---
title: "Yellow September Kommuneqarfik Sermersooq"
description: "Ukiut pingasut tulleriit Kommuneqarfik Sermersuumi Yellow Septembarimut atatillugu imminut toquttarneq immikkut aamma tarnikkut atugarliorneq imminullu toqunnissamik eqqarsaateqarneq pillugit ukkataqarpoq."
date: "2026-09-30"
created: "2026-09-30"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Yellow September Kommuneqarfik Sermersooq](https://sermersooq.gl/kommuneqarfik-sermersooq-pillugu/nutaarsiassat-2/yellow-september-kommuneqarfik-sermersooq)

# Yellow September Kommuneqarfik Sermersooq

**Yellow September Kommuneqarfik Sermersooq**

Ukiut pingasut tulleriit Kommuneqarfik Sermersuumi Yellow Septembarimut atatillugu imminut toquttarneq immikkut aamma tarnikkut atugarliorneq imminullu toqunnissamik eqqarsaateqarneq pillugit ukkataqarpoq.

Qaammat una kommunimi Meeqqanut Ilaqutariinnullu Ingerlatsivimmi imminut toqunnissamik pinaveersaartitsinermi ilinniartitsisut Nuummi Paamiunilu innuttaasunik qanimut sullissisartunut pikkorissartitsipput. Peqataasut atugarliornerup paasinissaanut oqaloqatigiinnernillu ajornakusoortunik ingerlatsinermi ilisimasanik sakkussanillu pissarsitinneqarput.

Sapaatip akunnera 44-mi pikkorissarneq Tasiilami eqimattat arlallit peqataaffigisaanik ingerlanneqassaaq. Ilaatigut peqataassapput innuttaasunik qanimut sullissisut, ulluunerani paaqqinnittarfinni atuarfinnilu sulisut.

**Oqaloqatigiinnerni ajornakusoortuni sakkussat**

Pikkorissarnerni peqataasut imminut toquttarneq, imminut toqunnissamik eqqarsaasersortarneq tarnikkullu atugarliorneq pillugit nutaanik ilisimasaqalerput. Tassunga ilanngullugu Kalaallit Nunaanni imminut toquttarneq pillugu ilisimatusarnermik nutaamik paasisaqarlutik. Atugarliornermik takunnissinnaanermik, ilungersunartumik oqaloqatiginninnissamut sukumiisumik sakkussarsitinneqarput, misileraatinneqarlutik aamma ataasiakkaat eqqortumik ikiorneqarnissaannut ikorfartuisinnaanngorlutik.

Paamiuni septembarip 15-iniit 17-at ilanngullugu pikkorissarneq ingerlanneqarmat Meeqqanut ilaqutariinnullu ingerlatsivimmi inuusuttunut siunnersuisartup Tim Serritzlev-ip pikkorissarnermi pissarsiani, suliassaqarfimmilu kisimiikkaluarluni allanik suleqateqarsinnaalersimanini iluarisimaarpaa:

*“Ingerlaannaq iliuuseqarnermi oqaloqatiginninnermi alloriarfiusinnaasut assigiinngitsut misilittarlugillu paasisaqarfigilluarpakka, pissusilersuutaasut paasinissaannut aamma ulorianartup killinnerani nalilersuutaasartut ilikkakkakka sullissininni iluaqutaallualereerput. Suliassaqarfigisanni kisimiikkaluarlunga, maanna allanik qanimut suleqateqalernera iluaqutaallunilu eqaatsumik sulinermik pilersitsissaaq.”*

Paamiuni Ilaqutariinnut Sullissivimmi Ilaqutariinnut Siunnersuisartup Paneeraq M. Egede-p apeqqutit ammasut matoqqasullu atorlugit oqaloqatiginnissinnaaneq pissarsiaaqatigilluarpaa eqqissisarnissamullu sakkussarsilluarluni:

*“Aliasuttumut, kamaqqasumut uippakajaartumullu ingerlaannaq oqaloqatigiinneq aallartinngikkaluarlugu tussaqqaarsinnaaneq sakkussatut pissarsiara pingaarnertut ilikkarpara, iluaqutaangaassaarlu sulininni.”*

Paamiuni Meeqqanik Ilaqutariinnillu Sullisivimmi Ilaqutariinnut siunnersuisartup Marie-Louise Kleist-ip oqaloqateqarnermi tutsitsisinnaaneq, nalilersuineq, oqaloqatiginnittariaaseq kiisalu suliaq iperanngikkaluarlugu allanut ikiuutaasinnaasunut innersuussisinnaaneq pissarsiaqaatigilluarpai.

*“Oqaloqateqarluni tussaanermi anersaartorneq atorlugu eqqissisitsisinnaaneq, kingorna oqaloqateqarluni nalilersuineq kiisalu allamut saasaanissamut sakkussat paasisaqarfigilluaqaakka. Saniatigut soorlu peqqissaavimmut, psykoterapeutinut aamma sorgterapeutinut allanullu suliaq iperanngikkaluarlugu ikorfartuilluni innersuussisinnaaneq ilisimasatut pissarsiara tamatsinnut iluaqutaassaqaaq.”*

Paamiuni pikkorissarnermi kommunip imminut toqunnissamik pinaveersaartitsinermut ilitsersuisui Arnannguaq Petersen aamma Agathe Lyberth ilinniartitsisuupput. Nuummi ilinniartitsisuupput Najattaaq Møldrup aamma Najaaraq Guldager.

Suliniut aamma tarnikkut atugarliorneq aamma imminut toqunnissamik eqqarsaateqarneq pillugit paquminarunnaarsitseqataassaaq ammanerulersitsissallunilu. Eqqarsaatit misigissutsillu ilungersunartut pillugit eqqartuinissaq oqinnerulerpat ikiortissarsiornissaq ikiorneqarnissarlu aamma ajornannginnerulissaaq.

Yellow September taamaalilluni immikkut suliniutaanngilaq kisianni Kommuneqarfik Sermersuumi ataavartumik pinaveersaartitsinermik suliaqarnermut ilaavoq. Kommunimi ukioq naallugu atugarissaarnermik nukittorsaanermik, atugarliornermik pinaveersaartitsinermik aamma suliassaqarfinni assigiinngitsuni pitsaasumik suleqatigiinnissamik qulakkeerinninnissamik sammisaqartoqarpoq, taamaalilluni meeqqat, inuusuttut, ilaqutariit aamma innuttaasut allat piaartumik ikiorneqarsinnaassammata.

![](https://sermersooq.gl/i/MOLIRIMEDIA/798eca46-6980-4883-b22f-a32ad212dd0e?width=800)Paamiuni innuttaasunik qanimut sullissisut pikkorissaqataasut

![](https://sermersooq.gl/i/MOLIRIMEDIA/ed77362f-01e7-469b-bd5c-485e06a1a6d9?width=800)

![](https://sermersooq.gl/i/MOLIRIMEDIA/b3b1da6a-ec3c-4e47-9117-c074e50ee409?width=800)

![](https://sermersooq.gl/i/MOLIRIMEDIA/371476e1-a82a-427b-871f-c1549d83d910?width=800)