---
title: "Kuserneq – Naartusunut ukioqanngitsuniillu marlunnik ukiulinnut ilaqutariinnut najaqarfiutigaluni katsorsaanermik neqeroorut"
date: "2026-10-16"
created: "2026-10-16"
---

[Hjem](https://sermersooq.gl/)

                    [Kommuneqarfik Sermersooq pillugu](https://sermersooq.gl/kommuneqarfik-sermersooq-pillugu)

                    [Immikkoortortaqarfiit](https://sermersooq.gl/kommuneqarfik-sermersooq-pillugu/immikkoortortaqarfiit)

                    [Meeqqanut Ilaqutariinnullu Ingerlatsivik](https://sermersooq.gl/kommuneqarfik-sermersooq-pillugu/immikkoortortaqarfiit/meeqqanut-ilaqutariinnullu-ingerlatsivik)

                    [Pitsaaliuinermut Immikkoortortaq aamma Meeqqanut Ilaqutariinnullu Katsorsaavik](https://sermersooq.gl/kommuneqarfik-sermersooq-pillugu/immikkoortortaqarfiit/meeqqanut-ilaqutariinnullu-ingerlatsivik/pitsaaliuinermut-immikkoortortaq-aamma-meeqqanut-ilaqutariinnullu-katsorsaavik)

                [Kuserneq – Naartusunut ukioqanngitsuniillu marlunnik ukiulinnut ilaqutariinnut najaqarfiutigaluni katsorsaanermik neqeroorut](https://sermersooq.gl/kommuneqarfik-sermersooq-pillugu/immikkoortortaqarfiit/meeqqanut-ilaqutariinnullu-ingerlatsivik/pitsaaliuinermut-immikkoortortaq-aamma-meeqqanut-ilaqutariinnullu-katsorsaavik/kuserneq-naartusunut-ukioqanngitsuniillu-marlunnik-ukiulinnut-ilaqutariinnut-najaqarfiutigaluni-katsorsaanermik-neqeroorut)

# Kuserneq – Naartusunut ukioqanngitsuniillu marlunnik ukiulinnut ilaqutariinnut najaqarfiutigaluni katsorsaanermik neqeroorut

Kuserneq – Naartusunut mikisunillu meerartalinnut ilaqutariinnut malussarissunut najugaqarfiutigaluni katsorsaanermik neqeroorut

## **Kuserneq suua:**

Kuserneq tassaavoq Nuummi naartusunut ukioqanngitsuniillu marlunnik ukiulinnut ilaqutariinnut najugaqarfiutigaluni katsorsaanermik neqeroorutaasoq, tassani angajoqqaanngulernermi aamma meeqqap ukiumi siullermi inuunerani immikkut tapersersorneqarnissamik pisariaqartitsisut pineqarlutik.

Kusernermi ilaqutariit ulluinnarni toqqissisimanermik, allanngujaatsumik aamma ineriartorfiusumik pilersitsinissaanni tapersersortarpagut, tassani meeqqap alliartornermini pisariaqartitai aamma ineriartornera qitiutinneqartarlutik. Angajoqqaat piginnaasaannik nukittorsaanermi tapersersuisarpugut, nammineq pisinnaasaannik upperinninnerulernissaannik aamma imminnut meeqqallu isumassornissaanut pisariaqartunik piginnaasassaannik ineriartortitsisarluta.

Ilaqutariit immikkut aaqqissuussamik katsorsartinnerminni Kusernerup katsorsaanermi inissiaataanni aqqaniliusuni najugaqartarput.

## **Ilaqutariinnut tamanut tapersersuineq:**

Ilaqutariit ataasiakkaat nukissaqassusaat, pisariaqartitaat aamma unammillernartitaat aallaavigalugit katsorsaasoqartarpoq. Ilaqutariit ilaatigut siunnersorneqarnissamik, aaqqissuussamik sammisaqartinneqarnermik aamma ilaqutariit ulluinnarni aaqqissuussaasumik, toqqissisimanartumik pitsaasunillu ileqqoqarlutik inuuneqarnissaat tapersersorniarlugu oqaloqatigiinnissamut neqeroorfigineqartarput.

