---
title: "Inuusuttut Ornittagaat inuussuttunik siornatigut maannakkullu atuisunik katersuutsitsivoq"
description: "Kommuneqarfik Sermersuumi Inuusuttut Ornittagaat septembarimi pilersitsivoq, aasaanerani aaqqissuussinermut sinaakkutaavoq, ullutsinni inuusuttut taamanikkullu inuusuttut peqataanikuusut ulluunerani unnukkullu nipersorlutik nerieqatigiinnertalimmik kateri"
date: "2026-09-28"
created: "2026-09-28"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Inuusuttut Ornittagaat inuussuttunik siornatigut maannakkullu atuisunik katersuutsitsivoq](https://sermersooq.gl/kommuneqarfik-sermersooq-pillugu/nutaarsiassat-2/inuusuttut-ornittagaat-inuussuttunik-siornatigut-maannakkullu-atuisunik-katersuutsitsivoq)

# Inuusuttut Ornittagaat inuussuttunik siornatigut maannakkullu atuisunik katersuutsitsivoq

Kommuneqarfik Sermersuumi Inuusuttut Ornittagaat septembarimi pilersitsivoq, aasaanerani aaqqissuussinermut sinaakkutaavoq, ullutsinni inuusuttut taamanikkullu inuusuttut peqataanikuusut ulluunerani unnukkullu nipersorlutik nerieqatigiinnertalimmik kateripput.

![](https://sermersooq.gl/i/MOLIRIMEDIA/6ffc138d-f272-4df0-a93d-0003c9271f3d?width=800)

Aaqqissuussinermi inuusuit kateripput, tasssani ullumikkut Inuusuttut Ornittagaanni neqeroorutaanik atuisut, inuusuttut efterværnimiittut kiisalu inuusuttut siornatigut Inuusuttut Ornittagaaneersut peqataapput. Siornatigut Inuusuttut Ornittagaaneersut arlallit maanna namminneq ilaquttatik ilagalugit peqataapput.

Aaqqissuussinerup siunertaraa ilaatigut inuusuttut minnerusut siornatigut Inuusuttut Ornittagaannutt attuumassuteqarsimasunik, inuunerminnilu maanna ingerlaqqissimasunik naapitsinissaat taakkununngalu imminut assersuunneqarsinnaanissaat. Peqatigisaanik ulloq attaveqatigiinnernik uummarissaqqinnissamut periarfissiivoq, aammalu erseqqissarlugu inuunermi ingerlaqqikkaluaraanniluunniit Inuusuttut Ornittagaannut attuumassuteqarneq ingerlaannarsinnaasoq.

Inuusuttut Ornittagaata inuusuttunik 10–23-nik ukiulinnik suliaqarpoq, suliniutinillu assigiinngitsunik peqarluni, ilaatigut ornittagaq, inuusuttunut ornigulluni attaveqartarneq aamma pinaveersaartitsineq, efterværn kiisalu Tryghedspatrulje. Suliniutinut tamanut ataatsimoorussaq tassaavoq inuusuttunut toqqissisimanartunik sinaakkusiinissaq aammalu nukittuunik attaveqatigiinnernik pilersitsinissaq.

Indsatsområdimi fagchef Maliina Junge Jørgensenimut inuusuttut siornatigut Inuusuttut Ornittarfigaanniisssimasut ullumikkullu peqataasut naapinnerat ullormi pingaarnerpaat ilagaat:

”Ullormi immikkut pingaaruteqartoq tassaavoq inuusuttut siornatigut Inuusuttut Ornittaanneersunik, namminneq aqqutissaminnik ingerlasimasunik ullumikkullu inuunerminni ingerlaqqissimasunik naapitsinissamut periarfissaqarmata. Inuusuttut inuunermi assingusumik inissisimasimasunut imminut assersuunneqarsinnaagaangata tamanna immikkut pingaaruteqartarpoq. Peqatigisaanik tamanna takutitsivoq inuusuttunut attaveqatigiinnerit pilersinneqartut qanoq pingaaruteqartigisut, taakkulu ilaannut Inuusuttut Ornittagaata neqeroorutaanik toqqaannartumik atuinerup nalaata qaangiunnerata kingorna sivisuumik ingerlaannarsinnaasut.”

Aaqqissuussineq aamma sulisut akornanni eqqarsaatersornissamut tulluusimaaruteqarnissamullu pissutissaqartitsivoq:

”Suliap iluatsilluarnera ataatsimoornerlu nuanneqimmat pissarsiaqarnarmallu ukiumut pilersaarutinut ataatsimoortitsisarnissap ilanngunnissaa siunniupparput. Kiinnat nutaat naaaperiikkallu takullugit nuannersorpassuarnik eqqaasaqarfiullunilu tulluusimaarnermik pilersitsivoq. Inuusuttut Ornittagaanni suliat assigiinngitsut immikkut tamarmik pingaaruteqassusaat naqissuserneqarpoq, ataatsimulli isigalugu attaveqatigiinnerit qanoq pingaartigisut eqqaasinneqaqqippugut.” – Sulisut Bibi, Arnaaluk aamma Kérte, Inuusuttut Ornittagaat

Aasaanerata naalernerani aaqqissuussineq taamaattumik nuannersumik ataatsimoornerinnaanngitsutut isigineqassaaq, aammali inuusuttut maanna peqataasut siornatigullu Inuusuttut Ornittagaanniittarsimasut akornanni ataatsimoornermik nukittorsaanertut aammalu attaveqatigiinnernik Inuusuttut Ornittagaata suliaani qitiulluinnartunik attassiinnarnissamut periarfissatut.