Meeqqat inuusuttullu – Pisinnaatitaaffiit

Meeqqat inuunermik ingerlatsinissamut pisinnaatitaaffeqarput, imaattunik

  • angajoqqaaminnit pilersorneqassallutik
  • paaqqutarineqassallutik, nerisinneqassallutik atuartinneqassallutillu
  • nakuusernermut imaluunniit sioorasaarinermut illersorneqassallutik
  • kinguaassiutitigut atornerlunneqarnissamut, angerlarsimaffimmi allanilu, illersorneqassallutik
  • inuit akornanniinnissamut piginnaasanik ineriartortitsissallutik

Angajoqqaat meeqqaminnik isumaginnissinnaanngippata isumaginnikkumanngippataluunniit, kommune ikiuuttussaavoq. Kommunip meeraq qitiusumut inississavaa. Tamatuma kingunerissavaa, meeqqap pisariaqartitaanut naleqquttumik ikiorsiinermik neqerooruteqarneq.

Pisuni ilungersunartuni, angajoqqaat suleqataajumanngippata, pinngitsaaliilluni ikiorsiilluni iliuutsinik kommune ingerlatsisinnaavoq.

Kommunimut tunngatillugu meeqqap pisinnaatitaaffii
Tunngaviusunik pisinnaatitaaffiit saniatigut, kommune ikiuuttussaatillugu meeqqat aamma immikkuullarissunik pisinnaatitaaffeqarput. Inatsisitigut aalajangersarneqartumik periutsit malillugit kommune ikiuutissaaq, suliassallu makkuupput:

  • Misissuineq
  • Iliuusissatut pilersaarut
  • Suliniuteqarneq
  • Iliuusissatut pilersaarummik nalilersuineq

Misissuinermut atatillugu pisinnaatitaaffiit
Meeraq ajornartorsiuteqartoq kommunimit maluginiarneqarpat, assersuutigalugu innuttaasup kommunimut nalunaaruteqarneratigut, misissuineq aallartinneqassaaq. Misissuinermi suut ajornartorsiutaanersut qanorlu annertutiginersut qulaajaaffigineqassapput. Meeqqamik, angajoqqaanik pisariaqarpallu ilaqutaasunik allanik, peqqissaasumik, nakorsamik, paarsisartumik, perorsaasumik, ilinniartitsisumik, sanilerisamik imaluunniit inunnik allanik apersuinikkut oqaloqateqarnikkullu misissuineq kommunip ingerlatissavaa.

Meeraq 15-it sinnerlugit ukioqaruni, tusarneqarnissaminut pisinnaatitaavoq meeqqallu qanoq ikiorneqarnissaanut aalajangeeqataasinnaalluni. Meeraq qulit 15-illu akornanni ukioqaruni, sapinngisamik meeraq oqaloqatigineqassaaq. Tassa imaappoq, meeqqap nammineq pisut pillugit oqaatigiumasani oqaluttuarissallugit pisinnaatitaavoq kissaatigisaminillu saqqummiilluni.

Iliuusissatut pilersaarummut atatillugu pisinnaatitaaffiit
Aalajangersimasumik suliniuteqartoqarnissaanik pisariaqartitsisoqartoq misissuinerup takutippagu, pisariaqartumik ikiuinissamut iliuusissat aallartinneqarnissaat kommunip isumagisussaavaa.

Meeraq angerlarsimaffiup avataanut inissinneqassasoq ikiorsiilluni iliuuserineqartut pilersippatigit, iliuusissatut pilersaarummik suliaqartoqassaaq.

Meeqqat inuusuttullu qulit sinnerlugit ukiullit, iliuusissatut pilersaarummik imminerminnut tunngasumik suliaqarnermut atatillugu tusarneqarnissaminnut pisinnaatitaaffeqarput. Meeqqat qulit inorlugit ukiullit, sapinngisamik isummaminnik anissinissamut periarfissinneqassapput.

Meeqqap angerlarsimaffiup avataanut inissinneqarnissaa iliuusissatut pilersaarummi ilaatinneqarpat, meeraq (aamma angajoqqaat) inuttut siunnersuisoqarnissamut pisinnaatitaaffeqarput. Inuttut siunnersuisuusoq taanna tapersersortitut taaneqarsinnaavoq, meeqqap inuunerminik ingerlatseqqinnissaanut ineriartoqqinnissaanullu aamma inuttut atukkaminik aalajaatsunik ilusilersorluakkanillu peqalernissaanut ikiuisussaq.

Suliniuteqarnermut atatillugu pisinnaatitaaffiit
Suliniuteqarneq ikiorsiissutinik assigiinngitsunik arlalinnik ilaqarsinnaavoq. Iliuusissatut pilersaarummi suliniuteqarneq nassuiarneqarlunilu aqunneqarpoq. Suliniuteqarneq pitsaanngitsutut meeqqap isumaqarfigigunigit imaluunniit suliniuteqarnermut pissutsit aallaaviusut allannguuteqarpata meeqqap kommune saaffigeqqissallugu pisinnaatitaaffeqarpoq.

Meeraq angerlarsimaffiup avataanut inissinneqarsimappat, taava pisinnaatitaavoq

  • qanoq sivisutigisumik angerlarsimaffiup avataanut inissinneqassalluni paasissallugu
  • inuttut siunnersuisoqassalluni
  • ilaquttani ilagisinnaallugit. Tassa imaappoq, meeraq akuttunngitsumik angajoqqaaminut imaluunniit paaqqinnitsiminut attaveqarsinnaatitaavoq, tamatumani angajoqqaat attaveqarfiginerat meeqqamut akornutaasoq kommunimit nalilerneqarsimanngippat

Inissiineq sapinngisamik meeqqamut ajornaannerpaatikkumallugu kommunip inissiinissaq pilersaarusiussavaa. Taamaammat meeqqap angerlarsimaffiup avataanut inissinneqarnissani sioqqullugu ikinngutini ilaquttanilu piffissaqarluarluni inuulluaqqunissaannut pisinnaatitaavoq.

Iliuusissatut pilersaarummik nalilersuinermut atatillugu pisinnaatitaaffiit
Iliuusissatut pilersaarut ukiumut ikinnerpaamik ataasiarluni nalilersorneqartassaaq imaluunniit tamanna pisariaqartinneqarpat, assersuutigalugu meeqqap angajoqqaavi atornerluisuujunnaarsimappata.

Iliuusissatut pilersaarummik nalilersuinermut atatillugu, meeraq tusarneqarnissaminut pisinnaatitaaffeqarpoq allannguutissanillu saqqummiussisinnaalluni. Meeqqap angerlarsimaffiup avataanut inissinneqarnissaa imaluunniit angerlarsimaffiup avataani inissinneqarsimanerata ingerlaannarnissaa iliuusissatut pilersaarummi ilaatinneqarpat, meeraq suli inuttut siunnersuisoqarnissaminut pisinnaatitaaffeqarpoq.

Sullissivik.gl-mi annerusumik atuaruk