Ilinniagaqarnersiutit

Ilinniagaqarnersiutit tassaapput tapiissutit ilinniartuuguit qinnuteqaatigisinnaasatit. Taakku tapiissutaapput ilinniartuuninni aningaasaqarniarninnut tapertaasussat. Ilinniagaqarnermut tapissutit makkuusinnnaapput:

  • aningaasat ikiorsiissutit
  • ilinniagaqarnermi akissarsiat
  • ilinniarnermut atasumik taarsigassarsiat
  • akiliunneqarluni angalanerit
  • usinik angallassinerit
  • meeqqanut tapiissutit
  • atuakkanut tapiissutit
  • assartuutinut tapiissutit

Pingaaruteqarpoq ilinnialertinnak piumasaqaataasut atugassarititaasullu, ilinniarnermut ilinniagaqarnersiutillu pillugit maleruagassanut iluamik paasisaqarsimanissaq.

Maleruagassat piumasaqaatillu
Tunngaviusumik ilinniakkamut ataatsimut qaffasinnerusumulluunniit ilinniarninni ilinniagaqarnersiuteqarsinnaavutit. Tamatuma kingorna ilinniagaqarnersiuteqarnissamut piumasaqaataavoq ilinniakkap siusinnerusukkut ilinniagarisimasamut pissusissaatut nangitsineruppat suliaqarfiusullu pineqartup iluani qaffasinnerusumiittussaappat.

Tunngaviusumik ilinniakkaniit appasinnermik (soorlu ikiortitut ilinniarnerit ukiunik marlunnik sivisussusillit), aappassaaneerluni ilinniagaqarniarnermi ilinniagaqarnersiutit pinissaanut akuersisoqarsinnaavoq.

Ilinniakkanut assigiinngitsunut pingasunut ilinniagaqarnersiutinik pisinnaavutit:

Inuussutissarsiutinut tunngaviusumik ilinniartitaanerit

  • Inuussutissarsiutinut ilinniakkat akunnaatsut
  • Inuussutissarsiutinut tunngaviusumik ilinniarnerit tamakkerlugu ilinniartutut akissarsiaqassaatit

Ilinniagaqarnissamut piareersarluni ilinniartitaanerit

  • Ilinniagaqarnissamut piareersarluni ilinniartitaanerit ilinniarnertuunngorniarfiupput soorlu GU (gymnasia), HHX (qullasissumik niuernermik ilinniarneq), HTX (qullasissumik teknikkimut tunngasunut soraarummeerneq)
  • Ilinniagaqarnissamut piareersarluni ilinniartoq qaffasinnerusumik ilinniartitaanermut piginnaanngorsarneqassaaq
  • Ilinniagaqarnissamut piareersarfimmi ilinniarnerit tamakkerlugu aningaasatigut ikiorneqassaatit

Qaffasinnerusumik ilinniartitaanerit

  • Qaffasinnerusumik ilinniartitaanerit teoriimut tunngasunik ilinniarnerupput
  • Qaffasinnerusumik ilinniarninni aningaasatigut ikiorneqassaatit qiortartakkat atorlugit

Sullissivik.gl-mi annerusumik atuaruk