---
title: "Suliffimmik misiliisut pingasut Tunumi takornariaqarnermik ineriartortitsineq paasisimasaqarfigineruleraat"
description: "Aasap ingerlanerani Visit East Greenlandimut atasunik Kommuneqarfik Sermersuumi Takornariaqarneq & Ornitassat pingasunik suliffimmik misiliititsivoq. Tunup takornariartarfittut ineriartortinneqarnera tassani paasisimasaqarfigivaat."
date: "2026-09-11"
created: "2026-09-11"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Suliffimmik misiliisut pingasut Tunumi takornariaqarnermik ineriartortitsineq paasisimasaqarfigineruleraat](https://sermersooq.gl/kommuneqarfik-sermersooq-pillugu/nutaarsiassat-2/suliffimmik-misiliisut-pingasut-tunumi-takornariaqarnermik-ineriartortitsineq-paasisimasaqarfigineruleraat)

# Suliffimmik misiliisut pingasut Tunumi takornariaqarnermik ineriartortitsineq paasisimasaqarfigineruleraat

Aasap ingerlanerani Visit East Greenlandimut atasunik Kommuneqarfik Sermersuumi Takornariaqarneq & Ornitassat pingasunik suliffimmik misiliititsivoq. Tunup takornariartarfittut ineriartortinneqarnera tassani paasisimasaqarfigivaat.

![](https://sermersooq.gl/i/MOLIRIMEDIA/d9160f70-4306-4936-a399-322fba43a4a4?width=800)

Aviana Hjort Andersen aamma Julia Sørensen, Kujataani serviceøkonomitut ilinniartut sapaatit akunnerini arfineq-pingasuni suliffimmik misiliinertik naammasseqqammerpaat. Nuka Eliassen-Kristensenip, Danmarkimi International Hospitality Managementimik ilinniagaqartup, Tasiilami sapaatit akunnerini aqqaneq-marlunni suliffimmik misiliineq suli ingerlappaa.

Ilinniartut pingasuusut ilaatigut takornariartarfiup ineriartortinneranik, suliniutinik aamma attaveqaqatigiinnermik suliaqarlutillu takornariaqarnerup attaveqaasersuutinut, angallannermut, najukkami suliffeqarfinnut innuttaasunullu qanoq ataqatigiittuunerat paasisimasaqarfigivaat.

”Immikkoortumi Tunumisut takornariaqarnerup ineriartortinneqarnerani, pissutsit assigiinngitsorpassuit qanoq amerlatigisut kalluaasartut paasisaqarfigilluarpakka. Takornarianik pilerisaarinerinnaanngilaq, aammali attaveqaasersuutit, najukkami suliffeqarfiit, angallanneq, piginnaasat minnerunngitsumillu najukkami innuttaasut ineriartortitserusuttut pineqarput,” Nuka Eliassen-Kristensen taama oqarpoq.

Julia Sørensen aamma Aviana Hjort Andersen taamatulli erseqqissaapput, tassa suliffimmik misiliinerminni takornariaqarnerup ineriartortinneqarnerani pilersaarusiukkamik sulineq aamma attaveqaqatigiinnerup suleqatigiinnerullu pingaaruteqassusai paasisimasaqarfiginerulersimallugit.

Tunumi takornariaqarneq pillugu ataqatigiissaarisoq, Anna Burdenski Kommuneqarfik Sermersuumeersoq naapertorlugu, suliffimmik misiliinermik ingerlatsinerat ilinniartunut kommunimullu naleqarluarsimasut.

”Sulinermi suliffimmik misiliisuuteqarneq assut naleqalersitsivoq. Alapernaatsuullutik, allaanerusumik isiginnittaaseqarlutik isumassarsisarlutillu peqataanillu takornariaqarnerup ineriartortinneqarnera suleriaatsimi qanoq ingerlanneqartartoq misigisaqarfigivaat. Neriuppugut suliffimmik misiliisimanertik takornarialerinerup iluani suliaqarusussuseqalersissimassagaat immaqalu sulisartuunerminni Tunumut uterusulersinnaassasut.”

**Tasiilami misigisat**

Suliffimmik misiliinikkut ilinniartut pingasuusut takornariartarfiup suliaqarfigisartik namminneerlutittaaq misigisaqarfigivaat. Tasiilami pinngortitaq inunnillu naapitsineq eqqaamasaqarfigilluarpaat aamma Apusiaajimmi iigartartumi sermersuup qaarusussuanut angalaneq pingaarnertut misigineqarpoq.

”Inuunerma sivisunerpaartaani Nunatsinni najugaqarpunga sermersuullu qaarusussuaniinnikuunngisaannarlunga, taamaattumik Apusiaajimmut Ice Cave-imut angalanerput misigisaqarfiungaatsiarpoq,” Nuka Elisassen-Kristensen oqarpoq.

Suliffimmik misiliisut pingasut misiliinerminni takornariaqarnerup aamma takornariaqartarfimmik ineriartortitsinerup iluini suleriaqqinnissaminnut soqutiginnilersitsipput.