---
title: "Nerisassanik misigisaqarnerit Tasiilami takornariaqarnermik pitsanngorsaataassapput"
description: "Workshoppertitsineq, nerisassiornermik unammisitsineq aamma inuusuttunik nerisassioqateqarneq Tasiilami najukkami nioqqutissanik nerisassanillu misigisaqarnermik ukkatarinnilersitsipput. Sammisassaqartitsinerit Kommuneqarfik Sermersuumit suliniummut ”Food"
date: "2026-11-11"
created: "2026-11-11"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Nerisassanik misigisaqarnerit Tasiilami takornariaqarnermik pitsanngorsaataassapput](https://sermersooq.gl/kommuneqarfik-sermersooq-pillugu/nutaarsiassat-2/nerisassanik-misigisaqarnerit-tasiilami-takornariaqarnermik-pitsanngorsaataassapput)

# Nerisassanik misigisaqarnerit Tasiilami takornariaqarnermik pitsanngorsaataassapput

Workshoppertitsineq, nerisassiornermik unammisitsineq aamma inuusuttunik nerisassioqateqarneq Tasiilami najukkami nioqqutissanik nerisassanillu misigisaqarnermik ukkatarinnilersitsipput. Sammisassaqartitsinerit Kommuneqarfik Sermersuumit suliniummut ”Food in Tourism” ilaapput, taakku Tunumi nerisassanik misigisaqarnerup aamma takornariaqarnerup ingerlaqatigiinnerinik pitsanngorsaataassapput.

![](https://sermersooq.gl/i/MOLIRIMEDIA/429c7bd1-aaa8-4db2-af83-84e524f33a0b?width=800)

**Workshoppertitsinermi najukkami nioqqutissat atorneqarput**

Suliniut oktobarip ingerlanerani ingerlanneqarpoq, kommunip inuussutissarsiornermut immikkoortortaanit aallartinneqarluni aamma sumiiffimmi najukkami nioqqutissanik aallaaveqarluni. Suliniummi takornarianut misigisaqartitsinermi najukkami nioqqutissat qanoq pingaarutilittut atorneqarsinnaanerinik takutinniarneqarpoq, taakkua najukkami pinngortitamut kulturimullu tikeraartunit alakkarneqartartunut atassuteqarluarmata.

Suliniutip ilaatut ulluni sisamani Inunnguaq Hegelund Arctic Food By I-imeersumit workshoppertitsisoqarpoq. Workshoppertitsinermi Inunnguaq nerisassiornermi najoqqutassanik 16-inik immikkuullarissunik nassataqarpoq – qilaluaminermik tarajortikkamit nannup neqaanik sliderinut. Workshoppertitsinerup naammassineqarnerani peqataasut alakkaasunut nerisassat pillugit aamma nioqqutissat atorneqartut pillugit oqaluttuarnikkut suliaminnik saqqummiipput. Alakkaasullu nerisassat assigiinngitsut aamma ussersinnaavaat.

**Unammisitsinermi periarfissat nutaat takutinneqarput**

Najukkami nioqqutissanik ukkatarinninneq aamma Tasiilami kantinemi nerisassiornermik unammisitsinermik kinguneqarpoq. Peqataasut tallimat nerisassiornermi unammipput, Inunnguaq Hegelund aamma najukkami naliliisartut pingasut naliliisuullutik. Kommuneqarfik Sermersooq suliniummik aallartitsisuuvoq aamma unammisitsinermut pingaarnertut aningaasaliisuulluni, najukkamilu suliffeqarfinnit aamma tapiiffigineqarluni. Pilersuisoq Starkilu pinnatassanik tunniussaqarput.

