---
title: "Tasiilami ilisimatusarnermut innuttaasunik peqataatitsineq"
description: "Innuttaasunik peqataatitsinissamut sumiiffimmik orniguffissaqartariaqarpoq. Taamaattumik Tasiilap eqqaani ilisimatusarnikkut nutaamik suliniuteqarnissaq pillugu Kommuneqarfik Sermersuup aggustip aallaqqaataani katersortarfik aamma Inuusuttut Kulturikkut Illuat IGDLO atorneqarsinnaasunngortippai."
date: "2026-08-25"
created: "2026-08-25"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Tasiilami ilisimatusarnermut innuttaasunik peqataatitsineq](https://sermersooq.gl/kommuneqarfik-sermersooq-pillugu/nutaarsiassat-2/tasiilami-ilisimatusarnermut-innuttaasunik-peqataatitsineq)

# Tasiilami ilisimatusarnermut innuttaasunik peqataatitsineq

Innuttaasunik peqataatitsinissamut sumiiffimmik orniguffissaqartariaqarpoq. Taamaattumik Tasiilap eqqaani ilisimatusarnikkut nutaamik suliniuteqarnissaq pillugu Kommuneqarfik Sermersuup aggustip aallaqqaataani katersortarfik aamma Inuusuttut Kulturikkut Illuat IGDLO atorneqarsinnaasunngortippai.

![](https://sermersooq.gl/i/MOLIRIMEDIA/a69d7bea-48d5-4a25-b359-959ef6e9ddc8?width=800)

            Asseq: Projekt SermilkT

##### Ilisimasat pisariaqartitagut

Silap pissusaata allanngoriartornera sumiiffimmut qanoq sunniuteqarnersoq pillugu ilisimatusartut peqataasullu akornanni sammineqarput: najukkami apisarnermut pissutsit piterartarnerlu, issittumi inuiaqatigiinni inuussutissat isumannaatsuunissaat.

Kaffisortitsisarneq SermilikT-mut ilaavoq, kaffisortitsisarnerlu Sermiliup kangerluani ilisimatusarfimmi, Tasiilap eqqaaniittumi, ilisimatusartunit ilagiiaanit Østrigimeersunit nutaatut suliniutaavoq. Suliniummut oqariartaaseralugu "*Ilisimatusaqatigiinneq, ilinniaqatigiinneq"*. Ilisimatusarnermi ilisimasat ilisimatuussutsikkullu ilisimatusarneq ataqatigiissillugit siunissamut ungasissumut, inuit qitiutillugit, ineriartortitsisoqarnissaa takorluugaavoq.

*"Ilisimatusartut najukkami ilisimasanik soqutiginnillutik takutitsimmata nuannaarutigaarput. Ilisimasat, nunap immikkoortuani utoqqaat inuusuttullu nassatarisaat, silap allanngoriartorneranut atatillugu unammilligassat paasiniassagutsigit, pingaaruteqarluinnalersinnaapput,”* nunap immikkoortortaani Tunumi pisortaq, Hjørdis Viberg, oqarpoq.

##### Innuttaasut piumasaat malillugit peqataatitsineq

Tasiilami innuttaasut namminneq nunap immikkoortorisaminni ilisimasat suut katersorneqarnissaat pillugit sunniuteqarsinnaatinneqassappata, oqaloqatigiinnerit sumiiffimminni ingerlanneqassapput, aamma ingillutik oqaloqatigiiffigisinnaasaminni inissaqartinneqassallutik. Taakku kaffisortitsisarnissamut periarfissiipput. Katersortarfimmi aamma inuusuttut kulturikkut illuanni kaffisortitsinikkut illoqarfimmi siammasinnerusumik apuussisoqarsinnaasimavoq. Najukkami oqalutsit oqaloqatigiinnerit ingerlanneranni peqataasut namminneq oqaatsitik atorsinnaassallugit — tunumiisut qallunaatullu — qulakkeerinnipput.

Innuttaasunik peqataatitsinissamut kommunip periusissiai oqaloqatigiinnermut sakkussatut cafémi ataatsimiinnernut, workshoppertitsinernut aamma sammisanik suleqatigiissitat ataatsimiinnerinut — ileqquusumik innuttaasunik ataatsimiititsinernut tusarniaanernullu tapertaatitut — tikkuussipput. Innuttaasut peqataatissinnaaniarlugit paasissutissanik pissarsisinnaanissaq tunngaviusumik piumasaqaatigineqartutut periusissiami aalajangersarneqarpoq.

Ilisimatusartut tikeraartut kaffisortitsinermi peqataasut tamarmik Østrigimi Graz Universitetiminngaanneersuupput: Gertrude Saxinger, inuit pinngortitallu sunniivigeqatigiinnerinut tunngasumik nunalerinermut professoriusoq; Katrin Schmid, Issittumi pinngortitap, silap inuit inuiaqatigiillu sunniiveqatigiinnerat pillugit postdoc-iusoq; aamma Tiago Silva, ilisimatusarnermut assistenti.

SermilikT-suliniut aqqutigalugu siunissami ilisimatusartut najukkamilu inuiaqatigiit akornanni oqaloqatigiittoqartarnissaanut Kommuneqarfik Sermersuumit qilanaarutigineqarpoq.

![](https://sermersooq.gl/i/MOLIRIMEDIA/03e0ad98-6de0-4c6f-8e54-93d81459fd4c?width=800)Tasiilap katersortarfiani kaffisortitsinerup nalaani saqqummiineq. Asseq: Projekt SermilkT

![](https://sermersooq.gl/i/MOLIRIMEDIA/af5b7b67-4d24-4358-8e9a-e80213f35702?width=800)Tasiilap katersortarfiani kaffisortitsinerup nalaani saqqummiineq. Asseq: Projekt SermilkT

![](https://sermersooq.gl/i/MOLIRIMEDIA/a69d7bea-48d5-4a25-b359-959ef6e9ddc8?width=800)Tasiilami inuusuttut kulturikkut illuanni Igdlo-mi kaffisortitsinerup nalaani saqqummiineq. Asseq: Projekt SermilkT

![](https://sermersooq.gl/i/MOLIRIMEDIA/8250c5b3-6eb6-4e32-a119-60a03191f070?width=800)Tasiilami inuusuttut kulturikkut illuanni Igdlo-mi kaffisortitsinerup nalaani saqqummiineq. Asseq: Projekt SermilkT

![](https://sermersooq.gl/i/MOLIRIMEDIA/c3860d89-6458-4fc7-b8ff-f1123c446226?width=800)Tasiilami inuusuttut kulturikkut illuanni Igdlo-mi kaffisortitsinerup nalaani saqqummiineq. Asseq: Projekt SermilkT

![](https://sermersooq.gl/i/MOLIRIMEDIA/a48ba112-faa0-4d9a-9118-4c028b5ddfee?width=800)Asseq: Projekt SermilkT

![](https://sermersooq.gl/i/MOLIRIMEDIA/f0126091-583d-4c98-8d5a-bf84a0bf7efd?width=800)Asseq: Projekt SermilkT

![](https://sermersooq.gl/i/MOLIRIMEDIA/21c42336-8d06-4627-8a68-b44cb130dd0e?width=800)Tasiilami ilisimatusartut. Asseq: Projekt SermilkT