---
title: "Nunaqarfinni Aqutsisut isumasioqatigiinnerat iluatsilluartoq"
description: "Kommuneqarfik Sermersuumi Nunaqarfinni Aqutsisut kangianit kitaaniillu Nuummi ulluni marlunni tallimanngorneq 23. oktobari 2026 aamma ataasinngorneq 26. oktobari 2026 isumasioqatigiimmata qulequtaq pingaarnertut sammineqarpoq akisussaaffimmik siammarterineq.Misilittakkat aamma sumiiffinni aalajangeeqataanerulernissamut periarfissat oqaluuserineqarput."
date: "2026-10-28"
created: "2026-10-28"
---
[Hjem](https://sermersooq.gl/)
[Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)
[Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)
[Nunaqarfinni Aqutsisut isumasioqatigiinnerat iluatsilluartoq](https://sermersooq.gl/kommuneqarfik-sermersooq-pillugu/nutaarsiassat-2/nunaqarfinni-aqutsisut-isumasioqatigiinnerat-iluatsilluartoq)
# Nunaqarfinni Aqutsisut isumasioqatigiinnerat iluatsilluartoq
Kommuneqarfik Sermersuumi Nunaqarfinni Aqutsisut kangianit kitaaniillu Nuummi ulluni marlunni tallimanngorneq 23. oktobari 2026 aamma ataasinngorneq 26. oktobari 2026 isumasioqatigiimmata qulequtaq pingaarnertut sammineqarpoq akisussaaffimmik siammarterineq.Misilittakkat aamma sumiiffinni aalajangeeqataanerulernissamut periarfissat oqaluuserineqarput.
Isumasioqatigiinnermi avitseqatigiinneq pingaarnertut ingerlanneqarpoq. Nunaqarfinnilu Aqutsisut isumaat tusarniaavigalugit oqallinnerillu ingerlanneqarlutik.
ㅤ
.| 
-Ingvar Motzfeldt, Nunaqarfinni aqutsisut siulittaasuat Kapisillit, Qeqertarsuatsiaat. | | *“Siornatigut isumasioqatigiinnerni immersorneqaannartaratta, maanna isumasioqatigiinnitsinni immersueqataanerput iluarisimaaqaara. Avitseqatigiinnerput pitsaasuuvoq, kangiani kitaanilu atukkagut pillugit immitsinnut apeqqarissaarfigalutalu oqallilluarpugut. Ersarissumik oqariartuutigivarput sumiiffitsinni suliat killiffii pillugit qanimut tusarlerneqartarnissarput akineqartarnissarpullu. Akisussaaffilerneqarluta immersueqataalernerput Nunaqarfimmi Aqutsisutut neriuuteqarluarnarpoq tigussaanerusumik ingerlatsinerulernissatsinnik.”* **** |
| --- | --- | --- |
Isumasioqatigiinnermi akisussaaffinnik agguaaneq, kommunip ingerlatsinerani suleqatigiinneq kiisalu Nunaqarfinni Aqutsisut missingersuusiornermi inissisimanerat sammineqarput. Utoqqaat atugaat, suliffissaqartitsineq aamma isumaginninnermi ikiorsiissutit aamma oqaluuserineqarput.
ㅤ
.| 
-Niels Ole Ûtuaq, Nunaqarfinni aqutsisut siulittaasuat Kulusuk, Tiilerilaaq, Isertoq. | | “Maanna killiffimmi borgmesteritta nunaqarfinnut uummateqarluarluni akisussaaffeqalernerunissarput sulissutigimmagu iluarisimaarpara. Maanna sumiiffigisatsinni akisussaaffeqarnerulernissatta iluaqutaanissaa pitsanngoriaataanissaalu ilimagigaluttuinnarpara. Akisussaaffilerneqarnerunerput isumasioqatigiinnermilu isummat nutaat pilertut nuannaarutigivakka. ” |
| --- | --- | --- |
#### **Akisussaaffiit erseqqarinnerusut**
Nunaqarfinni aqutsisut sumiiffinni akisussaaffeqataanerulernissamut sunik kissaateqarnertik saqqummiuppaat. Aamma akisussaaffiit pillugit isumaqatigiissutit erseqqinnerusut, suliassat pillugit erseqqissaaneq malinnaanerlu oqaluuserineqarput.
ㅤ
.| 
- Peter Nathanielsen Nunaqarfinni Aqutsisut siulittaasuat, Kuummiit, Sermiligaaq. | | “Aatsaat taamak akuutitaanerulernerput misigalugulu pissarsiaqaatigeqaara. Ulluinnarni nunaqarfinni ingerlatsisut qanimut suleqatiginerulerneri iluaqutaassaqaaq neriuuteqarluarnaqaarlu. Soorlu suliassat assigiinngitsut ilaatigut uninngaannartut piaarnerusumik, piaartumik suliarineqartalernissaat anguniarparput. Taamatut kommunip alloriarnera uannut kajuminnaqaaq tulluusimaarnaqaarlu." |
| --- | --- | --- |
Inoqarfinni inukinnerusuni naleqquttumik aqutsilernissaq aamma neriuuteqarfigilluarneqarpoq.
ㅤ
.| 
- Niels Peter Mikaelsen Nunaqarfinni aqutsisut siulittaasuat Arsuk. | | “Kommunerujussuanngorattali sanaartugassanik pilersitsinissaq, aserfallatsaaliinerit allallu suliassat sumiiffigisatsinni uninngapput. Maanna periutsit allanngornerat uatsinnut pitsaassaqaaq. Qanimut Paamiuni atorfilittat ataatsimeeqatigisalissavagut, neriuutigivarpullu timitaliisoqarluartalernissaa”. |
| --- | --- | --- |
#### **Akisussaaffinnik siammarterinerunissaq**
Isumasioqatigiinnermi Nunaqarfinni Aqutsisut kissaataat, suliassanik qanoq malinnaarusunnerat aamma akisussaaffiit suut tigorusunneraat sukumiisumik oqaluuserineqarput.
Kommunerujussuit atuutilernerani nunaqarfinni illoqarfinni avinngarusimanerusuni oqartussaaqataaneq katassimasoq innuttaasut sumiiffigisamilu qinikkat misigisimavaat. Taamaammat Kommuneqarfik Sermersuumi akisussaaffinnik siammarterinerunissaq siunniunneqarsimavoq.
ㅤ
.| 
- Avaaraq Olsen, Kommuneqarfik Sermersuumi borgmesteri. | | “Soorlu siornatigut Nunaqarfinni Aqutsisut kommunimi suliassaqarfinnut assigiinngitsunut qanimut oqaloqatiginnissinnaanerat periarfissaasimanngitsoq. Tamanna suliniutitta aallartinnerata kingorna iluatsilluartut ilaattut taasinnaavara. Uani isumasioqatigiinnermi killiffimmik nalilersueqatigiinnitsinni Nunaqarfinni Aqutsisut kissaataat, suliassanik malinnaarusunnerat, akisussaaffiit suut paarerusunneraat paasisaqarfigivagut. Ersarissivorlu piffinniit piffinnut killiffiit assigiinngitsut. Alloriaqqinnissatsinnut nalimmassaassaagut. Isumasioqatigiinneq tamatsinnut pissarsiaqarfiulluartumut qujavunga. Qilanaarpungalu suliassanut tulliuttunut.” | |
| --- | --- | --- | --- |
**Isumasioqatigiinnermi assit:**
