---
title: "Pinngortitaq Tasiilami meeqqanut ilaqutariinnullu ilinniarnermut nutaatut atorneqalertoq"
description: "Tasiilami atuarfimmi atuaqatigiiaat maanna ilinniarnerminnut atuarfimmiittarnerminnullu ilaatigut pinngortitaq, timi, kulturi ataatsimuussuserlu qanoq ilaatinneqarsinnaasut immikkut misigisaqarfigisalissavaat."
date: "2026-09-14"
created: "2026-09-14"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Pinngortitaq Tasiilami meeqqanut ilaqutariinnullu ilinniarnermut nutaatut atorneqalertoq](https://sermersooq.gl/kommuneqarfik-sermersooq-pillugu/nutaarsiassat-2/pinngortitaq-tasiilami-meeqqanut-ilaqutariinnullu-ilinniarnermut-nutaatut-atorneqalertoq)

# Pinngortitaq Tasiilami meeqqanut ilaqutariinnullu ilinniarnermut nutaatut atorneqalertoq

![](https://sermersooq.gl/i/MOLIRIMEDIA/50a4eb3e-b2c2-4d29-945d-605f140efc08?width=800)

            Assi: Søren Skov

Tasiilami atuarfimmi atuaqatigiiaat maanna ilinniarnerminnut atuarfimmiittarnerminnullu ilaatigut pinngortitaq, timi, kulturi ataatsimuussuserlu qanoq ilaatinneqarsinnaasut immikkut misigisaqarfigisalissavaat.

##### **Tasiilami nutaamik misileraatitut suliaqarneq**

Tasiilami nutaamik misileraatitut suliaqarnissamut Folketingip Kalaallit Nunaannut Ataatsimiititaliaaniit ukiunut marlunnut agguataagassat 3 mio. koruunit Kommuneqarfik Sermersuumit tiguneqarput. Sustainable Now, kattuffittut iluanaarniuteqanngitsutut suliniartoq aamma ”Tasiilami suleqatigiippugut” pillugu suliniuteqartuusoq suleqatigalugu suliniut ingerlanneqassaaq. Pilersaarut The Polar Academy Greenlandimik taaneqarpoq, atuarfimmilu angajullerni atuaqatigiiaat silamiinnerminni, timi atorlugu sammisaqarnerminni pinngortitamilu atuartitaanerminni ukioq kaajallallugu ilinniarnissamut ineriartornissamullu periarfissaqartinneqassapput.

##### **Skotlandimiit isumassarsiorneq aamma inuunermi sapiissuseqarnermik ukkatarinninneq**

Pilersaarummi The Polar Academy, Skotlandimiut ikiuiniaqatigiiffiat isumassarsiorfigineqarpoq, taakku inuusuttunut imminnut naleqartippianngitsunut tapersersuisuusarput timi atorlugu sungiusarnikkut, silamiittarnikkut, issittumi paasisassarsiornikkut aamma inersimasut tapersersuiuarnerisigut. Tasiilami misileraatitut sulineq Skotlandimi kattuffimmik qanimut suleqateqarnermik tunngaveqarpoq, taakku paasisanik, misilittakkanik aamma pilersaarutip siuarsaaviginissaanut siunersiueqatiginninnermik tapersiisarput.

Inuusuttut inuunermi attassinnaasaannik misilittagaqalernissaat aamma piginnaasaqalernissaat anguniarlugu ilinniartitsilluni ingerlatsinissamik pilersitsinissaq siunertaavoq. Ilinniartitsinerup imminnut tatiginerat nukittorsassavaa, eqqarsartaatsikkut tatitussusaat, akisussaassuseqarnermik misiginerat aamma nammineq piginnaasamik upperinissaat, taamaalillutik pitsaanerusumik periarfissaqalissapput inuttut ajornartorsiutigisaminnut iliuusissaqalernermik aamma siunissartik nammineq upperinerulerlugu. Tamanna Tasiilami eqqaaneqarpoq inuunermi sapiissuseqarluni nukittunerulersitsinermik.

Tasiilap eqqaani pinngortitaq kusanarluinnartoq ilinniarfittut atorluarneqassaaq. Pinngortitami sammisaqarnerni aamma unammillernartitaqarnerni atuartut sapinngisaminnit piginnaaneqarnerullutik misiginissaanut periarfissaqassapput. Tamatuma peqatigisaanik ataatsimoornernut peqataanissamik pissutsillu ilungersunartut iliuuseqarfiginissaannut sakkussarsissapput.

##### **Ataatsimoorussamik aallartilluarneq**

Pilersaarut aallartilluareerpoq. Atuarfimmi ilinniartitsisut marluk suliniummut ilaatinneqarput aamma ukiup qanoq ilinerinut tamanut pinngortitami silamiinnissaq ilinniarnissarlu immikkut qitiutillugit immikkut sulisussamik atorfinitsitsisoqassaaq. Ilinniartitsisut misilittagaqarluarput meeqqat atugarissaarnerinut, peqataatinneqarnerannut aamma ilikkagassatut periarfissaqarnerannik nukittorsaanissamut.

*“ Ataatsimoornermut uunga nuannersumut qilanaarpugut, meeqqat tapersersussavagut aamma siunissami takorluugaannut ingiaqatigissavagut. Atuaqatigiiaat naapeqqaarneranni kiinnat qungujulasut takullugit nuannerput, alapernaapput aperalutillu qajartorsinnaanerlutik, nalullutik aamma aalisarsinnaanerlutik niviugattalimmik aappaagu upernaakkut Skotlandiliarutta. Tasiilattaaq timaani pinngortitamiinnissaq pillugu eqqarsaasersorneq assut qiimmatsaatigineqarpoq. Ataatsimoorluarnermik aallartilluarneq. Assigiinngitsut akornitsinni suleqatigiilluarnissatsinnut qilanaarpugut,”* taama oqarpoq Anna Uzelac Nørgaard, atuarfiup pisortaa pilersaarummi peqataasoq.

##### **Ingerlanneqartumi angajoqqaat peqataatinneqassapput**

Angajoqqaat pingaarutilittut ingerlatami aamma ilaatinneqassapput. Angajoqqaat allat naapinnissaannut, misilittakkanik avitseqateqarnissamut aamma imminnut tapersersoqatigiinnissamut periarfissaqassapput. Peqatigitillugu taakku Tasiilap eqqaani pinngortitaq qanoq ilinniarnermut, atugarissaarnermut aamma inuunermut sapiissuseqalernissamut atorneqarnerunissaanut ilisimasanik nutaanik pilersitseqataasinnaapput.

Taamaalilluni allannguutit meeqqamiit ilaquttanut siammarsinnaapput aamma ataatsimoorfinnut nutaanut ingerlaqqissinnaallutik. Angorusutaq tassaavoq, misilittakkat siunissami ungasinnerusumi Tasiilami meeqqanut, inuusuttuaqqanut ilaqutariinnullu amerlanerusunut iluaqutaajumaarneri.

![](https://sermersooq.gl/i/MOLIRIMEDIA/7adca1ec-7d20-4bf3-988b-24f1f413dc22?width=800)Assit: Søren Skov

![](https://sermersooq.gl/i/MOLIRIMEDIA/3a96d840-d1ba-4d8c-b782-739169bdc6fc?width=800)