---
title: "Inuussutissarsiuteqarneq Sermersuup siunissaanut ilusileeqataassaaq"
description: "2027-miit Kommuneqarfik Sermersooq nutaamik inuussutissarsiornermut periusissiaqalissaaq, taanna kommunimit inuussutissarsiuteqarnermik ineriartortitsinermik sulineranut siunnerfiliissaaq. Periusissiaq allagaannaanani suliffeqarfinnut, suliffinnut kommuni"
date: "2026-10-23"
created: "2026-10-23"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Inuussutissarsiuteqarneq Sermersuup siunissaanut ilusileeqataassaaq](https://sermersooq.gl/kommuneqarfik-sermersooq-pillugu/nutaarsiassat-2/inuussutissarsiuteqarneq-sermersuup-siunissaanut-ilusileeqataassaaq)

# Inuussutissarsiuteqarneq Sermersuup siunissaanut ilusileeqataassaaq

2027-miit Kommuneqarfik Sermersooq nutaamik inuussutissarsiornermut periusissiaqalissaaq, taanna kommunimit inuussutissarsiuteqarnermik ineriartortitsinermik sulineranut siunnerfiliissaaq. Periusissiaq allagaannaanani suliffeqarfinnut, suliffinnut kommunilu tamakkerlugu ineriartornermut pitsaanerusumik najoqqutassaqalersitsinissamut sakkussaanissaa anguniagaavoq.

Kommuneqarfik Sermersuumi nukissarpassuit periarfissarpassuillu pioreerput. Aalisarneq piniarnerlu, najukkami inuussutissat, kulturi, imarsiornermik inuussutissarsiuteqarneq, pinngortitaq takornariaqarnerlu suli najukkami naleqarnerulersitsiffiusinnaapput. Peqatigitillugu digitalikkut ineriartorneq suliffeqarfinnut aallarnisaasunullu nutaanik periarfissaqalersitsivoq.

Taamaattumik inuussutissarsiornermut periusissiaq nutaaq periarfissanit pioreersunit suli pissarsiffiunerusinnaasoq borgmesteri Avaaraq Olsenimit isigineqarpoq.

– Kommuneqarfik Sermersuumi nukissarpassuaqarpugut, piginnaasarpassuaqarpugut isumassarsiatsialannillu peqarluta. Najukkami naleqarnerulersitsisinnaasunik aamma kommunip Kalaallit Nunaatalu avataanut anngussinnaasunik suliffeqarfinnik, suliffinnik nioqqutissanillu pilersitsinissamut ajornannginnerulersitsisussamik najoqqutassiornissaq suliassaraarput. Inuussutissarsiornermut periusissiaq ilisivimmi allagaannaassanngilaq. Inuussutissarsiuteqartut peqatigalugit ineriartortitsinitsinni malugineqarsinnaassaaq, borgmesteri Avaaraq Olsen oqarpoq.

**Periarfissanut nutaanut kommunimit piareersimasoqarnissaa pisariaqarpoq**

Ukiuni aggersuni inuussutissarsiornermut atugassarititaasut aamma allanngoriartussapput. Mittarfiit atassuteqarfiillu nutaat, nukissiuutinut ataavartunut tunngasutigut ineriartorneq aamma digitalinngortitsineq suli ingerlanneqartoq nutaanik periarfissaqalersitsissapput.

Tamannalu aamma kommunimut piumasaqaateqarfiuvoq. Inuussutissarsiuteqarnermik ineriartortitsinermut eqqortunik najoqqutassiaqassaaq aamma kommunimit siunissami inuussutissarsiornermi piginnaasat sulisullu suut pisariaqartinneqarnersut eqqumaffigineqassapput.

Ineriartorneq Nuummiinnaq pissanngilaq. Kommuneqarfik Sermersooq isorartoorujussuuvoq aamma illoqarfiit nunaqarfiillu ataasiakkaat assigiinngitsunik nukittuffeqarput periarfissaqarlutillu. Taamaattumik periusissiaq nutaaq kommune tamakkerlugu ilippanaataasunit aallaaveqassaaq.

– Nuummi, Paamiuni, Tasiilami, Ittoqqortoormiini aamma nunaqarfitsinni ineriartortitsineq assigiinngissinnaavoq. Taamaattumik najukkami periarfissat aallaavigissavagut. Pigeriikkatsinni qanoq naleqarnerulersitsisinnaanitsinnik aamma aningaasaleerusuttunut, suliffeqarfimmik pilersitserusuttunut imaluunniit suliffeqarfioreersumik ineriartortitserusuttunut qanoq kommunimit tapersiiviginnissinnaanermik takunnillaqqinnerusariaqarpugut.

**Kommune najoqqutassaqalersitsissaaq – inuussutissarsiuteqartut ineriartortitsissapput**

Inuussutissarsiornermut periusissiat ersarissumik tunngaveqarput: Kommunimit suliffeqarfiit pilersinneqassanngillat kisianni inuussutissarsiornerup ineriartortinneqarnissaanut atugassarititaasunik pitsaanerpaanik pilersitsisoqataasoqassaaq.

Tamanna periarfissat aporfiillu pillugit kommunip, inuussutissarsiuteqartut aamma sullissisut allat akornanni oqaloqatigiinnermik pisariaqartitsiffiuvoq.

– Kommunalbestyrelse siunnerfiliisinnaavoq najoqqutassiillunilu kisianni suliffeqarfiit, aallarnisaasut inuillu ullut tamaasa suliassaqarfimminnik isumassarsiaminnillu ineriartortitsisut taakkuupput inuussutissarsiuteqarnermik ineriartortitsisut. Taamaattumik tamanna ataatsimoorutissavarput. Periusissiap piviusunngortinnissaa aamma Kommuneqarfik Sermersuumi tamarmiusumi ineriartortitsinermut iluaqutaanissaa uannut pingaaruteqarluinnartuuvoq, borgmesteri Avaaraq Olsen oqarpoq.

Inuussutissarsiornermut periusissiaq nutaaq 2027-mi atuutilissaaq Kommuneqarfik Sermersuumilu inuussutissarsiuteqarnermik ineriartortitsinermik tapersiilluni suliaqaqqinnermut tunngaviussaaq aamma suliffeqarfinnut pioreersunut, suliniutinut nutaanut aamma siunissami suliffinnut pitsaasunik najoqqutassaqalersitsissaaq.