---
title: "Paamiuni Street View kommunip nutartilerpaa"
description: "Kommuneqarfik Sermersuumi Sanarfinermut Avatangiisinullu Ingerlatsivik Paamiut aqqusernginik aqqusineeraanillu 360 gradinik kaajallassinnaasumik assiliivilerluni assilisaareqqammerpoq. Assit Googlemut nassiunneqarput, taakkulu Paamiuni illoqarfiup Street"
date: "2026-10-21"
created: "2026-10-21"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Paamiuni Street View kommunip nutartilerpaa](https://sermersooq.gl/kommuneqarfik-sermersooq-pillugu/nutaarsiassat-2/paamiuni-street-view-kommunip-nutartilerpaa)

# Paamiuni Street View kommunip nutartilerpaa

Kommuneqarfik Sermersuumi Sanarfinermut Avatangiisinullu Ingerlatsivik Paamiut aqqusernginik aqqusineeraanillu 360 gradinik kaajallassinnaasumik assiliivilerluni assilisaareqqammerpoq. Assit Googlemut nassiunneqarput, taakkulu Paamiuni illoqarfiup Street Viewiata nutarterneqarnissaanut atorneqassapput.

![](https://sermersooq.gl/i/MOLIRIMEDIA/1775346e-4345-4b88-85cf-08d99bb35325?width=800)

            Assit: Screenshot, Google Maps

Paamiuni Google Street Viewikkut assit qangali nutaanngilipput. Sanarfinermut Avatangiisinullu Ingerlatsivimmi sulisut kommunimi aqqusinernik assiliisaqattaarpoq, taakkulu assit kommunip nammineq atugassarai. Paamiut juulimi tikinneqarpoq. Kommunip assit Googlemut ingerlateqqippai, taakku Paamiuni Google Mapsip Street Viewiani assinik nutarterinermut atorneqarsinnaaniassamata.

Kommuni aqqusinitta assinginik nunaminertanut tungatillugu sulianut atugassanik assilisaarivoq. Assit atorlugit sullissisut sumiiffik, illut, aqquserngit sinaakkutai, aqqusinerni qulliit allallu namminneq ornigutinngikkaluarlutik maannakkut qanoq isikkoqarneri takusinnaavaat.

**Asiaq nunatsinni tamarmi taama periuseqarniarpoq**

Kommuneqarfik Sermersuumi aqqusinernik aqqusineeqqanillu assiliilluni misilittagarineqartut Asiap soqutigilerpai, taanna suliffeqarfik tassaavoq nunatsinni ilaatigut nunap sannaanik paasissutissat pillugit, nunap assiliormi uuttortaanermilu siunnersuisarfik. Asiaq maannamut Uummannami assilisanik Street Viewimi atugassanik assiliisimalerpoq, taakkulu saqqummiunneqaliivipput. Asiaq siunissami Street Viewimut atugassanik suliaqartassaaq, nunatsinnilu inoqarfinni assit nutarterneqartarnissaanni assiliisassalluni.

**Inuttut namminiussuseqarnissamik illersuineq**

Assit Google Street Viewikkut saqqummiunneqannginneranni kiinnat nummerpladellu Googlep ersernerlulertissavai. Atuisoq assinik ersernerlulersitanik akunnakusoortitsissaguni assit suli ersernerlunnerulertinnissaat Googlemut kissaatigisinnaavaa. Taama iliorniaraanni Street Viewimi toorneeqqat pingasut toorneqassapput, taavalu ’Rapportér et problem’ toqqarlugu. Taamaalioreernermi assip suatungaa allanngortinneqassanersoq pillugu ilitsersuut malinneqassaaq.