---
title: "Kulturikkut isumassarsiorfik nutaamik atertaarpoq: Allunnguaq."
description: "Kulturikkut isumassarsiorfik massakkut Allunnguamik ateqalerpoq. Aqqa “anersaartorfissaaqqamik” isumaqarpoq, tamannalu meeqqat inuusuttullu ulluinnarni eqqumiitsuliornermi kulturikkullu kiffaanngissuseqarnerannik ersersitsisuussaaq."
date: "2026-09-09"
created: "2026-09-09"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Kulturikkut isumassarsiorfik nutaamik atertaarpoq: Allunnguaq.](https://sermersooq.gl/kommuneqarfik-sermersooq-pillugu/nutaarsiassat-2/kulturikkut-isumassarsiorfik-nutaamik-atertaarpoq-allunnguaq)

# Kulturikkut isumassarsiorfik nutaamik atertaarpoq: Allunnguaq.

![](https://sermersooq.gl/i/MOLIRIMEDIA/94c4cd59-59ad-4217-ab2d-533d2911f205?width=800)

**Kulturikkut isumassarsiorfik massakkut Allunnguamik ateqalerpoq. Aqqa “anersaartorfissaaqqamik” isumaqarpoq, tamannalu meeqqat inuusuttullu ulluinnarni eqqumiitsuliornermi kulturikkullu kiffaanngissuseqarnerannik ersersitsisuussaaq.**

Allunnguaq Kommuneqarfik Sermersuumi ataqatigiissaarneqartumik suliniutaavoq, tamanna najukkami suliffeqarfinniit, atuarfinnut ulluuneranilu paaqqinnittarfinnut eqqumiitsuliornermik kulturikkullu neqeroorutinik katersuiffiuvoq ingerlatitseqqiiffiusartorlu. Siunertaavoq atuarfinni atuartunut meeqqerivinnilu meeqqanut pinngorartitsinermik kulturikkullu atuartitsissutinik neqerooruteqarnissaq — ilutigalugu atuarfimmi pinngorartitsinermik kulturikkullu atuartitsissutit pitsanngorsarnissaat.

Soorluttaaq puisip anersaartornissaminut allu pisariaqartikkaa, Allunnguup meeqqat inuussuttullu ulluinnarni eqqumiitsuliornermik, kultureqarnermik, alapernaannermik sammisaqarnermillu kiffaanngissusilissavai. Suliniutaasup aamma tapersersorpaa atuartitsissutaasartut assigiinngitsut akimorlugit pinngorartitsinermik kulturimillu atuartitsineq.

*“Kulturikkut isumassarsiorfiup aqqa nutaaq, Allunnguaq, nuannaarutigaara. Aqqata ilisarnaatigivaa, ulluinnarni meeqqat inuusuttullu eqqumiitsuliorneq kulturilu aqqutigalugit kiffaanngissuseqarnerat— atuarfimmi aamma ulluunerani paaqqinnittarfinni. Tamaani itinerulaartumik anersaartortoqarsinnaavoq, kiffaanngissuseqarluni iliuuseqartoqarsinnaavoq aamma nammineq allallu piginnaasaannik nutaanik paasisaqarfiusinnaalluni. Allunnguaq aqqutigalugu meeqqat eqqumiitsuliortunik, oqaluttuanik, nipilersukkanik assinillu naapitsinissaminnut periarfissaqarput nunarsuarmut ammaassisunik kulturikkullu kinaassusaannik nukittunerulersitsisunik. Tamaani nammineq oqariartuutaat pinngorartitsisinnaanerallu pimoorunneqartarput, aamma ileqqutoqqat nutaaliornerillu ataqatigiissuseqarneqartarput pinngorartitsineq, pinnguarneq, ilinniarnerlu aqqutigalugit. Qilanaarivakka sammisassat pisussarpassuit,”* Kommuneqarfik Sermersuumi Sammisassaqartitsinermi Kultureqarnermullu Immikkoortortami Meeqqanut Kulturi pillugu ingerlatsisoq, Maria Panínguak' Kjærulff oqarpoq.

Suleqatigineqartut ilaatigut tassaapput Innuttaasut illuat Illorput, Nunatta Isiginnaartitsisarfia, Nunatta Atuagaateqarfia, Nuummi Eqqumiitsulianik Saqqummersitsivik, Nuup Katersugaasivia Nuutoqaq, Nunatta Katersugaasivia Allagaateqarfialu, NUIF aamma Katuaq. Tamatuma saniatigut Allunnguaq sammisamut soqutiginnittunik suleqateqarpoq suliffeqarfinnik, kulturikkut suliaqartunik, eqqumiitsuliortunik ilinniartitsisunillu.

Allunnguaq atuartunut meeqqerivinnilu meeqqanut kulturikkut pinngorartitsinikkullu workshoppertitsinernik neqerooruteqartoqarpoq.

Workshoppit ilinniartitsisunit perorsaasunillu inniminnerneqarsinnaapput ugguuna:

 [www.kulturrygsaekken.gl](https://kulturrygsaekken.gl/ "www.kulturrygsaekken.gl")

“Anersaartorfissaaraq” – isumalerujussuaq.