Pisassiissutit

Aalisarnermut Piniarnermullu Naalakkersuisoqarfiup suliassaannut ilaavoq, pisuussutit uumassuseqartut piniarneqarneri atorneqarnerilu pillugit aalajangersakkanik atortussanngortitsissallutik. Aalisaraangatta piniaraangattalu aalisakkat uumasullu ataasiakkaat amerlassusaat ilaatigut eqqarsaatigisartussaavagut.

Aalisarnermut piniarnermullu pisassiisarnerup eqqunneqarneratigut tamanna ilaatigut iliuuseqarfigineqarsinnaavoq. Aalisarnermut piniarnermullu pisassiissutini aalisakkanik kiilunik qanoq amerlatigisunik aalisarsinnaanermut uumasunillu qanoq amerlatigisunik piniarsinnaanermut kisitsisit takutinneqarput.

Pisassiissutit aalisakkat piniagassallu assigiinngitsut amerlassusiisa illersornissaannut periutsitut atorneqartarput. Periuseq atorlugu uumasut assigiinngitsut isumannaatsumik piniarneqartarnissaat qulakkeerneqassaaq, soorlu uumasut ataasiakkaat nungutaanissaasa navianartorsiortinnissaat pinngitsoortinniarlugu.

Qinnuteqarneq

Aalisarnermut piniarnermullu pisassiissutit ilaannik perusukkuit aalisarnermut piniarnermulluunniit akuersissut pillugu qinnuteqaammik nassiussissaatit. Akuersissut uumasunut aalajangersimasunut aalajangersimasumik aalisarsinnaanermut piniarsinnaanermulluunniit akuersissutitut atorneqartarpoq. Illit:

  • Inuussutissarsiutigalugu piniartuuguit piniarsinnaanermut akuersissummik qinnuteqassaatit
  • Inuussutissarsiutigalugu aalisartuuguit aalisarsinnaanermut akuersissummik qinnuteqassaatit
  • Sunngiffimmi piniartuuguit piniarsinnaanermut akuersissummik qinnuteqassaatit
  • Sunngiffimmi aalisartuuguit akuersissummik pisariaqartitsinngilatit

Uumasoq pisassiissutaasumut akuersissummik piniaruit, ilaatigut piniarnermut allagartaqassaatit uumasullu ataasiakkaat pillugit nalunaarusiani ataasiakkaani piumasaqaatit eqquutsissimassallugit.

Uumasunut pisassiissutit pillugit aalisarnermut piniarnermullu maleruaqqusat eqquutsinngikkukkit, akuersissut annaasinnaavat. Soorlu imaassinnaavoq akuersissummi aalisakkat assigiinngitsut amerlasuukkaalluunniit taaneqartut sinnerlugit aalisarsimagukkit.

Assersuutigalugu nanoq imminut illersorniarluni pisarisimasaq pisassiissutinut ilaatinneqanngilaq, Kalaallillu Nunaanni Namminersorlutik Oqartussanut tunniunneqassalluni. Uumasut unioqqutitsilluni pisat Kalaallit Nunaanni Namminersorlutik Oqartussanut tunniunneqassapput.

Pisassiissutit agguaanneqarnerat

Piniarnermut pisassiissutit aalisarnermullu pisassiissutit assigiinngitsumik agguaanneqartarput.

Nuna tamakkerlugu pisassiissutit annertussusaat agguaassinerillu aalajangerneqarpata TV aviisillu aqqutigalugit Namminersorlutillu Oqartussat nittartagaatigut www.naalakkersuisut.gl tamanut saqqummiunneqassapput. Kommunini inuussutissarsiutinut siunnersortit aqutsiveqarfinni ataasiakkaani pisassiissutit aalajangersakkat pillugit paasissutissiisinnaapput.

Aallaaviusumik pisassiissutit ukioq ataasiakkaarlugit aalajangersarneqartarput.

Piniarnermut pisassiissutit
Piniarnermut pisassiissutit marloriarlugit agguaanneqartarput. Siullermik Naalakkersuisut Kalaallit Nunaanni Aalisartut Piniartullu Kattuffiat (KNAPK) aamma Kalaallit Nunaanni Kommunit Kattuffiat (KANUKOKA) isumasioreerlugit piniarnermut pisassiissutigineqartut qanoq annertutiginissaat nunalu tamakkerlugu qanoq agguaassisoqassanersoq aalajangertarpaat. Tamatuma kingorna kommunit najukkani KNAPP’it isumasioreerlugit piniarnermut pisassiissutit nunap immikkoortuinut agguaattarpaat. Nunap immikkoortuini agguaassineq makitsinikkut qinnuteqaatilluunniit aqqutigalugit pisarpoq.

Aalisakkanut pisassiissutit
Aalisakkanut pisassiissutit annertussusaat agguaanneqartarnerallu Kalaallit Nunaanni Pinngortitaleriffimmit siunnersuisoqarnerata kingorna, Naalakkersuisut kisimiillutik aalajangertarpaat.

Immikkut akuersissuteqartarneq

Immikkut akuersissummik assersuutigalugu makkununnga qinnuteqarsinnaavutit:

  • Piniarnermut allagartaq
  • Pisassiissutit agguaannerannut

Inuussutissarsiutigalugu piniartuuguit sivisuumillu napparsimasimallutit, imaluunniit Nunarput qimallugu ilinniagaqarlutit assigisaannilluunniit nunami allamiissimallutit, inuussutissarsiutigalugu piniarnermut allagartamik pissarseqqinnissamut immikkut akuersissutigineqarnissamut qinnuteqarsinnaavutit.

Isumaginninnermi suliffeqarfik isumaginninnikkut perorsaanermi suliffeqarfiup sulinerminut atatillugu pisanik piniarnermillu periuseqartoq, pisassiissutinik piniaraanni inuussutissarsiutigalugu piniartuunissamut piumasaqaammit immikkut akuersissummik qinnuteqartoqarsinnaavoq.

Immikkut akuersissummik qinnuteqarniaruit allakkatigut qinnuteqaammik uunga nassiussaqassaatit: Aalisarnermut Piniarnermullu Naalakkersuisoqarfik.

Qinnuteqaatit sapinngisamik piaarnerpaamik ulluinnaallu qulit qaangiutsinnagit akineqassaaq.

Pisassiissutit nakkutigineqarnerat

Pisassiissutit qaangerneqarpata, ukiumi pineqartumi ukiulluunniit tulliani pisassiissutit katillugit qaangerneqannginnissaat imaluunniit aqutsiveqarfinni ataasiakkaani pisassiissutit qaangerneqannginnissaat qulakkeerniarlugu Aalisarnermut Piniarnermullu Naalakkersuisoqarfimmit ikilineqassapput.

Pisassiissutit qanoq atorneqarnerannut nakkutiginninneq Naalakkersuisoqarfiup, Kalaallit Nunaanni Aalisarnermut Akuersissutinik Nakkutilliisoqarfiup (GFLK) kommunillu suleqatigiinnerisigut isumagineqartarpoq.

Uumasunik pisassiissutinut unioqqutitsisumik piniartoqarneranik pasitsaassaqaruit ukununnga nalunaarutigisinnaavat:

  • Aalisarnermut Piniarnermullu Naalakkersuisoqarfimmut
  • Kommunimut
  • Najukkanni piniarnermut nakkutilliisoqarfimmut
  • Politiinut