---
title: "Inunnik innarluutilinnik sullissinermi piumasaqaatit nutaat pitsannguutaasutut innuttaasunit malugineqarsinnaasariaqarput"
description: "Inuit innarluutillit pisinnaatitaaffiinik aamma taakkununnga neqeroorutinik pitsanngorsaarusussuseqarneq Kommuneqarfik Sermersuup tapersersorpaa. Inuilli innarluutillit pillugit anguniakkat inatsimmi nutaamiittussat innuttaasunut iluaqutaasinnaasunngortin"
date: "2026-11-03"
created: "2026-11-03"
---

[Saqqaa](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Inunnik innarluutilinnik sullissinermi piumasaqaatit nutaat pitsannguutaasutut innuttaasunit malugineqarsinnaasariaqarput](https://sermersooq.gl/kommuneqarfik-sermersooq-pillugu/nutaarsiassat-2/inunnik-innarluutilinnik-sullissinermi-piumasaqaatit-nutaat-pitsannguutaasutut-innuttaasunit-malugineqarsinnaasariaqarput)

# Inunnik innarluutilinnik sullissinermi piumasaqaatit nutaat pitsannguutaasutut innuttaasunit malugineqarsinnaasariaqarput

Inuit innarluutillit pisinnaatitaaffiinik aamma taakkununnga neqeroorutinik pitsanngorsaarusussuseqarneq Kommuneqarfik Sermersuup tapersersorpaa. Inuilli innarluutillit pillugit anguniakkat inatsimmi nutaamiittussat innuttaasunut iluaqutaasinnaasunngortinneqavissappata, sullissinermi atukkat aningaasaqarnerlu aaqqinneqartariaqartut kommuni uparuaavoq.

Inuit innarluutillit pillugit inatsisissatut siunnersuut Inatsisartut ukiaanerani ataatsimiinneranni suliarineqassaaq, pilersaarutillu malillugit januaarip ulluisa aallaqqataani 2027-mi atuutilernissaa naatsorsuutigineqarluni.

Kommunip suleriusissanut suliniutinullu nutaanut tulluarsaanissaanut piffissaq sivikippoq. Susassaqarfillu maanna, ilaatigut piukkunnartunik sulisussaaleqinermik eqqugaareeqqasoq, sulinermi atugarisanik tulluartunik aamma ulloq unnuarlu paaqqinnittarfinnik amigaateqarfioreersoq inatsisissatut siunnersuummi nutaanik piumasaqaateqarfiulissaaq.

**Anguniakkat piviusunngortinneqarsinnaassapput**

Pisinnaatitaaffinnik pitsaanngorsaanerup inatsimmi nutaami pappialaannartigut pinnginnissaa Kommuneqarfik Sermersuumi Isumaginninnermut Inunnullu Innarluutilinnut Ataatsimiititami siulittaasup pingaartitaraa, aammali kommunip innuttaasut pillugit malunnaatilimmik pitsanngorsaanissaanut periarfissinneqarnissaa pingaartippaa.

– Inuit innarluutillit pitsaasunik toqqissisimanartunillu neqerooruteqarfigineqarnissaat aamma inuunerminni pitsaanerpaamik atugassaqartitaanissaat soorunami tapersersugaraarput. Kommuninulli nutaanik piumasaqaateqartoqalersillugu suliamik kivitsisinnaanissatsinnut piviusorsiortumik periarfissinneqartariaqarpugut. Innuttaasummi ilaqutariillu pitsannguutinik piviusunngortissinnaanngisatsinnik neriorsulersinnaavagut, Isumaginninnermut Inunnullu Innarluutilinnut Ataatsimiititami siulittaasoq, Justus Hansen oqarpoq.

Kommuneqarfik Sermersuup tusarniaanermut tunngatillugu ilaatigut piviusorsiortumik aningaasalersuinissaq aamma nunatsinni nunap qanoq ittuunerata aaqqiissuussaanerullu tunngasut eqqarsaatigineqarnissaat uparuarpaa.

Ilaatigut tassani pineqarput sulisunik pisariaqartinneqartunik atorfinititsinissaq aamma inatsimmi piumasaqaataasunik neqeroorutinik aamma atortunik atugassarititaasunik pilersitsinissaq.

**Iluaqutaasussat innuttaasunut anngutissapput**

Uppernarsaateqarnerulersitsinertaaq aamma sullissinerulerneq allaffissornermi sulisoqarnerulernissamik pisariaqartitsiffiulersinnaasoq kommunip eqqumaffigeqquaa.

Inunnut innarluutilinnut nutaamik inatsiseqalernikkut pineqartunut ilaqutaannullu neqeroorutit pitsaanerulernissaat toqqissisimanerunermillu pilersitsinissaq Kommuneqarfik Sermersuup pingaartitaraa.

Inatsimmik piviusunngortitsiniarnissami kommunit pisariaqartitaminnik noqqaassuteqarlutik kissaateqarnerat borgmester Avaaraq Olsenip taperserpaa.

– Inunnik innarluutilinnik sullissinermi anguniakkat pitsaalluinnartuussapput. Innuttaasut taakkulu ilaqutaasa atugarissaarnissaat pisussaaffigaarput. Piumasaqaatilli annertunerulerpata sinaakkutit pisariaqartinneqartut pigineqartariaqarput. Kommunit innuttaasunut qanimut attaveqartuupput, inatsisinillu ulluinnarni piviusunngortitsisussaallutik. Taamaammat misilittakkatta tusaaneqarnissaat aamma aningaasaqarnerup, piginnaasat aamma atuutilersitsinerup imminnut ataqatigiinnerannik paasinninnissaq pingaaruteqarpoq, borgmester Avaaraq Olsen oqarpoq.

**Atuutilersitsinissaq pillugu oqaloqatigiinnissamik kissaateqarneq**

Taamaammat sulinermi ilisimasat, sullissineq aamma aningaasaqarneq piviusorsiortumik eqqarsaatigalugit inatsisip nutaap qanoq atuutilersinneqarnissa pillugu Kommuneqarfik Sermersooq Naalakkersuisunik qanimut oqaloqateqarusuppoq.

Inunnut innarluutilinnut inatsisitaassaq nutaanik piumasaqaateqarfiuliinnarani, kisiannili inunnut innarluutilinnut taakkulu ilaqutaannut tigussaasumik malunnaatilimmillu pitsannguuteqarnissaa anguniagaavoq.