Pinnguaatinut akitsuutit

Inuussutissarsiuteqaruit, soorlu neriniartarfimmik, tamanullu atugassanik aningaasanik akiliilluni pinnguaataateqaruit, pinnguaatit ataasiakkaarlugit akitsuutaat akilissavat. Tassaavorlu akiliilluni pinnguaatinut akitsuut.

Akitsuut taanna taaneqartarpoq toqqaannanngitsumik akileraarut, Landskarsillu pisassaraa. Qaammatit pingasukkaarlugit aningaasanik ikisilluni pinnguaatinut akiligassanik nassiussisoqartarpoq.

Pinnguaatinut akitsuut – Ingerlarnga akigititallu
Aningaasanik ikisilluni pinnguaatit marluinngorlugit immikkoortitaapput. Aningaasanik eqquiffiusinnaasut, aappaalu aningaasanik eqquiffiusinnaanngitsut.

Qaammatit pingasut qaangiunneri tamaasa Akileraartarnermi Aqutsisoqarfiup aningaasanik ikisilluni pinnguaatinut akitsuutit akiligassanngorlugit nassiuttarpai.

Aningaasanik eqquiffiusinnaanngitsunut qaammatip tulliuttup ulluisa qulingat nallertinnagu akitsuut akilerneqartassaaq. Assersuutigalugu qaammammi maajimi pinnguaatinut akitsuutip akilernissaa kingusinnerpaamik juunip qulingani akilereersimassavat. Akilersimanngikkukku immikkut akiliisinneqassaatit, annertussuseqarporlu 400,00 kr.-nik, pinnguaammut ataatsimut.

Akitsuummik akiliinissannut apeqqutaavoq pinnguaatinik qanoq amerlatigisunik pigisaqarnerit:

  • Pinnguaatip siulliup ukiumut akitsuutigaa 16.000 kr.
  • Pinnguaatip aappaataa ukiumut akitsuutigaa 17.500 kr.
  • Pinnguaatinut sinneruttunut pingasuniit qummut, ukiumut akitsuutigaa 19.000 kr.

Akitsuut allakkerisarfikkoorlugu, aningaaserivikkoorlugu toqqaannartumilluunniit Akileraartarnermi Aqutsisoqarfimmut akilerneqarsinnaavoq.

Malugiuk
Ilisimassavat akiliilluni pinnguaatinut, aningaasanik eqquiffiusinnaasunut, immikkut malittarisassaqarmat.

Akiliilluni pinnguaatinik aningaasanik eqquiffiusinnaasunik inuussutissarsiortutut pigisaqaruit ullut tamaasa Akileraartarnermi Aqutsisoqarfiup immersugassiaanik aningaasanoorutit immikkuutitaarlugit qanoq annertutigisumik aningaasanik atuiffiusimaneri nalunaarsortassavatit. Immersugassat taakku qaammatit sisamanngornerisa naaneranni nassiunneqartassapput, kingusinnerpaamilli 1. december, 1. marts, 1. juni aamma 1. september. Nassiussinerpit kinguninngua akiliilluni pinnguaatinut akitsuummik akiligassinneqassaatit.

Pinnguaatinut aningaasanik eqquiffiusartunut akigitinneqartut

  • Pinnguaammut siullermut ukiumut akitsuutaavoq 64.000 kr.
  • Pinnguaatit aappaannut ukiumut akitsuutaavoq 70.000 kr.
  • Pinnguaatit pingajuanniit amerliartorneri ilutigalugit ukiumut akitsuutaavoq 76.000 kr.

Akiligassap allagartaata tiguneraniit pinnguaatinut akitsuut qaammatit ulluisa qulingat nallertinnagu akitsuut akilerneqartassaaq. Assersuutigalugu juunimi akiligassinneqaruit kingusinnerpaamik 10. juuli akilereersimassavat. Akiliinngikkuit immikkut 400,00 kr.-nik akiliisinneqassaatit, pinnguaammut ataatsimut.

Sullissivik.gl-mi annerusumik atuaruk