Ilinniarnermi siunnersorteqarneq

Ilinniarneq aqqutigalugu iluaqutigisassannik ilisimasaqalissaatit, inuunivit sinnerani atorsinnaasannik. Ilinniagaqarsimaguit suliffittaarnissannut periarfissatit annertunerulersissavatit.

Suliffeqarnerit, suliffissaaleqisuunerit, ilinniartuunerit imaluunniit meeqqat atuarfiannit soraarummeersimannginnerit matumani apeqqutaanngilaq. Illit najukkanni Piareersarfik aqqutigalugu qanoq ilineratigulluunniit pisortatigoortuunngitsumik inuussutissarsiutitigut ilinniartitaanermut aamma ilinniagaqarneq pillugu siunnersortittuarsinnaavutit.

Ilinniarnissamut piareersarumaguit, taava illit najukkanni Piareersarfik saaffigisinnaavat. Tassani inuussutissarsiutitigut ilinniartitaanermut aamma ilinniagaqarnermut siunnersortip nunatsinni ilinniarneqarsinnaasut tamaasa, assersuutigalugu GUX imaluunniit inuussutissarsiutitigut ilinniartitaanerit pillugit siunnersorsinnaavaatit. Danmark-imi ilinniarneqarsinnaasut pillugit aamma siunnersortissinnaavutit. Assersuutigalugu højskole-rnissamut tunngasuusinnaavoq.

Piareersarfimmut ilinniagaqarnermut atatillugu siunnersortikkumallutit saaffiginnikkuit, illit atukkannut pisariaqartitannullu naleqquttumik iliuusissatut pilersaarummik siunnersuisartoq suliaqassaaq. Ilinniagaqalerumallutit aqqusaagassatit iliuusissatut pilersaarummi nassuiaasersorneqassapput. Assersuutigalugu meeqqat atuarfianni angusavit qaffassarnissaannut Inuussutissarsiutinik ilinniagaqalersinnaanissamut piareersarfik akuerisaasoq aqqutigalugu piareersarnissat taassuma imarisinnaavaa.

Siunnersuisartup iliuusissatut pilersaarummik naleqquttumik suliaqarnissaa angujumallugu, makku nassartussaavatit:

  • najugaqarnermut uppernarsaat
  • kuisinnermut allagartaq
  • 10. klasse-nermi misilitsinnermi angusat allassimaffiat
  • AEU modul 2-neermit misilitsilluni angusat imaluunniit sulisitsisuit oqaaseqaataa
  • Ilinniagaqarsimaninnut uppernarsaatit

18-it inorlugit ukioqaruit, angajoqqaannit imaluunniit inummit isumaginnittunnit atsiorneq akuersissut siunnersuisartumut nassassavat. Angajoqqaatit imaluunniit inuk isumaginnittuusoq aamma ilagisinnaavat.

Video-nik paasitsitiniutit uani takusinnaavatit sorleq ilinniarfissaq toqqassanerlugu.

Malugiuk
Nunaqarfigisanni Piareersarfeqanngippat, Piareersarfik qaninnerpaaq sianerfigaluguluunniit nunaqarfimmi allaffimmut saaffiginnissaatit.

Danmark-imi najugaqaruit imaluunniit Danmark-imi ilinniagaqarnissamut periarfissat pillugit siunnersortikkumaguit, Kalaallit Illuinut saaffiginnissaatit.

Siunnersuisartut nipangiusimasussaatitaapput. Oqallisigisasi tamaasa illit siunnersuisartullu kisimik pigissavasi.

Ilinniagaqarnersiutit pillugit paasisaqarumaguit, annertunerusumik saqqummiussani allani tamanna atuarsinnaavat.

Sullissivik.gl-mi annerusumik atuaruk