Meeqqanut tapiissutit

Meeqqanut tapiissutit pisortat aningaasatigut ikiorsiissutigaat, angajoqqaat meeqqaminnut pilersuinissaminnut atatillugu pissarsiarisinnaasaat.

Piumasaqaatit
Meeqqanut tapiissutinik pissarsiniaraanni piumasaqaatit arlallit naammassineqarsimasussaapput­:

  • Siullertut meeqqap angajoqqaavisa ukiumut isertittagaasa 280.000 kr.-it sinnersimassanngilaat
  • Angajoqqaajusut najugaqatigiippata isertittagaat tamarmiusut aallaavigineqassapput
  • Meeraasoq angajoqqaami aappaannaani najugaqarpat, taassuma isertitaa aallaaviussaaq. Angajoqqaaq taanna inooqateqarpat, inooqatigiinnerallu ukioq ataaseq sinnerlugu sivisussuseqarsimappat, inooqatigineqartup isertitai ilanngullugit aallaavigineqassapput
  • Meeraasoq angajoqqaamini sivisoqatigiimmik najugaqartarpat, angajoqqaajusup inuit allattorsimaffianni meeqqap najugaqarfigalugu nalunaarfigisimasaata isertitatigut atugai aallaavigineqassapput

Isertitatigut piumasaqaataasup saniatigut piumasaqaatit arlallit eqquutsinneqarsimasussaapput:

  • Meeraq 18-it inorlugit ukioqassaaq
  • Meeraq Kalaallit Nunaanni najugaqassaaq inuillu allattorsimaffianniissalluni
  • Meeraq dansk-isut innuttaassuseqassaaq
  • Inuusuttoq imminut pilersortuussanngilaq, naartusuunani imaluunniit nammineerluni meerartaarnikuussanani
  • Inuusuttoq katissimasuussanngilaq
  • Meeraq inuusuttorluunniit pisortanit angerlarsimaffiup avataanut inissinneqarsimasuussanngilaq

Meeqqanut tapiissutit pissarsiassatit uani bt.kaqa.gl naatsorsorsinnaavatit.

Isumamineersumik aningaasanik pissarsisinnaaneq
Meeqqanut tapiissutit pissarsiarinissaat qinnutigissanngilat. Aamma kommunimut allamut nuukkaluaruilluunniit.

Angajoqqaat, meeqqanut tapiissutinik pissarsisinnaanermut pisinnaatitaasut, meeqqanut tapiissutinik isumamineersumik tunniussiffigineqassapput. Tamanna kommunimit nalunaarsuiffiit assigiinngitsut assersuutigalugu, inuit allattorsimaffiat aqqutigalugu paasissutissat pigineqartut atorlugit meeqqanut tapiissutit naatsorsornerinik tunniunneqarnissaannillu isumaginnittuusumit isumagineqartarpoq.

Aningaasaqarnerit allannguuteqassappat – assersuutigalugu utoqqalinersiuteqalissaguit imaluunniit piffissami sivisunerusumi napparsimalissagaluaruit, kommunimut paasissutissiissallutit pisussaavutit.

Kalaallit Nunaanni ”nem-konto”-mik taaneqartartumik soqanngilaq, pissutsini amerlanerpaani konto-t pillugit paasissutissat pigisatit kommunimit ilisimaneqartarput meeqqanullu tapiissutit illit aningaaserivimmi konto-nnut ikineqarsinnaapput, assersuutigalugu aningaasarsinermi konto atortakkannut.  Taamaattorli paatsoortoqaqqunagu, tamatigut kommunimut konto-nnut paasissutissat nalunaarutigisassavatit. Aningaaserivimmi konto-qanngikkuit, meeqqanut tapiissutit check-inngorlugit imaluunniit allagartatut pisiniutissanngorlugit pissarsiarisinnaavatit.

Meeqqanut tapiissutit qaammatit tamaasa tunniunneqartarput.

Malugiuk
Kalaallit Nunaannut nuussimaguit, kommunimut najugaqarfigilikkannut nalunaarsortikkiartussaatit. Taamatut ilioreeruit aatsaat meeqqanut tapiissutit pissarsiassatit tunniunneqarsinnaalissapput.

Sullissivik.gl-mi annerusumik atuaruk