PKU-mi pikkorissarnerit

Inuussutissarsiutit ilaat piorsaaffiullutillu annertusaaffiusut allat ingerlariaqqiffiunatillu appariartorfiupput. Suliffeqarneq allanngoriartorfiujuartoq naleqqussaaffigiumallugu pisariaqarsinnaasarpoq ilinniagaqaqqittoqartarnissaa – aamma suliffeqareeraluaraanni. PKU (Projekt Kompetenceudvikling for Uuddannede, Ilinniagaqarsimanngitsunut piginnaasanik ineriartortitseqqinneq) ilinnut ilinniagaqaqqikkumasumut neqeroorutaavoq.

PKU suliamik ilinniagaqarsimanngitsut piginnaasaminnik piffissami sivikitsumi ineriartortitseqqinnissamut pikkorissartitisarnermik aaqqissuussineruvoq. Pikkorissartitsinerit sivikinnerpaamik ullunik sisamanik sivisussuseqartarput, siunertaavorlu inuit inuussutissarsiutini akunnattoorfiusuni taakkunani inuussutissarsiorfigisaanni imaluunniit inuussutissarsiutini piorsaaffiullutillu annertusaaffiusuni piginnaasaqarnerulersissinnaanissaat. Taamaasilluni suliffissaaleqinissap aarlerinartoqarsinnaanera annikillilersinneqarsinnaaqqullugu, ilutigalugulu inuussutissarsiutini piorsaaffiullutillu annertusaaffiusuni sulisussarsiornerit inussaqartinniarsinnaaqqullugit, assersuutigalugu inuussutissarsiutini ukunani:

  • Sanaartorneq
  • Takornariaqarneq
  • Aatsitassarsiorneq
  • Kommunini ulluunerani paaqqinnittarfiit

Siunnerfigisat tassaapput inuit 25-t sinnerlugit ukiullit suliffeqareersullu. Sulisitsisorisaq pikkorissartitsinermut taartisianik pissarsitinneqassaaq, akerlianillu pikkorissartoq piffissami pikkorissarnermini aningaasarsiaqaannassalluni.

Suliffissaaleqisut PKU-mi pikkorissartitsinerni aamma peqataasinnaapput. Pikkorissaqataanerminnilu pisortanit aningaasatigut ikiorsiissutinik pisartagaqaannassapput.

Suliamik ilinniagaqarsimasut aamma qinnuteqarsinnaapput pineqartuni inissaqartitsisoqarpat. Taakkuli tapiissutisisinnaanngillat PKU-mi pikkorissaqataanerminni.

PKU-mi pikkorissartitsinerit Qitiusumik Ilinniarfinnit imaluunniit taakku suleqatigalugit neqeroorutigineqartarput. Qitiusumik Ilinniarfiit maannamut PKU-mi pikkorissartitsisarnernik neqerooruteqartartut tassaapput:

  • Aatsitassarsiornermut Ilinniarfik, qaarusulerinermut-, entreprenørimut- aamma atsitassarsiornermut pikkorissartitsinerit, assersuutigalugu aatsitassarsiornermut tunngaviusumik (common core) aamma maskiinanik aqutsisutut (maskinfører) pikkorissarnerit
  • Sanaartornermut Ilinniarfik, neqerooruteqartartoq assersuutigalugu kiffiutissani aalamut illersuutinik ikkussuisarnermut aamma kikiattuutit pillugit pikkorissartitsisarnernik
  • Isumaginninnermut Ilinniarfik, isumaginninnermi ulluunerani paaqqinnittarfinnut utoqqarnillu paarsinermut sammisunik pikkorissartitsinernik neqerooruteqartartoq
  • Oqaatsinik Pikkorissarfik, oqaatsinik pikkorissartitsinermik neqerooruteqartartoq
  • Niuernermik Ilinniarfik Qaqortoq, assersuutigalugu niuertarfinni sulineq takornariaqarnerlu pillugit pikkorissartitsinernik neqerooruteqartartoq
  • Peqqissaanermik Ilinniarfik, peqqinnissamut ikiortinut pikkorissartitsinernik neqerooruteqartartoq
  • ATI, aalisakkanik suliffissuarni suliat pillugit pikkorissartitsinernik neqerooruteqartartoq, assersuutigalugu eqqiluisaarnermik
  • INUILI, nerisassat, neriniartarfinni- aamma akunnittarfinni suliat pillugit pikkorissartitsinernik neqerooruteqartartoq
  • Saviminilerinermik Ilinniarfik, assersuutigalugu svejserineq pillugu pikkorissartitsinernik neqerooruteqartartoq

Malugiuk
PKU-mi pikkorissartitsisarnerit Qitiusumik Ilinniarfinni nalinginnaasumik ingerlanneqartarput. Pikkorissartitsinissallu atortussatigut immikkut piumasaqarfiusariaqartinnagit najukkami taakku ingerlanneqarnissaat Qitiusumik Ilinniarfiit anguniartarpaat.

Sullissivik.gl-mi annerusumik atuaruk