Ineqarnermut tapiiffigineqarnissamik qinnuteqarit

Ineqarnermut tapiissutit inoqutigiinnut inissiami attartukkami ineqartunut tunniunneqarsinnaapput. Ineqarnermut tapiissutit inoqutigiit maannakkut aningaasarsiaasa annertussusaat kiisalu meeqqat inigisami aalajangersimasumik najugaqartut amerlassusaat tunngavigalugit tunniunneqassapput.

Piumasaqaatit
Ineqarnermut tapiissutinik taamaallaat pissarsisinnaavutit:

  • Attartorlutit ineqaruit
  • Attartornermut isumaqatigiissuteqaruit
  • Aningaasarsiatigut atugarisat aalajangersakkani piumasaqaataasunut naapertuuppata

Naatsorsuineq
Inoqutigiit amerlaqataannik initalimmut isersimaartarfilimmullu ineqarnermut tapiissutinik pisinnaavutit. Tassa ineqarnermut tapiissutinik pisinnaavutit imaattoqarpat:

  • Marlunnik initalik, illumi kisimiittuuguit
  • Pingasunik initalik, illumi marluugussi
  • Sisamanik initalik, illumi pingasuugussi
  • Tallimanik initalik, illumi sisamaagussi

Inoqutigiit tamarmiusut maannakkut aningaasarsiatut isertitaat:

  • 180.000 kr. inoqutigiinnut meerartaqanngitsunut
  • 372.000 kr. inoqutigiinnut 1-mik meerartalinnut
  • 396.000 kr. inoqutigiinnut 2-nik meerartalinnut
  • 408.000 kr. inoqutigiinnut 3-nik meerartalinnut
  • 416.000 kr. inoqutigiinnut 4-nik meerartalinnut
  • 428.000 kr. inoqutigiinnut 5-nik meerartalinnut
  • 444.000 kr. inoqutigiinnut 6-nik amerlanernilluunniit meerartalinnut

Utoqqalinersiutilimmut imaluunniit siusinaartumik pensionisialimmut maannakkut isertitaannit 4.100 kr. ilanngaatigineqartassaaq.

  • Nalinginnaasumik annertunerpaamik tunniunneqartarput: ukiumut 60.000 kr. / qaammammut 5.000 kr.
  • Ataatsimik sinittarfilimmut annertunerpaamik tunniunneqartarput: ukiumut 18.000 kr. / qaammammut 1.500 kr.
  • Minnerpaamik tunniunneqartarput: ukiumut 1.200 kr. / qaammammut 100

Qinnuteqarneq
Ineqarnermut tapiissutinik qinnuteqarniaruit, immersuiffissaq immersussavat.

Immersukkamut attartornermut isumaqatigiissutit ilanngutissavat.

NemID’mik peqaruit, ineqarnermut tapiissutinik attaveqaatitigut toqqaannartumik qinnuteqarsinnaavutit.

NemID’mik peqanngikkuit, immersukkat ilanngussassat pisariaqartut ilanngullugit najukkanni innuttaasunut sullissivimmut imaluunniit nunaqarfiup allaffianut tunniutissavat. Tassanittaaq qinnuteqarnissamut immersuiffissap immersorneranut ikiorneqarsinnaavutit.

Attartornermut isumaqatigiissut pissarsiareriarukku qinnuteqarsinnaavutit.

Malugiuk
Ukiut tamaasa qinnuteqartariaqanngilatit. Ukiut tamaasa ineqarnermut tapiissutit naatsorsorneqartarput, kommunimiillu allagarsissaatit qanoq annertutigisumik taperneqartassanerlutit. Allakkat tigoreernerannit tapiissutit annertussusaat allanngortissappata, najukkanni innuttaasunik sullissivimmut imaluunniit nunaqarfiup allaffianut saaffiginnissaatit.

Inissiamut allamut nuukkuit qinnuteqaqqissaatit.

Nalunngikkaluarlugu ineqarnermut tapiissutisisinnaanak tapiissutisisarsimaguit akiligassinneqarsinnaavutit.

Naammagittaalliuuteqarneq
Ineqarnermut tapiissutinik qinnuteqarsimaguit, qinnuteqaatillu tamakkiisumik taperserneqarsimanngippat, kommune tunngavilersuinissaminut naammagittaalliuteqarnissamullu ilitsersuinissamut pisussaaffeqarpoq.

Naammagittaalliuteqarumaguit, Isumaginninnermi Naammagittaalliuteqartarfimmut taama iliorsinnaavutit.

Allaaserisat attuumassutillit ataanni Isumaginninnermi Naammagittaalliuteqartarfimmut qanoq naammagittaalliuteqassanersutit atuarsinnaavat.

  • Kommuneqarfik Sermersooq

    Ineqarnermut tapiissutinik qinnuteqalernermi eqqaamasassat:

    • Attartornermut isumaqatigiissut atsiugaq
    • Inuit allattorsimaffiannit nutsernermut uppernarsaat
    • Qaammatini pingasuni kingullerni akissarsiat allagartaat
      • Qaammammusiaqaruit: akissarsiat allagartaat 3-t
      • Ullut 14-kkaarlugit akissarsiaqaruit: akissarsiat allagartaat 6-it
    • Avissimaguit avinnermut uppernarsaat, averusersimaguit averusernermut uppernarsaat
    • Ilinniartuunermut isumaqatigiissut/atuarfimmit ilinniartuunermut uppernarsaat
    • Qinnuteqaammi immersugassaq tamakkiisumik immersorneqassaaq

    EQQAAMALLUGU! Nuussaguit ineqarnermullu tapiissutisisarlutit qaammat ataaseq sioqqullugu kommunimut nalunaarutigissagakku.

    Kommuneqarfik Sermersuumi ineqarnermut tapiissutinik qanoq annertutigisumik pissarsisinnaanerlutit naatsorsoruk

Sullissivik.gl-mi annerusumik atuaruk