---
title: "Sunngiffimmi ornittakkat ataatsimoorlutik klubbinik siuarsaaniarput"
description: "Kommuneqarfik Sermersooq tamakkerlugu sunngiffimmi ornittakkani aqutsisut aamma sulisut workshoppimi katersuuteqammerput, misilittakkaminnik avitseqatigiillutik klubbillu ineriartortinniarlugit. Isumassarsiallu maanna ataatsimoorussamik isumassarsiorfissa"
date: "2026-11-18"
created: "2026-11-18"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Sunngiffimmi ornittakkat ataatsimoorlutik klubbinik siuarsaaniarput](https://sermersooq.gl/kommuneqarfik-sermersooq-pillugu/nutaarsiassat-2/sunngiffimmi-ornittakkat-ataatsimoorlutik-klubbinik-siuarsaaniarput)

# Sunngiffimmi ornittakkat ataatsimoorlutik klubbinik siuarsaaniarput

![](https://sermersooq.gl/i/MOLIRIMEDIA/3f3078b7-d284-4ce9-80b4-f91d703e9e89?width=800)

**Kommuneqarfik Sermersooq tamakkerlugu sunngiffimmi ornittakkani aqutsisut aamma sulisut workshoppimi katersuuteqammerput misilittakkaminnik avitseqatigiillutik klubbillu ineriartortinniarlugit. Isumassarsiallu maanna ataatsimoorussamik isumassarsiorfissatut katersorneqarput.**

Peqataasut Nuummiit, Paamiuniit, Arsummiit, Tasiilamiit, Ittoqqortoormiiniit aamma Kulusummiit novembarip qulingiluaanniit aqqaneq-aappaata tungaanut 2026-mi Nuummi ulluni sisamani workshoppimi naapeqatigiipput, tassani sunngiffimmi ornittakkat pillugit 2026-miit 2036-ip tungaanut immikkoortortami pilersaarummik tigussaasunngortitsillutik pilersaarusioqatigiillutik.

Sulianut tunngatillugu saqqummiisoqarneragut, misilittakkanik avitseqatigiinnikkut aamma ilaatigut Juniorklub Qajaasanut, NUiF-imut Ungdomsklubben Illu-mullu pulaarnermi peqataasut nutaanik paasisaqarput, kommunimilu tamani atorneqarsinnaasunik sumiiffimmilu klubbinut ataasiakkaanut tulluarsarneqarsinnaasunik sakkussanik pissarsiaqarlutik.

**Illoqarfiit nunaqarfiillu akornanni misilittakkanik avitseqatigiinneq**

Naak sunngiffimmi ornittakkani atugassarititaasut, periarfissat aamma pisariaqartitat assigiinngikkaluartut, naapinneq tamanut ilikkagaqarfiulluni pissarsiaqarfiulluarpoq. Workshoppimi angusat pingaarnerit ilagaat kommunimi sumiiffiit akimorlugit misilittakkanik avitseqateqarnissamik aamma isumassarsiornissamik periarfissaqalerneq.

Pingaartumik sulisut piumassuseqarnerat aamma workshoppip ingerlanerani assersuuterpassuit pitsaasut saqqummersut, Pipaluk Lynge Berthelsen, Kommuneqarfik Sermersuumi Sunngiffik Kulturimilu pisortaq taama erseqqissaavoq.

*”Sulisut meeqqat inuusuttullu sullissatik uummateqarfigeqigaat aamma ulluinnarni pitsaasumik allannguerusuttut malunnarpoq. Ilaatigut tusarparput aningaasartuuteqarpiarani imaluunniit aningaasartuuteqanngivilluni pissanganartunik tulluartunillu sammisassaqartitsisoqarsinnaasoq. Tamatsinnut isumassarsiorfiulluarpoq. Tamassuma takutippaa naak atugassarititaasut periarfissagullu assigiinngikkaluartut immitsinnut ilinniarfigisinnaaqisugut,”* Pipaluk Lynge Berthelsen, Kommuneqarfik Sermersuumi Sunngiffik Kulturimilu pisortaq taama oqarpoq.

