---
title: "Sulisussaaleqineq ilaqutariit ulluinnaannut sunniuteqartarpoq – kommunimit aaqqiissutissanik suliaqarneq ingerlateqqinneqarpoq"
description: "Kommuneqarfik Sermersuumit ulluunerani paaqqinnittarfinni arlalinnit sulisussaaleqineq suli misigineqarpoq. Tamanna piffissap ilaani angajoqqaat ilaat meeqqaminnik aalliaaqqullugit piumaffigineqartarnerinik kinguneqarpoq. Tamatuma kingunerisaanik ilaqutar"
date: "2026-10-08"
created: "2026-10-08"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Sulisussaaleqineq ilaqutariit ulluinnaannut sunniuteqartarpoq – kommunimit aaqqiissutissanik suliaqarneq ingerlateqqinneqarpoq](https://sermersooq.gl/kommuneqarfik-sermersooq-pillugu/nutaarsiassat-2/sulisussaaleqineq-ilaqutariit-ulluinnaannut-sunniuteqartarpoq-kommunimit-aaqqiissutissanik-suliaqarneq-ingerlateqqinneqarpoq)

# Sulisussaaleqineq ilaqutariit ulluinnaannut sunniuteqartarpoq – kommunimit aaqqiissutissanik suliaqarneq ingerlateqqinneqarpoq

Kommuneqarfik Sermersuumit ulluunerani paaqqinnittarfinni arlalinnit sulisussaaleqineq suli misigineqarpoq. Tamanna piffissap ilaani angajoqqaat ilaat meeqqaminnik aalliaaqqullugit piumaffigineqartarnerinik kinguneqarpoq. Tamatuma kingunerisaanik ilaqutariinnut ajornartorsiuteqalersitsineq kommunimit ajuusaarutigineqarpoq aamma meeqqanut, angajoqqaanut sulisunullu ulluinnaat pitsaanerpaamik ingerlanneqarnissaannut ingerlaavartumik sulisoqarpoq. Peqatigitillugu kommunimi isumaginninnermi suliassaqarfinni arlalinni sulisoqarnikut ajornartorsiortoqarpoq, tassunga ilanngullugu utoqqarnik paaqqutarinninneq.

![](https://sermersooq.gl/i/MOLIRIMEDIA/0f017792-d4f0-4a5e-abbb-717cdd081781?width=800)

Ulluunerani neqeroorutini sulisussaaleqineq Kommuneqarfik Sermersuumut ajornartorsiutaavoq ilungersunartoq. Sulisut naammanngikkaangata naammattumik sulisoqarnissaq qulakkeerniarlugu paaqqinnittarfiit angajoqqaanut meeqqaminnik aalliaaqqusisariaqartarput.

Borgmesteri Avaaraq Olsenip inissisimaffiup ilaqutariinnut ilungersunartuunera ajornartorsiutaaneralu paasisinnaavaa.

“Sulisussaaleqineq pissutigalugu angajoqqaat suliffimminniit soraajaarlutik meeqqaminnik aallertariaqartarnerat naammagisimaarnanngilaq. Ilungersunartorsiortitsilertarnera aamma ulluinnaat ataqatigiissaarnissaanut ajornartitsisinnaanera paasisinnaalluarpara. Pisoq pimoorupparput aamma pitsaanerpaanik aaqqiissutissarsiornissaq sulissutigiinnaavipparput,” borgmesteri Avaaraq Olsen oqarpoq.

**Sulisuniit annertuumik suliniuteqarneq**

Sulisussaaleqinertaaq sulisut sulereersut ulluinnaat ingerlalluartinnissaanut suliassamik annertuumik kivitsineranik kinguneqarpoq. Tamanna ulluunerani paaqqinnittarfinnuinnaq atuutinngilaq. Aamma utoqqarnut suliassaqarfimmi aamma kommunimi isumaginninnerit ilaanni sulisunik atorfinitsitsinissaq attassiinnarnissarlu ajornartorsiutigineqarput.

