---
title: "Sillimaniarneq illersornissarlu pillugit isumaqatigiissut nutaaq Ittoqqortoormiinut sunniuteqarsinnaavoq"
description: "Sillimaniarneq illersornissarlu pillugit Kalaallit Nunaata, Danmarkip USA-llu akornanni isumaqatigiissut nutaaq Tunup avannaani suliassaqarnerulerneranik kinguneqarsinnaavoq aamma Ittoqqortoormiini eqqaanilu ineriartornermut sunniuteqarsinnaavoq."
date: "2026-09-23"
created: "2026-09-23"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Sillimaniarneq illersornissarlu pillugit isumaqatigiissut nutaaq Ittoqqortoormiinut sunniuteqarsinnaavoq](https://sermersooq.gl/kommuneqarfik-sermersooq-pillugu/nutaarsiassat-2/sillimaniarneq-illersornissarlu-pillugit-isumaqatigiissut-nutaaq-ittoqqortoormiinut-sunniuteqarsinnaavoq)

# Sillimaniarneq illersornissarlu pillugit isumaqatigiissut nutaaq Ittoqqortoormiinut sunniuteqarsinnaavoq

Sillimaniarneq illersornissarlu pillugit Kalaallit Nunaata, Danmarkip USA-llu akornanni isumaqatigiissut nutaaq Tunup avannaani suliassaqarnerulerneranik kinguneqarsinnaavoq aamma Ittoqqortoormiini eqqaanilu ineriartornermut sunniuteqarsinnaavoq.

Isumaqatigiissummi allassimavoq, Mestersvig sakkutooqarnermik immikkoortut annertunerulersitsiffigineqartut ilagissagaat. Mestersvig Tunup avannaani Nunami Allanngutsaaliukkami inissisimavoq taamaalilluni Kommuneqarfik Sermersuumut ilaanani.

Mestersvig kommunip killingata avataaniikkaluartoq Tunup avannaani suliassaqarnerulerneq Ittoqqortoormiinut sunniuteqarsinnaasoq Kommuneqarfik Sermersuumit naatsorsuutigineqarpoq.

– Mestersvig Kommuneqarfik Sermersuumut ilaanngilaq kisianni Ittoqqortoormiit illoqarfinni qaninnerpaavoq taamaattumik ineriartorneq qanittumik malinnaaffigeqqissaarparput. Immikkoortumi suliaqarnerulertoqarpat assigiinngitsutigut Ittoqqortoormiini malugineqarsinnaanissaa aaamma naatsorsuutigaarput. Minnerunngitsumik ullutsinnut naleqquttumik patajaatsumillu attaveqaasersuutinik pisariaqartitsinermut atuuppoq, Borgmesteri Avaaraq Olsen oqarpoq.

**Mittarfik nutaaq isumaqatigiissutaareerpoq**

Ittoqqortoormiini attaveqaasersuutit annertuumik aningaasaliiffigineqarnissaannut aalajangiisoqareernera peqatigalugu ineriartorneq pissaaq.

Ittoqqortoormiit ukiuni 100-nngortorsiorneranut atatillugu Ittoqqortoormiini mittarfimmik nutaamik pilersitsisoqassasoq tamanut saqqummiunneqarpoq. Naalakkersuisut aamma danskit naalakkersuisa akornanni tunngaviusumik isumaqatigiissuteqartoqareerpoq, tassani illoqarfimmi mittarfik nutaaq ilaavoq.

Mittarfiup nutaap Nerlerit Inaani, Konstabel Pyntimik aamma ilisimaneqartumi, massakkut mittarfiusoq taarsissavaa. Ullumikkut Nerlerit Inaat Ittoqqortoormiinut pingaarnertut timmisartuussinermi atassutaavoq, tassanngaanniit illoqarfimmut qulimiguulimmik ingerlaqqittoqartarluni.

– Mittarfik pillugu isumaqatigiissuteqartoqareernera erseqqissassallugu pingaaruteqarpoq. Naalakkersuisunit piviusunngortitsinissaq sulissutigineqarpoq naak aalajangersimasumik suli piffissalerneqanngikkaluartoq. Sillimaniarneq illersornissarlu pillugit isumaqatigiissut nutaaq peqatigalugu tamanna isumaqassaaq Kalaallit Nunaanni immikkoortumi tassani ukiuni tulliuttuni malunniutilimmik suliaqartoqassasoq naatsorsuutigissagipput, Avaaraq Olsen oqarpoq.

**Aningaasaliinerit najukkami inuiaqatigiinnut aamma iluaqutaassapput**

Kommuneqarfik Sermersuumut pingaaruteqarpoq, sillimaniarnermut, illersornissamut attaveqaasersuutinullu aningaasaliissutit najukkami inuiaqatigiinni aamma ataavartumik naleqalersitsinissaat.

Mittarfik nutaaq Ittoqqortoormiinut tikikkuminarnerulersitsissaaq aamma innuttaasunut, inuussutissarsiortunut aamma siunissami illoqarfimmik ineriartortitsinissamut nutaanik periarfissaqalersitsissaaq.

– Ittoqqortoormiit ukiorpassuarni attaveqaasersuutitigut immikkut ittunik unammilligassaqarpoq. Taamaattumik mittarfik pillugu isumaqatigiissutaareersup piviusunngortinneqarnissaa qilanaaraara. Tunup avannaani suliaqarneruneq najukkami inuiaqatigiinnut iluaqutaasinnaasumik attaveqaasersuutinik pitsaanerulersitseqataasinnaappat periarfissaqalersitsisinnaallunilu Ittoqqortoormiinut pitsaasuussaaq, Avaaraq Olsen oqarpoq.