---
title: "Illoqarfik pillugu periusissiat nutaat Ittoqqortoormiinut Paamiullu siunissaannut sammiviliipput"
description: "ttoqqortoormiinut Paamiunullu illoqarfik pillugu periusissiat nutaat Kommuneqarfik Sermersuumi kommunalbestyrelsimit akuersissutigineqarput."
date: "2026-09-18"
created: "2026-09-18"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Illoqarfik pillugu periusissiat nutaat Ittoqqortoormiinut Paamiullu siunissaannut sammiviliipput](https://sermersooq.gl/kommuneqarfik-sermersooq-pillugu/nutaarsiassat-2/illoqarfik-pillugu-periusissiat-nutaat-ittoqqortoormiinut-paamiullu-siunissaannut-sammiviliipput)

# Illoqarfik pillugu periusissiat nutaat Ittoqqortoormiinut Paamiullu siunissaannut sammiviliipput

**Ittoqqortoormiinut Paamiunullu illoqarfik pillugu periusissiat nutaat Kommuneqarfik Sermersuumi kommunalbestyrelsimit akuersissutigineqarput. Siunissaq ungasinnerusoq eqqarsaatigalugu illoqarfiit marluusut ineriartornissaannut periusissiat sammiviliipput innuttaasullu kissaataannik, isumassarsiaannik aamma isiginnittariaasiannik aallaaveqarlutik.**

Ittoqqortoormiit – pinngortitamut qaninneq siunissamut atassuteqarneq aamma Paamiut - ilaqutariit illoqarfiat tamarmillu immikkut aallaaveqarlutik pitsaassuteqarput. Periusissianik ataatsimoorussinermi ineriartorneq najukkami inuunermi aamma illoqarfimmi inuit najugallit aallaavigineqassasut kissaatigineqarpoq.

Kommuneqarfik Sermersooq tamakkerlugu ineriartornissamik pilersitsinissamut periusissiat sulinerup ilaatut pingaaruteqartutut Borgmesteri Avaaraq Olsenip isigai.

– Illoqarfigut nunaqarfigullu tamarmik assigiinngillat aamma taamaammat ineriartorfiuneri allaanerunissaannut inissaqartitsissaagut. Ittoqqortoormiini Paamiunilu siunissap qanoq isikkoqarnissaanut Nuumminngaanniit aalajangiissanngilagut. Inunnit najugaqartunit najukkamilu periarfissat aammalu inuuneq pilersikkusutaq aallaavigalugit ineriartorneq pissaaq. Illoqarfik pillugu periusissiat atorlugit ataatsimoorussamik sammiveqassaagut, innuttaasutut, politikeritut aammalu allaffimmiutut ukiuni tulliuttuni sulinermi aallaavigisinnaasatsinnik.

**Ittoqqortoormiit – pinngortitamut qanittoq – siunissamut atassutilik**

Ittoqqortoormiinut periusissiaq immikkoortortanit tallimanit aallaaveqarpoq: Kalaallit Nunaannut aamma nunarsuarmut attaveqarneq, ulluinnaat peqqinnartut kinguneqarluarsinnaassullu, pinngortitaq, ilisimasat aamma ineriartorneq imminut akilersinnaasoq, najukkami suliffissat aamma periarfissat kiisalu inuunermut pitsaasumut sinaakkutissat.

Periusissiap illoqarfiup siunissami ineriartornissaanut innuttaasut ersarinnerusumik atuuffeqalersitsinissaa Qinersivimmit ilaasortamut Mette Pike Barselajsenimut pingaaruteqarluinnarpoq.

– Nammineq illoqarfipput nalunngilarput, ajornartorsiutigut aamma periarfissagut. Taamaattumik maannakkut akuersissutigisatsinnut sammiviliinerup ilaanut innuttaasut taasinerat isumaqarluinnarpoq. Ittoqqortoormiit kommunip sinneranit ungasissumik inissisimavoq kisianni ineriartornermut ungasissumi inissisimassanngilagut. Pinngortitarput nukittuujuvoq, najukkami inuiaqatigiit aamma periarfissat nukittuujupput taakkualu ineriartortissavagut. Periusissiap ataatsimoorluta tigussaasumik suliniuteqarfissatsinnik tunivaatigut, Mette Pike Barselajsen oqarpoq.

