---
title: "Borgmesteri: Peqataatinneqarluta ineriartortitsisoqassaaq – najukkamilu naleqalersitsissaaq"
description: "Kalaallit Nunaanni illersornissakkut aningaasaliissutit nutaamik sanaartornernik attaveqaasersuuteqalersitsinermillu angusaqarfiuinnassanngillat. Najukkanittaaq suliffeqarfinnik nukittorsaataassapput, suliffissanik pilersitsisuussapput aamma ilinniartitaa"
date: "2026-09-11"
created: "2026-09-11"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Nutaarsiassat](https://sermersooq.gl/kommuneqarfik-sermersooq-pillugu/nutaarsiassat-2)

                [Borgmesteri: Peqataatinneqarluta ineriartortitsisoqassaaq – najukkamilu naleqalersitsissaaq](https://sermersooq.gl/kommuneqarfik-sermersooq-pillugu/nutaarsiassat-2/borgmesteri-peqataatinneqarluta-ineriartortitsisoqassaaq-najukkamilu-naleqalersitsissaaq)

# Borgmesteri: Peqataatinneqarluta ineriartortitsisoqassaaq – najukkamilu naleqalersitsissaaq

![](https://sermersooq.gl/i/MOLIRIMEDIA/98303423-bc37-4edb-97c1-77b8af1737c1?width=800)

Kalaallit Nunaanni illersornissakkut aningaasaliissutit nutaamik sanaartornernik attaveqaasersuuteqalersitsinermillu angusaqarfiuinnassanngillat. Najukkanittaaq suliffeqarfinnik nukittorsaataassapput, suliffissanik pilersitsisuussapput aamma ilinniartitaanernik periarfissaqartitsilissallutillu piginnaasanik Kalaallit Nunaanniiginnartussanik ineriartortitsissapput. Nuummi inuussutissarsiornermut aamma isumannaallisaanermut politikkikkut isumasioqatigiissitsisoqarmat borgmesteri Avaaraq Olsen taamatut oqariartuuteqarpoq.

Illersornissamut qullersaqarfik suleqatigalugu inuussutissarsiornermut isumannaallisaanermullu politikkikkut isumasioqatigiissitsineq Interforce aamma Dansk Industrimiit septembarip ulluisa arfineq-pingajuanniit qulingannut Nuummi ingerlanneqarpoq. Tamatumunnga atatillugu Danmarkimi illuliornermut sanaartornermullu suliffissuaqarfiit annersaat ilaannit qullersat aallartitatut peqataapput.

Ukiunut tulliuttunut aningaasaliissutissat aamma Illersornissaqarfiup, qallunaat kalaallillu suliffeqarfiisa akornanni suleqatigiinnissamut periarfissat pillugit oqaloqatigiinnermi, borgmesteri Avaaraq Olsen peqataavoq.

– Aningaasaliissutit suleqatigiinnerlu tikilluaqquavut. Taamaattorli kommunitsinni ineriartortitsinerusussaq inunnut suliffeqarfinnullu maaneereersunut naleqartilersitsissasoq borgmesteritut uannut pingaaruteqarpoq. Peqataatinneqarluta ineriartortitsisoqassaaq – isiginnaartuinnaatinnata, borgmesteri Avaaraq Olsen taama oqarpoq.

**Najukkami suliffeqarfiit ineriartortitsinermi ilaatinneqassapput**

Kommuneqarfik Sermersuumi ilaatigut illuliornerup, angallannerup, assartuinerup, siunnersuinerup aamma imarsiorluni inuussutissarsiuteqarnerup iluini suliffeqarfeqarpoq sulisoqarporlu annertuumik misilittagaqartooreersunik. Aningaasaliissutigineqartussat atorlugit piginnaasarineqartut peqataanillu nutaamik suleqateqalernerit inerisaaviginissaannut periarfissiipput.

Suliffeqarfiit avataaneersut Kalaallit Nunaanni aningaasaliissuteqarusuttut imaluunniit suliassanik tigumminnikkusuttut, najukkami suliffeqarfinnik suleqateqartarnissamik ujartuisarnissaat, borgmesterimit Avaaraq Olsenimit pingaartinneqarpoq.

– Nukittuunik piginnaasaqarluartunillu inuussutissarsiuteqartunik maani peqareerpugut. Suliffeqarfiit avataaneersut maani aningaasaleerusullutik sulerusukkunik, najukkami suleqatissarsiornissaat taavalu paasisimasat piginnaasallu pigineqareersut inerisaavigissagaat kaammattuutigerusuppara. Naligiimmik suleqatigiilernissaq anguniarneqassaaq, tassa ineriartortilluta aamma naleqartitat annerpaartaat Nunatsinniitiinnartillugit, Avaaraq Olsen oqarpoq.

**Aningaasaliissutit innuttaasuniit malugineqarsinnaasariaqarput**

Aningaasaliissutigineqartussat innuttaasunut kinguaariinnullu qanoq sunniuteqassasut Avaaraq Olsenimittaaq pingaartitarineqarpoq. Pilersaarutit angisuut suliffinnik inerisaanermillu pilersitsisinnaapput, kisianni aamma inuusuttunut ilinniarnermik suliffimmillu misiliinermik inissanik periarfissanillu nutaanik pilersitsisinnaapput.

– Ukiut qulit qaangiuppata kingumut qiviarutta, illuliat, umiarsualiviit allatigullu attaveqaasersuutit nutaat kisiisa takusinnaaginnassanngilavut. Aammali kalaallit suliffeqarfiutaat, inuusuttut ilinniarsimasut amerlanerusut, suliffissat nutaat aamma piginnaasat maaneereersut takusinnaasariaqarpavut. Tamatuma kingorna inuiaqatigiit nukittunerusumik inissisimassapput, Avaaraq Olsen oqarpoq.

Aningaasaliissutigineqalersussat najukkami siunissamilu ungasinnerusumi qanoq sapinngisamik annerpaamik naleqalersitsisinnaasut pillugit Illersornissaqarfik, oqartussaaffeqarfiit inuussutissarsiuteqartullu Kommuneqarfik Sermersuumiit nangillugu oqaloqatigiissutigineqassapput.