---
title: "Kittat ukiut 45-nngortorsiorpoq digitalikkullu siammarterissalluni"
description: "Ammerineq, amernik mersorneq kalaallit assassornermik ileqquisa attatiinnarneqarnissaat pillugit ukiut 45-t sulereerluni Kittat siunissamut alloriarpoq. Nittartakkamik nutaamik www.kittat.gl-imik saqqummiussinikkut kalaallit atisaataannik ilisimasat ataat"
date: "2026-11-18"
created: "2026-11-18"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Kittat ukiut 45-nngortorsiorpoq digitalikkullu siammarterissalluni](https://sermersooq.gl/kommuneqarfik-sermersooq-pillugu/nutaarsiassat-2/kittat-ukiut-45-nngortorsiorpoq-digitalikkullu-siammarterissalluni)

# Kittat ukiut 45-nngortorsiorpoq digitalikkullu siammarterissalluni

Ammerineq, amernik mersorneq kalaallit assassornermik ileqquisa attatiinnarneqarnissaat pillugit ukiut 45-t sulereerluni Kittat siunissamut alloriarpoq. Nittartakkamik nutaamik www.kittat.gl-imik saqqummiussinikkut kalaallit atisaataannik ilisimasat ataatsimut katersorneqassapput, avitseqatigiissutigineqarsinnaalersitsisumik kinguaariinnullu tullernut sumiluunniit najugaqaraluaraanni pissarsiarineqarsinnaasunik.

![](https://sermersooq.gl/i/MOLIRIMEDIA/b9768940-6e75-427c-81f5-f7eb276832b2?width=800)

Ulloq 29. november 1981 Kittat Nuummi siullerpaamik ammarpoq. Taamanikkut Kittat arnanut suliffissaqanngitsunut suliffissaqartitsiviusimavoq. Aallaqqaataaniilli ammerineq amernillu kalaallit ileqquat malillugu suliarinninneq Kittat sulinerani qitiusumik inissisimapput.

Ullumikkut, ukiut 45-it qaangiunneranni, Kittat kalaallit sanaluttarnermik ileqquisa attatiinnarneqarnissaannut, ingerlateqqinneqarnissaannut ineriartortinneqarnissaannullu pingaarutilimmik inissisimavoq. Ingammik kalaallit atisaataannik sanaartorneq aamma amernik ileqquusut malillugit suliarinninneq qitiutinneqarput.

Kittat ullumikkut immikkoortortaqarfinnit pingasunit ingerlanneqarpoq: Nuummi Kittat, Kapisilinni Ammiamii aamma Qeqertarsuatsiaani Amitsialak. Ataatsimoorlutik kalaallit mersornermik ammerinermillu ileqquisa attatiinnarneqarnissaat sulissutigaat, kiisalu ileqqut ilisimasat kinguaariinnut tullernut ingerlateqqinneqarnissaat qulakkeerniarlugu sulillutik.

 ****

**Mersornermi ammerinermilu ileqqunit ilisimasanik digitalikkut avitseqatigiinnermut**

Kittat ukiut 45-nngortorsiorneranut atatillugu nittartagaq nutaaq www.kittat.gl saqqummiunneqassaaq.

Nittartagaq digitaliusumik ataatsimoorussamik ingerlatsivinngussaaq, tassani innuttaasut Kittat sullissinerminni periarfissarititai pillugit paasissutissanik pissarsisinnaassapput, kalaallit atisaat pillugit ilisimasanik ujarlerisinnaassallutik aamma kalaallit atisaannik sanaartornermi atortussanik webshop aqqutigalugu pisiniarsinnaalissallutik.

Siunertarineqartoq atortussanik pissarsiniarnerup ajornannginnerulersinnissaa kisiat pinnagu anguniagaq annertuneruvoq. Nittartagaq siunissami kalaallit atisaannik ilisimasanik katersuiffinngortinneqassaaq, tassani kalaallit atisaataasa immikkoortui assigiinngitsut sanariaatsillu sukumiisumik nassuiarneqassapput. Siunissami aamma akeqanngitsunik ilitsersuutinik aalasuliaaqqanik ineriartortitsisoqassaaq, taakkunani kalaallit atisaataasa immikkoortui assigiinngitsut qanoq mersorneqartarnersut takutinneqarumaarluni.

*"Ilisimasavut ataatsimut katersorusuppavut tamanullu pissarsiarineqarsinnaalersillugit. Siunertarput tassaavoq mersornermi ammerinermilu ilisimasat uagut inuunerput qaangiukkaluarpalluunniit ingerlateqqinneqarnissaat – maanna periuserineqartumiit aamma ineriartornissaani,"* taama oqarpoq Aviaq Reimer Olsen, Kittani, Ammiamii-mi Amitsialammilu aqutsisoq.