”Najukkami nioqqutissat takornariaqarnermi atorneqarnerulernissaat periarfissaqarluarpoq. Nerisassanik misigisassaqartitsinerit Tasiilami misigisassanik neqerooruteqarnermik tamatigoornerulersitsipput aamma najukkami suliffeqarfiit tikeraanut neqerooruteqarnerminnik ineriartortitsinissaannut nutaanik periarfissaqalersitsipput,” Inuussutissarsiornermut immikkoortortami siunnersortaaneq Susanne Bisgaard Rasmussen oqarpoq.

**Inuusuttut siunissami ilusileeqataassapput**

Suliniummi inaarutaasutut Kommuneqarfik Sermersuumi Tasiilami sulisoq Anna Burdenski aaqqissuivoq, tassani Inunnguaq Hegelund inuusuttut peqatigalugit kommunip inuusuttunut illuutaani Igdlomi aamma innuttaasunik tapersersortarialinnik suliffeqartitsisoq Siu-Tsiumi nerisassiorput. Royal Greenland saarullinnik nutaarsuarnik tunniussisuuvoq taamaalillutik inuusuttut ilaatigut saarullinnik uullianik, saarulliup niaquanik kissarsuutikkoorinermik, saarulliit amiinik chipsiliornermik kiisalu nammineq sanaamik mayonnaiseliornermik misiliipput. Tassunga ilanngullugu suliassaqarfiup iluani ilinniarfissatut periarfissanik saqqummiivigineqarput, matumani igasunngorniarneq ilanngullugu.

”Najukkami nioqqutissat assigiinngitsorpassuarnik atorneqarsinnaanerinik takutitsinissaq pingaaruteqarpoq aamma nerisassanik misigisaqartitsinernik pissanganartunik pilersitseqataasinnaapput. Peqatigitillugu suleqatigiinneq Tasiilami periarfissanik nutaanik pilersitsiviusinnaasunik najukkami suliniutit inuillu ataatsimoorussinissaannut periarfissiivoq,” kommunimi Tunumi takorniariaqarnermik ataqatigiissaarisoq, Anna Burdenski, suliniummut Food in Tourismimut ilaasoq oqarpoq.

Inunnguaq Hegelundimut Arctic Food By I tunniusimangaarneranut aamma assigineqanngitsumik nioqqutissanik, nerisassanik nerisassanillu misigisaqartitsinermik ilisimasaqarneranut qutsavigingaarparput.

*Workshoppertitsinermit n* *erisassiornermillu unammisitsinermit* *assit:*

![](https://sermersooq.gl/i/MOLIRIMEDIA/3d7f7227-87b1-4b19-85b9-c30a3319bdfb?width=800)

![](https://sermersooq.gl/i/MOLIRIMEDIA/d0060461-92c3-4660-8447-8cc2131f5eb1?width=800)

![](https://sermersooq.gl/i/MOLIRIMEDIA/b44c6c2f-fa33-4f11-8181-09cd91270392?width=800)

![](https://sermersooq.gl/i/MOLIRIMEDIA/d3f673fb-736e-415c-9c17-d359ce155010?width=800)

![](https://sermersooq.gl/i/MOLIRIMEDIA/7076613d-c6ad-4e12-bb4d-6fc05175e9c1?width=800)

![](https://sermersooq.gl/i/MOLIRIMEDIA/46bc8ae4-99b0-4375-804c-e43a7edee81c?width=800)

![](https://sermersooq.gl/i/MOLIRIMEDIA/0230ff70-b965-4f67-a924-f91e8b17f3b5?width=800)

![](https://sermersooq.gl/i/MOLIRIMEDIA/486326e1-f223-4430-a676-58ca2218fa3a?width=800)

![](https://sermersooq.gl/i/MOLIRIMEDIA/5800b80b-e018-424f-9ad2-7aeeba66da7e?width=800)

![](https://sermersooq.gl/i/MOLIRIMEDIA/4a176181-28f1-4b07-b2e4-8c57d1e58fff?width=800)

![](https://sermersooq.gl/i/MOLIRIMEDIA/6d8c8deb-a841-4d02-b6ff-af1e8ac59ff8?width=800)