Tunumiittaaq peqataasut workshoppernermut peqataanertik pissarsiaqaatigisimaqalugu aamma klubbiutiminnik inerisaanissaminnut sakkussaqalersimallutik oqaluttuarput.

*”Nuummi sunngiffimmi ornittakkanut pulaarnitsinni isumassarsiarpassuaqalerpugut. Klubbiutitsinnik inerisaanitsinnut nutaanik iliuusissaqalerpugut, ilaatigut aamma eqqarsaatigisimanngisatsinnik. Nuanneqaaq, neriulluaqalutalu angerlassaagut. Tunumi meeqqat inuusuttullu Kitaaniittunut sanilliullugit immaqa nunamut tunnganerusunik soqutigisaqarnerupput, isumassarsiaqalerpugulli aamma sakkussarsilluta uatsinnut tulluarsarsinnaasatsinnik ulluinnarnilu atorsinnaasatsinnik. Ajunngitsup tungaanut alloriarnertut misiginarpoq.”*

**Klubbit meeqqat inuusuttullu ineriartorfigisaat**

Workshoppimi pingaarutilittut ukkatarineqartut ilagaat sunngiffimmi ornittakkat qanoq meeqqanut inuusuttunullu pitsaanerusumik atugassaqartitsinerusinnaanerat, ilinniartitsisinnaanerat aamma ineriartortitsisinnaanerat. Sulisunullu pitsaanerusumik sinaakkusiinissaq, taamaalilluni ulluinnarni suliartuinnarneq pineqarani, kisianni piumassuseqarluni pilersaarusiornissamut, ineriartornissamut aamma meeqqat inuussuttuaqqallu peqatigalugit sammisassanik isumaqartunik naammassinnissinnaaneq ukkatarineqarput.

Pingaartumik Nuummi meeqqat inuusuttullu amerlanerusut sunngiffimmi ornittakkanik atuinerulernissaat pisariaqartinneqarpoq. Kisitsisit 2024-meersut takutippaat meeqqat inuusuttullu sullinniakkat 15 procentii ataallugit ullormi nalinginnaasumi klubbiniittartut.

Nuummiit peqataasut ilaatigut isumassarsiaraat qanoq iliornikkut klubbini sammisassat meeqqanut angajoqqaanullu pitsaanerusumik siammartinneqarsinnaanerat.

*”Qanoq sulisarnerput meeqqanullu qanoq pissusilersuutitigut oqariartuuteqartarnerput paasisaqarfigaarput. Sammisassat ataatsimut qanoq iliorluta meeqqanut angajoqqaanullu takussaasumik siammarnerunissaannut isumassarsiarpassuaqarpugut. Taamaaliornitsigut sunngiffimmi ornittakkat nukittorsarsinnaavagut aamma Nuummi ulluinnarni sunik ingerlataqareernerput takutinnerusinnaavarput. Takorluugarpassuaqalereerpugullu!” Asii B. Lange NUIF-mi aqutsisoq oqarpoq.*

**Isumassarsianik ataatsimut katersugaqarneq isumassarsianik piviusunngortitsiffiusinnaanngussaaq**

Isumassarsianik ataatsimut katersugaqarnissaq immikkoortortami pilersaarummi ilaareerpoq. Workshoppimi isumassarsianut katersuivissap ineriartortinnissaa aallartinneqarpoq. Tassani ataatsimoortinneqassapput kommunimi sunngiffimmi ornittakkani tamani sulisut misilittagaat, isumassarsiatsialaataat assersuutitsialaataallu.

Isumassarsianik katersuivik sulisut ulluinnarni sulinerminni isumassasiorfigisinnaasassarissavaat, ilaatigut sammisassanik pilersaarusiornerminni aamma sapaatip-akunneranut, qaammammut ukiumullu pilersaarusiornerminni.