 ****

**Inuit, eqqaamasat ataatsimoornerlu ukiuni 45-ni**

Kittat ukiut 45-nngortorsiornera soorunami ukiuni taakkunani Kittat oqaluttuarisaaneranut peqataasimasut peqatigalugit nalliuttorsiutigineqassaaq.

Nalliuttorsiorfissatut ullorititaq tassaavoq sapaammi 29. november, kisianni nalliuttorsiorneq **tallimanngornermi 27. november 2026 nal. 13.00–17.00** Nuummi Kittani kaffillernernik aaqqissuussinikkut ingerlanneqassaaq.

Ullormi tassani kaffillertoqassaaq, qitinnermik takutitsisoqassaaq, uaajeernermik aamma qilaatersornermik takutitsisoqassaaq kiisalu nipilersortoqassalluni. Kinguaariit assigiinngitsut naapinnissaannut, eqqaamasanik avitseqatigiinnissamut ukiunilu amerlasuuni ingerlanneqartup assassornerup ataatsimoorluta nalliuttorsiutiginissaanut periarfissaassaaq.

Kaffillernerup ingerlanerani Nuutoqqap Katersugaasivianut iserneq akeqassanngilaq, tassani Kittat suleqatigalugu immikkut saqqummersitaq takuniarneqarsinnaavoq. Saqqummersitami assilisat pisoqqat, apersuinerit aamma filmiliat atorlugit Kittat ukiuni 45-ni oqaluttuarisaanera ineriartorneralu pillugit paasisaqarnerusoqarsinnaavoq.

**Kinguaariinni ingerlateqqinneqartartoq**

Kittat oqaluttuarisaanera amernik, mersornermik kalaallit atisaannillu suliaqarnerinnaanngilaq. Aamma tassaavoq inuit, ataatsimoorneq ilisimasallu kinguaariinnit kinguaariinnut ingerlateqqinneqarsimasut pillugit oqaluttuaq. Ukiut 45-nngortorsiornerup nalaani Kittat ukiut ingerlaneranni pilersitai nalliuttorsiutigineqaannassanngillat, aammali siunissami ineriartortinneqartussanut tunngaviliisoqassaaq.

 ****

**PAASISSUTISSAT PINGAARUTILLIT**

**Kittat ukiut 45-nngortorsiorluni nalliuttorsiornera**

- **Ulloq:** Tallimanngorneq 27. november 2026
- **Piffissaq:** Nal. 13.00 – 17.00
- **Sumi:** Kittat - Hans Egedesvej 29, Nuuk
- **Aaqqissuussaq:** Kaffillerneq, qitinnermik takutitsineq Ululinannguamit ingerlanneqassaaq, nipilersortoq René Brandt, uaajeerneq aamma qilaatersorneq ’Kuka’-mit ingerlanneqassaaq.
- **Kingorna:** Nuutoqaq Katersugaasivimmut nal 13.00 – 17.00 akornanni akeqanngitsumik isertoqarsinnaavoq, Kittat pillugu immikkut saqqummersitsineq takuniarlugu.
- **Nittartagaq nutaaq:** [www.kittat.gl](http://www.kittat.gl/) (novembarip 27-ni atulissaaq)
- **Paasissutissat allat:** kittat@sermersooq.gl oqarasuaat: 366398

[Pisussaq pillugu Facebookimi nassuiaat](https://www.facebook.com/share/19pFFey329/ "Pisussaq pillugu Facebookimi nassuiaat")

**Kikkut tamarmik tikilluaqqusaapput – ileqqut, assassorneq ataatsimoornerlu ukiuni 45-ni ingerlanneqarsimasut pillugit nalliuttorsioqataajartorit!**

![](https://sermersooq.gl/i/MOLIRIMEDIA/defe4743-7a7b-4f0a-a282-5b6e1cd25388?width=800)

![](https://sermersooq.gl/i/MOLIRIMEDIA/78b81417-6f04-445b-8617-7ce1c7bb5a28?width=800)

![](https://sermersooq.gl/i/MOLIRIMEDIA/1bbdc724-af8e-4f59-a134-d955a1665bb2?width=800)

![](https://sermersooq.gl/i/MOLIRIMEDIA/375dfe31-e3d5-497d-8d40-6ccc029134dd?width=800)

![](https://sermersooq.gl/i/MOLIRIMEDIA/3603f35f-d0cf-4fe0-b20c-b1961a2ebdd6?width=800)

![](https://sermersooq.gl/i/MOLIRIMEDIA/2dc17a90-d8ef-4693-9056-51b2fff6b09f?width=800)

![](https://sermersooq.gl/i/MOLIRIMEDIA/02b09f2c-4ecf-47ac-abab-a4dfac16e7c5?width=800)