**Paamiut – ilaqutariinnut illoqarfik**

Paamiuni illoqarfiup najugaqarfigiuminartuunissaanut, inuuffigiuminartuunissaanut aammalu siunissamik pilersitsiffiunissaanut kajuminnartuunissaa anguniarneqarpoq. Periusissiami illoqarfiup tikikkuminartuunera aammalu ataqatigiissaarluagaanissaa, ulluinnarni inuunermut illoqarfimmi killiliussat orniginartut, inuussutissarsiuteqarneq imminut akilerluarsinnaasoq, ataatsimoorfiit toqqissisimanartut akuutitsisullu aammalu pinngortitamut qanilluni illoqarfimmi inuuneq ukkatarineqassapput.

– Paamiut illoqarfiussaaq namminermut ilaqutariinnullu siunissaqarfiusinnaasoq. Ataatsimoornerit nukittuut, pinngortitaq kusanartoq aamma najukkami nukissat illoqarfimmi piumasut pigaagut. Taakkua pitsaassutsit qanoq pitsanngorsarnissaannut aammalu nuunnermi, inuussutissarsiornermi aammalu ulluinnarnik pitsaasunik pilersitsinissamut periarfissanik pitsaasumik qanoq pilersitsisinnaanissatsinnut maannakkut ataatsimut sammiveqalerpugut. Neriunnermik oqaatsillu piviusunngortinnissaannut akisussaassusermik tunisivoq, qinersivimmit ilaasortaq Dorthe-Marie Mogensen-Fontain oqarpoq.

**Kommuni tamaat sammivik**

Ittoqqortoormiinut Paamiunullu illoqarfik pillugu periusissiat kisimiinngillat. Tasiilamut illoqarfik pillugu periusissiaq Kommuneqarfik Sermersuumit aamma suliarineqarpoq kommunilli nunaqarfiinut periusissiat naammassineqareerput.

Taamaalilluni kommune tamaat ataqatigiinnerusumik ungasinnerusorlu eqqarsaatigalugu ineriartornerup pilersinneqarnissaa anguniagarineqarpoq, tassani inoqarfiit ataasiakkaat immikkut ittumik periarfissaat, pisariaqartitaat kissaataallu aallaavigineqarlutik.

– Illoqarfitta nunaqarfittalu periusissiaat suliarigaangatsigit kommune qanoq ittoq kissaatigineripput apeqqutaavoq. Nuummi, Paamiui, Tasiilami, Ittoqqortoormiini imaluunniit nunaqarfinni najugaqaraluaraanniluunniit kommune pitsaasumik inuuffiusinnaasoq ineriartornermullu sunniuteqaqataaffiusinnaasoq. Kommuneqarfik Sermersooq tamaat ineriartortissavarput - najugaqartut peqatigalugit, Avaaraq Olsen oqarpoq.

Kommunalbestyrelsimit akuersissutigineqareernerani periusissiap piviusunngortinnissaanut suliaq aallartippoq. Innuttaasut, kattuffiit, inuussutissarsiutillit aamma najukkami suliaqartut allat suliniutinik pingaarnersiuinermi peqataatinneqaannassapput. Inoqarfinnut Ataatsimiisitamit aamma suliniuteqarneq ukiup affakkaartumik oqaluuserineratigut pingaarnersiuinikkullu malinnaavigineqassaaq.

Atuutilersitsineq aamma kommunimi siammarterinermut tapertaassaaq, taamaalilluni najukkami sunniuteqarsinnaaneq siunissarlu ungasinnerusoq eqqarsaatigalugu inoqarfinni inerisaaneq imminnut taperserniassammata.

-

[Illoqarfimmut periusissiaq: Ittoqqortoormiit 2026 – 2036](https://sermersooq.gl/p/2026/Ittoqqortoormiit-ILLOQARFIMMUT-PERIUSISSIAQ-2026---2036---Pinngortitamut-qanittoq---siunissamut-atassutilik.pdf "Illoqarfimmut periusissiaq: Ittoqqortoormiit 2026 – 2036") (PDF)

[Illoqarfimmut periusissiaq: Paamiut 2026 – 2036](https://sermersooq.gl/p/2026/Paamiut-ILLOQARFIMMUT-PERIUSISSIAQ-2026---2036---Ilaqutariinnut-illoqarfik.pdf "Illoqarfimmut periusissiaq: Paamiut 2026 – 2036") (PDF)