Meeqqanut akilersuutit

Angajoqqaat meerarisamik pilersornissaannut pisussaaffeqarput. Angajoqqaajusup arlaata meeqqanut pilersuisussaatitaanini naammassinngippagu angajoqqaajusup aappaataa aapparmi meeqqanut akilersuutinik akiliisalernissaa qinnuteqaatigisinnaavaa. Meeqqap 18-inik ukioqalernissaata tungaanut akilersuutinik akiliisarneq nalinginnaasuuvoq.

Angajoqqaajusup meeqqamik najortillip – imaluunniit najorteqarnerusartup – angajoqqaajusup aappaata meeqqamut akilersuutinik akiliisalernissaanik qinnuteqaateqarsinnaanera nalinginnaasuuvoq.

Akilersuutip annertussusia
Akilersuutip annertussusia angajoqqaap akilersuisuusup isertittagaasa annertussusiat apeqqutaatillugu annertussusilerneqartarpoq. Taamaattorli akilersuut akilersuummit nalinginnaasumit annikinnerusussaanngilaq.

Meeqqap sumi najugaqarnera apeqqutaatillugu nalinginnaasumik akilersuut annertussusilerneqartarpoq:

  • Meeraq Kalaallit Nunaanni najugaqarpat nalinginnaasumik akilersuut Namminersorlutik Oqartussanit annertussusilerneqartarpoq. Nalinginnaasumik akilersuutip annertussusia Naalagaaffiup Sinniisoqarfiata nittartagaani atuarsinnaavat
  • Meeraq Danmark-imi najugaqarpat nalinginnaasumik akilersuut Social og Integrationsministeriet-imit annertussusilerneqartarpoq. Nalinginnaasumik akilersuutip Danmark-imi annertussusia Familiestyrelsen-ip nittartagaani uani www.familiestyrelsen.dk atuarsinnaavat

Akilersuut qaffataq
Angajoqqaajusoq qaffasissumik isertitaqartartoq akilersuummik qaffatamik akilersuisalersinnaavoq. Imaappoq akilersuut akilersuummit nalinginnaasumit qaffasinnerulissaaq.

Akilersuutit immikkut ittut
Meeqqamut ataasiartumik akiliutit ilaatigut qinnuteqaatigineqarsinnaapput. Taakku tassaagajupput ataatsikkut ataasiartumik akiligassat meeqqap

  • Inunngornerani
  • Kuisinnerani
  • Apersortinnerani

Aamma pisut immikkut ittut tunngavigineqarsinnaapput. Akilersuutit immikkut ittut Naalagaaffiup Sinniisoqarfiata nittartagaani atuarneqarsinnaapput.

Ilinniarnermut akilersuutit
Meeraq 18-inik ukioqaleraangat meeqqamut akilersuisussaatitaaneq atorunnaartarpoq. Taamaattorli meeraq ilinniagaqarpat ilaatigut 24-inik ukioqalernissaata tungaanut akilersuutinik pisartagaqarsinnaavoq. Tassani anaanaasup ataataasullu isertittagaat apeqqutaasarput.

Sullissivik.gl-mi annerusumik atuaruk