip, aqutsinermut sparringip sulisunullu tunngasumik suliat assigiinngissutaat paasisinnaallugit. Ajornartorsiut supervisionip sinaakkutaasa avataaniippat, tamanna takusinnaassavat aammalu eqqortumik ingerlariaqqinnissamut innersuussisinnaassallutit.

Peqatigisaanik Suliniuteqarfimmi intern sagssupervisionimut ataatsimoorussamik periuseqarnerup ineriartortinneqarneranut atuutsinneqalerneranullu peqataassaatit, intern sagssupervisionimut najoqqutassiaq suliarineqareersoq aallaavigalugu.

**Neqeroorutigaavut:**

Atorfimmi Suliniuteqarfimmi pingaarutilimmik suliamut tunngasumik inissisimaffeqalernissamut periarfissaqassaatit, tassani sulisut ullut tamaasa meeqqanik, inuusuttunik ilaqutariinnillu sullissillutik.

Suliniuteqarfimmi assigiinngitsunik sulialinnik neqeroorutinillu arlalinnik peqartumi suleqataalissaatit, aammalu suliamut tunngasumik eqqarsaatersorneq, ilinniarneq suliallu pitsaassusaa ataatsimoortumik ukkatarineqarnissaannut peqataassallutit.

Supervisionimut suliassaq kisimiillutit kivittussaanngilat. Suliniuteqarfiup intern supervisoria alla qanimut suleqatigissavat, marluullusilu Suliniuteqarfiup immikkoortortaqarfiini tallimani sulisut 80-it missaanniittut supervisionertarnissaat isumagissavarsi.

Supervisorit marluk akornanni qanimut suleqatigiinneq pingaartinneqassaaq, supervisionip ingerlanneqarnera, periutsit aammalu Suliniuteqarfiup immikkoortortaqarfiinut arlalinnut attuumassuteqarsinnaasut pillugit ingerlaavartumik suliamut tunngasumik avitseqatigiinnis-saq ilanngullugu. Peqatigiillusi intern sagssupervisionimut Suliniuteqarfiup najoqqutassiaa aallaavigalugu supervisionimik ataatsimoorussamik, ersarissumik assingusumillu periuseqartoqarnissaa qulakkeeqataaffigissavarsi.

**Pineqaatissinneqarsimannginnermut aamma meeqqanut pinerliisimannginnermut uppernarsaat:**

Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.

Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.

**Akissaatinut atorfinitsitaanermullu tunngatillugu atugassarititaasut:**

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

**Inissaq:**

Atorfininnermut atatillugu inissiamik innersuussisoqarsinnaanngilaq.

**Annertunerusumik paasisaqarusukkuit:**

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit:

Fagchef Maliina Junge Jørgensen, oqarasuaat +299 36 80 53 imaluunniit e-mail: ks28maju@sermersooq.gl

**Qinnuteqaat:**

Qinnuteqaat qulequtserlugu **Atorfiup ilisarnaataa 957-26-mik, ilinniagaqarsimanermut uppernarsaat** siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

**Imatut qinnuteqaateqassaatit:**

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

**Malugiuk:**

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

                            [Søg stillingen](https://mkjobsermersooq.azurewebsites.net/kl-gl/Details.aspx?VID=957-26)

## Attaveqarfissaq

Maliina Junge Jørgensen / ks28maju@sermersooq.gl