---
title: "Innuttaasut Nuummi ulluunerani neqeroorutinut suliassaqarfik pillugu oqaloqatigiinnissamut qaaqquneqarput"
description: "Kommuneqarfik Sermersuumit sisamanngornermi ulloq 19. novembarimi Nuummi ulluunerani neqeroorutinut suliassaqarfik pillugu oqaloqatigiilluni ataatsimiisitsinissamut innuttaasut angajoqqaallu qaaqquneqarput. Matumani innuttaasut maannangaaq pisoq pillugu p"
date: "2026-11-16"
created: "2026-11-16"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Innuttaasut Nuummi ulluunerani neqeroorutinut suliassaqarfik pillugu oqaloqatigiinnissamut qaaqquneqarput](https://sermersooq.gl/kommuneqarfik-sermersooq-pillugu/nutaarsiassat-2/innuttaasut-nuummi-ulluunerani-neqeroorutinut-suliassaqarfik-pillugu-oqaloqatigiinnissamut-qaaqquneqarput)

# Innuttaasut Nuummi ulluunerani neqeroorutinut suliassaqarfik pillugu oqaloqatigiinnissamut qaaqquneqarput

![](https://sermersooq.gl/i/MOLIRIMEDIA/0d74f893-d3a3-4635-ac56-77e4833b0e39?width=800)

Kommune siornatigut ulluunerani neqeroorutinut suliassaqarfimmi atorfinitsitsiniarnermik sulisunillu attassiniarnermik ajornartorsiutaasut pillugit ilisimatitsivoq. Aaqqiissutissanik nassaarniarluni suliaqarneq ulluuneranilu paaqqinnittarfinni patajaannerusunik sinaakkusiorneq nanginneqarpoq.

Oqaloqatigiilluni ataatsimiisitsinissami kommunimit kissaatigineqarpoq, pisoq suliassaqarfimmilu suliaqarnerup nanginnera pillugit innuttaasut angajoqqaallu peqatigalugit ammasumik oqaloqatigiinnermik pilersitsisoqassasoq.

"Ulluunerani neqeroorutinut suliassaqarfimmi pisoq ilaqutariippassuarnut ulluinnaannullu ajornartorsiutaasoq nalunngilarput. Taamaattumik suut ajornartorsiutiginerigut oqaluttuunniarlugit minnerunngitsumillu misilittagaat siunnersuutaallu tusarnaarniarlugit innuttaasut naapikkusuppagut. Peqatigiilluta suliassaqarfiup tungaatigut qanoq ililluta suliaqaqqissinnaanerput pillugu oqaloqatigiinnissarput pingaaruteqarpoq," Tina Evaldsen, Meeqqanut Atuarfeqarnermullu Ingerlatsivimmi pisortaq, oqarpoq.

Oqaloqatigiilluni ataatsimiinnermi assigiinngitsunik immikkut sammisalikkanik nerriveqassaaq, matumani innuttaasut kommunimit sinniisut naapissinnaavaat ilaatigullu sukumiisumik oqaluuserineqassallutik, sulisoqarneq, sulinermi atukkat, atorfinitsitsiniarneq ulluuneranilu neqeroorutinut suliassaqarfimmut tapersiinissamut periarfissaasut. Aammattaaq misilittakkanik avitseqatigiinnissamut, apeqquteqarnissamut siunnersuuteqarnissamullu periarfissaqarumaarpoq.

**Oqaloqatigiilluni ataatsimiinnissaq sisamanngornermi ulloq 19. novembarimi Nuummi pissaaq.**

Sumiiffik: Katersortarfik

Piffissaq: 16:30 – 18:00

Tamulugassaqalaarumaarpoq.
