---
title: "Yellow September Imminut toquttarnerup pinaveersaartinnissaanut suliniut Kommuneqarfik Sermersuumit patajaallisarneqarpoq"
description: "Imminut toquttarneq Kalaallit Nunaanni suli unammilligassaavoq ilungersunartoq. Taamaattumik Kommuneqarfik Sermersuumi ataavartumik pinaveersaartitsineq atugarissaarnerlu sulissutigineqarput – tassunga ilanngullugu imminut toquttarnermik pinaveersaartitsi"
date: "2026-08-31"
created: "2026-08-31"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Yellow September Imminut toquttarnerup pinaveersaartinnissaanut suliniut Kommuneqarfik Sermersuumit patajaallisarneqarpoq](https://sermersooq.gl/kommuneqarfik-sermersooq-pillugu/nutaarsiassat-2/yellow-september-imminut-toquttarnerup-pinaveersaartinnissaanut-suliniut-kommuneqarfik-sermersuumit-patajaallisarneqarpoq)

# Yellow September Imminut toquttarnerup pinaveersaartinnissaanut suliniut Kommuneqarfik Sermersuumit patajaallisarneqarpoq

Imminut toquttarneq Kalaallit Nunaanni suli unammilligassaavoq ilungersunartoq. Taamaattumik Kommuneqarfik Sermersuumi ataavartumik pinaveersaartitsineq atugarissaarnerlu sulissutigineqarput – tassunga ilanngullugu imminut toquttarnermik pinaveersaartitsineq – kommunimi meeqqanut, inuusuttunut, ilaqutariinnut innuttaasunullu kommunimi sukumiisumik suliniutit pingaarutillit ilagaat.

![](https://sermersooq.gl/i/MOLIRIMEDIA/4393ebc1-1d87-4dcf-a106-186ee8957153?width=800)

Ukiuni pingasuni Kommuneqarfik Sermersuumi Yellow Septembarimut atatillugu imminut toquttarneq immikkut aamma tarnikkut atugarliorneq imminullu toqunnissamik eqqarsaateqarneq pillugit ammanerulersitsinissaq sammineqarput. 2026-mi kommunip suliaq tamanna ingerlateqqissavaa pitsanngorsarlugulu.

Taamaattumik Yellow September 2026-mut atatillugu Meeqqanut Ilaqutariinnullu Ingerlatsivimmit Nuummi, Paamiuni aamma Tasiilami ukiaanerani imminut toqunnissamik pinaveersaartitsinermik annertuumik suliaqartoqassaaq. Suliniut ilaatigut innuttaasut aarlerinartorsiorsinnaasut atugarliornerinut takunnissinnaalernissamut ikorfartuinissamullu sulisut ilisimasaannik nukittorsaassaaq aamma sakkussanik sukumiisunik tunniussissalluni.

Suliniummut ilaatillugu sulisut imminut toquttarneq tarnikkullu atugarliorneq pillugit nutaanik ilisimasaqalissapput, tassunga ilanngullugu Kalaallit Nunaanni imminut toquttarneq pillugu ilisimatusarnermik nutaamik paasisaqassallutik. Siusissukkut iliuuseqarnermi unammilligassanik pitsaanerusumik paasinninnissamik nukittorsaanissamillu pilersitsinissaq siunertaavoq.

”Sulisut ulluinnarni sulinerminni meeqqanik, inuusuttunik ilaqutariinnillu naapitaqartartut ilungersunartumik atugarliornermut takunnissinnaalernissamut oqaloqatiginninnermillu ilungersunartumik ingerlatsisinnaalernissaminnut sakkussaqalissapput. Taamatut suliniuteqarnikkut sulisut sulinerminni sakkussaat aamma kommunimi suliassaqarfinni assigiinngitsuni suleqatigiinneq nukittorsassavarput, taamaalillutik inuit ajornartorsiortut piaartumik eqqortumik ikiorneqassammata,” Suliniuteqarfimmi fagchefi, Maliina Junge Jørgensen oqarpoq.

Suliniut aamma tarnikkut atugarliorneq aamma imminut toqunnissamik eqqarsaateqarneq pillugit paquminarunnaarsitseqataassaaq ammanerulersitsissallunilu. Eqqarsaatit misigissutsillu ilungersunartut pillugit eqqartuinissaq oqinnerulerpat ikiortissarsiornissaq ikiorneqarnissarlu aamma ajornannginnerulissaaq.

Suliniummut ilanngullugu Meeqqanut Ilaqutariinnullu Ingerlatsivik Meeqqanut Atuarfeqarnermullu Ingerlatsivimmik suleqatiginnilerpoq Nuummi, Tasiilami aamma Paamiuni pikkorissartitsilluni sulianullu tunngasunik saqqummiussisoqarluni. Kommunimi imminut toqunnissamik pinaveersaartitsinermik ilitsersuisut pikkorissartitsissapput, aamma sulisut atugarliornermik takunnissinnaanermut, ilungersunartumik oqaloqatiginninnissamut sukumiisumik sakkussaqalissapput aamma ataasiakkaat eqqortumik ikiorneqarnissaannut ikorfartuisinnaalissallutik.

Yellow September taamaalilluni immikkut suliniutaanngilaq kisianni Kommuneqarfik Sermersuumi ataavartumik pinaveersaartitsinermik suliaqarnermut ilaavoq. Kommunimi ukioq naallugu atugarissaarnermik nukittorsaanermik, atugarliornermik pinaveersaartitsinermik aamma suliassaqarfinni assigiinngitsuni pitsaasumik suleqatigiinnissamik qulakkeerinninnissamik sammisaqartoqarpoq, taamaalilluni meeqqat, inuusuttut, ilaqutariit aamma innuttaasut allat piaartumik ikiorneqarsinnaassammata.