“Sulisutsinnut ullut tamaasa isumaginninnermi neqeroorutitsinnik ingerlalluartitsiniarlutik ilungersuuteqarlutik sulisartut qutsavigerusuppakka. Suleqatinik amigaateqarnermi sulisut tatineqarnerulertarput. Suliniuteqarnerat maluginiarparput aamma qujamasuutigaarput,” Avaaraq Olsen oqarpoq.

Kommunimit atorfinitsitsinissamut aamma sulisoqarnissamut aaqqiissutissanik ingerlaavartumik sulissuteqartoqarpoq. Ajornartorsiulli amerlanerusunik atorfinnik inuttassarsiuussinikkut taamaallaat aaqqiivigineqarsinnaanngilaq. Isumaginninnermut suliassaqarfinni arlalinni sulisussaaleqisoqarpoq aamma ajornartorsiut Kalaallit Nunaanni allani misigineqarpoq.

**Pitsaanerusumik atugassarititaasut aaqqiissutissat ilagissavaat.**

Kommunalbestyrelsimit ukiunut tulliuttunut politikkikkut missingersuutit pillugit isumaqatiginninniarnerit naammassineqaqqammerput. Tassani aalajangiiffigineqarpoq, kommune ukiup missingersuusiorfiusup tullianiit suliassaqarfinni sulisussaaleqiffiunerpaasuni atorfinitsitsinermik, attassinermik aamma atugassarititaasunik pitsaanerusunik sulissuteqarnermik pitsanngorsaaffigineqassasoq.

Tamanna ilaatigut kommunimi isumaginninnermi assaat kissalaartunut atuuppoq. Periarfissat aalajangersimasut misissorneqassapput aamma sulinermi aggersumi ineriartortinneqassapput.

“Kommunimi nammineq suna pitsaanerusumik iliuuseqarfigisinnaanerlugu takussavarput. Tassani atorfinitsitsinermut, attassinermut aamma atugassarititaasutut neqeroorutigisatsinnut atuuppoq. Taamaattumik kommunalbestyrelsimit suliniuteqarnermik suli pitsaanerulersitsinissarput aalajangerneqarpoq. Tamanna ulluunerani neqeroorutitsinnut, utoqqarnik paaqqinniffitsinnut aamma suliassaqarfinni assannik kissalaartumik amigaateqarfigisatsinnut atuuppoq. Massakkut sulisorisatsinnut sulisoriligassatsinnullu piviusumik allannguisinnaasunik aaqqiissutissarsiussaagut,” Avaaraq Olsen oqarpoq.

**Ajornartorsiut kommuniinnarmiinngitsoq**

Paaqqinniffiit ataasiakkaani sulisussaaleqineq taamaallaat atuutinngilaq. Angajoqqaaq meeqqaminik aallerniarluni suliffimminiit soraartariaqaleraangat nammineq suliffigisaa aamma sulisussaaleqilertarpoq. Utoqqarnik paaqqinniffimmi sulisussaaleqinermik sulisut paaqqutarinnittussat isumassuisussallu annertunerusumik tatineqalertarput.

Taamaattumik assannik kissalaartunik amigaateqarneq aamma inuiaqatigiinni siammasissumik ajornartorsiutaavoq.

“Kommuneqarfik Sermersuummi iliuuserisinnaasagut akisussaaffigissavagut. Kisianni kisimiilluta Kalaallit Nunaanni sulisussaaleqiffiusumi atorfinitsitsiinnarsinnaanngilagut. Kommunimit aamma siunissaq ungasinnerusoq eqqarsaatigalugu aaqqiissutissanik pisariaqartitsivugut, taamaalilluni amerlanerusut isumaginninnermi suliassaqarfipput toqqartassavaat aamma pigeriikkagut tamaaniiginnarusussapput,” Avaaraq Olsen oqarpoq.

Kommuneqarfik Sermersuumit massakkut sulisoqarniarneq suli sulissutigineqassaaq peqatigitillugu ukiumi missingersuusiorfiusussami aallartinneqartussamik atorfinitsitsinermik, attassinermik atugassarititaasunillu sulissuteqarnermik pitsaanerulersinneqartumik pitsanngorsaasoqassaaq.