## **Immikkut suliaqarfigisarpagut:**

- Meeqqap atugarissaarnera ineriartorneralu: meeqqap timimigut, misigissutsimigut aamma inoqateqarnikkut ineriartornermini periarfissaqarluarnissaanik qulakkeerinninneq.
- Angajoqqaajuneq atassuteqarnerlu: attaveqarnermik, peqatigiinnermik aamma meeqqat angajoqqaallu akornanni toqqissisimanissamik nukittorsaaneq.
- Inuttut ineriartorneq: angajoqqaat nammineq pisariaqartitaminnik paasinninnissaannut, unammillernartunik aaqqiinissaannut aamma nammineersinnaanerulernissaannut tapersersuineq.
- Ulluinnarni ingerlalluarneq: ilaqutariit ulluinnaanni aaqqissuussaasumik, allanngujaatsumik aamma pitsaasunik ileqqoqarluni inuuneqarneq.

## **Meeqqap ullui 1000-t siulliit:**

Meeqqat ullui 1000-t siulliit – tassa naartuuneraniit marluk missaani ukioqalernissaata tungaanut – tassaavoq meeqqap ineriartorneranut atassuteqarneranullu piffissaq pingaaruteqartoq.

Taamaammat Kusernerup ilaqutariit sapinngisamik siusissukkut, tassa naartunermiit imaluunniit meeqqap inunngoriitsiarneraniit tapersersorneqarnissaat immikkut ukkataqarfigai.

Katersortartinneq meeqqap marluliinissaata tungaanut ingerlasinnaavoq, tassani ilaqutariit pisariaqartitaat aamma innersuunneqarneq apeqqutaatinneqartarlutik.

## **Qanoq ililluni Kusernermut neqeroorfigitittoqarsinnaava?**

Meeqqanut Ilaqutariinnullu Ingerlatsivik taannaavoq ilaqutariit pisariaqartitaannik nalilersuisartoq aamma Kusernermi katsorsartinnissamut innersuussisartoq.

Najugaqaatigaluni katsorsartinneq Kusernermi neqeroorutaavoq, tassani ilaqutariit katsorsartinnermi inissiamiittarlutik aamma katsorsaanernut pilersaarutaasunut peqataassallutik.

## **Innersuunneqarnissamut piumasaqaataapput:**

Kusernermi katsorsartinnissamut ilanngunnissamut uku piumasaqaataapput:

- Angajoqqaat Kusernermut innersuunneqarsinnaassagunik 18-nileereersimassapput.
- Inissiat angissusaat aamma marlunnik sinittarfeqarnera pissutigalugu ilaqutariit nalinginnaasumik annerpaamik sisamanik inuttaqarsinnaapput.
- Ilaqutariit inissarsiortut allattorsimaffianni utaqqisuni allatsissimassapput.
- Kuserneq tarnikkut katsorsaanermik imaluunniit tarnikkut nappaatinik katsorsaanissamut neqerooruteqartanngilaq. Angajoqqaat tarnimikkut katsorsarneqarnissamik pisariaqartitsisut peqqinnissaqarfik aqqutigalugu imaluunniit katsorsartinnissamut neqeroorutit allat aqqutigalugit tulluartumik katsorsartissinnaassapput.
- Angajoqqaaq aanngajaarniutinik atuinermik ajornartorsiuteqarpat imaluunniit aanngajaarniutinik pinngitsuuisinnaanngippat, taava katsorsartinnissamik pisariaqartitsineq immikkut nalilersuiffigineqassaaq. Annertuumik aanngajaarniutinik ajornartorsiuteqartoqarpat Kusernermi aallartinnissaq sioqqullugu aanngajaarniutinik ajornartorsiuteqarnermut katsorsarteqqaarnissaq pisariaqarsinnaavoq. Pisuni allani aanngajaarniutinut katsorsartinneq saniatigut ingerlanneqarsinnaavoq. Angajoqqaap aanngajaarniutinik atuinini ilisimaariguniuk akisussaaffimmik tigusisinnaanissaa aamma katsorsartinnissaq tapersersorneqarnissarlu pisarialik pillugu suleqataanissaa naatsorsuutigineqarpoq.
- Angajoqqaat katsorsartinnermi eqeersimaarlutik peqataanissartik, sulisunik suleqateqarnissartik aamma ilaqutariit katsorsartinnissaannut anguniagaq aallaavigalugu sapaatip-akunneranut immikkut pilersaarusiamik malinninnissaq piareersimaffigissavaat.

Ilaqutariit inissisimanerat pisariaqartitaallu aallaavigalugit nalilersuisoqarluareernerani innersuussisoqartarpoq.

## **Anguniagarput:**

Kusernermi anguniagaraarput meeqqat toqqissillutik inuunerminni aallartinnissaat aamma angajoqqaat ilaqutariittut ulluinnarminni aalajaatsumik, isumassuillutik aamma namminersorlutik inuuneqalernissamut piginnaasanik ineriartortitsinissaat.