---
title: "Nuummi Oqallittarfimmit siunissami sulisinnaasut ukkatarineqarput"
description: "Inuussutissarsiortut aamma kommune qanoq ilillutik ataatsimoorlutik Nuummi sulisinnaasunik pissarsiniassappat, attassissappat aamma ineriartortitsissappat? Taakkuupput Nuummi Oqallittarfiup sisamanngorneq oktobarip 29-anni Hotel Hans Egedemi naapinnerminn"
date: "2026-10-19"
created: "2026-10-19"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Nuummi Oqallittarfimmit siunissami sulisinnaasut ukkatarineqarput](https://sermersooq.gl/kommuneqarfik-sermersooq-pillugu/nutaarsiassat-2/nuummi-oqallittarfimmit-siunissami-sulisinnaasut-ukkatarineqarput)

# Nuummi Oqallittarfimmit siunissami sulisinnaasut ukkatarineqarput

*Inuussutissarsiortut aamma kommune qanoq ilillutik ataatsimoorlutik Nuummi sulisinnaasunik pissarsiniassappat, attassissappat aamma ineriartortitsissappat? Taakkuupput Nuummi Oqallittarfiup sisamanngorneq oktobarip 29-anni Hotel Hans Egedemi naapinnerminni oqallisigisassaat. Nuummi inuussutissarsiortut peqataanissaminnut tikilluaqqusaapput.*

Sulisussaaleqineq Nuummi inuussutissarsiortut unammilligassaasa annerpaartaraat. Suliffissaaleqisut amerlanngillat, suliffeqarfippassui sulisunik amigaateqarput aamma amerligaluttuinnartut nunanit allanit sulisussarsisarput. Saniatigut inuusuttorpaalussuit ilinniagaqarsimanngillat suliffeqarnatillu. Unammilligassat ilisimaneqarluarput taamaattumillu ataatsimiinnermi ajornartorsiutip eqqartoqqinneqarnissaa pineqanngilaq, ataatsimoorlunili suliffeqarfiit, kommune aamma ilinniarfiit aalajangersimasumik qanoq iliuuseqarsinnaanersut paasiniarneqassaaq .

**Saqqummiussineq aamma sassartitat oqallinnerat.** Borgmesteri Avaaraq Olsen tikilluaqqusisuussaaq. Tulliatut Bo Eriksen, Nuummi Sulisitsisut siulittaasuat, inuussutissarsiortut unammilligassamut isiginnittaasiannik saqqummiissaaq, kommunimi suliffissaqartitsivimmit killiffik aamma suliniutit pillugit oqaluttuartoqassaaq kiisalu Torben M. Andersen, Kalaallit Nunaanni Aningaasaqarnermut Siunnersuisooqatigiit siulittaasuat inuit amerlassutsimikkut katitigaanerat aamma sulisinnaasut amerlassusiat pillugit nassuiaateqassaaq. Ullup-qeqqata siorna sassartitat oqallinnerannik naggaserneqassaaq matumani kommune qanoq iliuuseqassanersoq kommunalbestyrelsimi ilaasortanit oqaluttuarineqassaaq aamma alloriarnissamut tulliuttumut suut iliuuserineqassanersut eqikkarneqassapput. Kingorna ullup-qeqqasiortoqassaaq aamma attaveqaqatigiinnerit pissapput.

**Nuummi Oqallittarfik suua?** Nuummi oqallittarfik tassaavoq Kommuneqarfik Sermersuup aamma Nuummi inuussutissarsiortut oqaloqatigiittarfiat. Ataatsimoorluni ataatsimiinnerit saniatigut Nuummi Oqallittarfimmi eqimattani suleqatigiinni sammisanik aalajangersimasunik suliaqartoqartarpoq, taakkunani inuussutissarsiortut aamma kommune ataatsimoorlutik sammisanik ingerlatsisarput, soorlu nunaminertat inuussutissarsiorfiusut aamma sanaartornermut suliaqarnerit, takornariaqarneq soorluttaaq atuarfiit inuussutissarsiortullu suleqatigiinnerat. Ingerlatsiviit peqataasut amerliartortillugit inuussutissarsiortut nipaat nukittunerujartussaaq.

**Peqataaniarluni nalunaarneq:** Ulloq oktobarip 29-at peqataarusuppit imaluunniit siunissami Nuummi Oqallittarfimmut ilanngukkusuppit, taava una allaffigissavat inuva@inuva.gl.

Piffissaq: Sisamanngorneq oktobarip 29-at 2026 nal. 08.45, nal 12.00 miss. ullup-qeqqasiorneq ilanngullugu
 Sumiiffik: Hotel Hans Egede, Nuuk

        ![](https://sermersooq.gl/i/MOLIRIMEDIA/183037ed-18cc-4a96-930c-909325f61ebf?width=800)