*”Immikkoortortami pilersaarutaannarmik eqqartuinnginnissarput pingaaruteqarpoq, aammali iliuuseqarnertaqassaaq. Sulisut namminneq misilittagaat isumassarsiaallu isumassarsianik katersuivimmi ilusilersueqataassapput, taamaalilluni ulluinnarni atorneqartarniassammat. Peqatigitillugu sulisut siunissami sunngiffimmi ornittakkat ineriartortinneqarnerannut sunniuteqaqataanissamut periarfissinneqarput.”*  Pipaluk Lynge Berthelsen, Kommuneqarfik Sermersuumi Sunngiffik Kulturimilu pisortaq taama oqarpoq.

Naak illoqarfinni nunaqarfinnilu sunngiffimmi ornittakkat assigiinngitsunik sinaakkuteqarlutillu atugassaqarfiugaluatut, anguniagaq assigiippoq: Ataatsimoorfissanik toqqissisimanartunik pilersitsinissaq, meeqqat inuussuttullu atugarissaarlutik ineriartorlutik aamma allanut attaveqaqateqalersinnaassallutik.

Assit takulluarumallugit ataaniittut assit tuukkit:

![](https://sermersooq.gl/i/MOLIRIMEDIA/3f3078b7-d284-4ce9-80b4-f91d703e9e89?width=800)

![](https://sermersooq.gl/i/MOLIRIMEDIA/9395c8d8-ceae-4b47-a44b-5af672871e2a?width=800)

![](https://sermersooq.gl/i/MOLIRIMEDIA/f555ffad-bf0d-4008-ab0f-51854c630933?width=800)

![](https://sermersooq.gl/i/MOLIRIMEDIA/6a62174d-50e2-4298-85bd-9c6cab4e47d2?width=800)

![](https://sermersooq.gl/i/MOLIRIMEDIA/0f157840-9d54-45e7-bc63-43ecf04d4a75?width=800)

![](https://sermersooq.gl/i/MOLIRIMEDIA/2fecc567-b645-4b95-b973-e70634ba376c?width=800)

![](https://sermersooq.gl/i/MOLIRIMEDIA/edee9e6c-f266-47af-862a-c3e23359bbb5?width=800)

![](https://sermersooq.gl/i/MOLIRIMEDIA/ac9f6fae-b9b6-4fa4-b562-8f34bad6557e?width=800)

![](https://sermersooq.gl/i/MOLIRIMEDIA/6cfc4270-5d17-4021-a6ec-05155eab8353?width=800)

![](https://sermersooq.gl/i/MOLIRIMEDIA/da036841-195f-4bcf-bec4-cdc682234898?width=800)

![](https://sermersooq.gl/i/MOLIRIMEDIA/68b9c49e-2525-4fa2-bd44-5ce9f8673e43?width=800)

![](https://sermersooq.gl/i/MOLIRIMEDIA/c6ddea0e-e35e-43f9-820e-5406e532a816?width=800)

![](https://sermersooq.gl/i/MOLIRIMEDIA/6c50f959-fc21-4653-9929-99c087c696f0?width=800)

![](https://sermersooq.gl/i/MOLIRIMEDIA/b9677e49-106c-44d1-a1a4-ddf2f90b7229?width=800)

![](https://sermersooq.gl/i/MOLIRIMEDIA/e2eb18be-5a24-4dd2-9f84-2d42e6184552?width=800)

![](https://sermersooq.gl/i/MOLIRIMEDIA/ae1b5737-1748-47ad-853c-27e4dc378576?width=800)

![](https://sermersooq.gl/i/MOLIRIMEDIA/77ad01f3-abca-45b4-8b16-d63ea3f111af?width=800)

![](https://sermersooq.gl/i/MOLIRIMEDIA/a6653d79-6801-4172-a658-4a8bdb93ed51?width=800)
