Erninermi ullormusiat

Erninermut atatillugu sulinngiffeqarneq tassaavoq piffissaq, meeqqap inunngorneranut atatillugu angajoqqaanngortut imaluunniit meeravissiartaarnermut meeqqamik paarsinissamut suliffimminnit sulinngiffeqarallarsinnaanermut pisinnaatitaaffeqarfigisaat. Erninermi ullormusiat aningaasaqarnikkut ikiorsiissutaapput, angajoqqaat erninermut atatillugu sulinngiffeqarnerminnut pissarsiarisinnaasaat. Angajoqqaanngortussaaguit pisortaniillu piffissami siusinnerusukkut ikiorsiiffigineqarnak, erninermi ullormusiaqarneq pillugu malittarisassanut ilaavutit.

Erninermi ullormusianik pisartagaqarsinnaavutit illit

  • Kalaallit Nunaanni najugaqartutut inuit allattorsimaffianni nalunaarsorsimaguit
  • sapaatit akunneri kingulliit 13-it ingerlaneranni minnerpaamik akunneq ataaseq sulisimaguit
  • sulinngiffeqarnerup nalaani sulisitsisunnit akissarsiaqanngikkuit

Erninermi ullormusianik pisartagaqarsinnaanngilatit illit

  • pisortanit pilersorneqaruit (assersuutigalugu siusinaartumik pensionisiaqaruit, utoqqalineq pissutigalugu pensionisiaqaruit imaluunniit pisortat ikiorsiissutaannik pisartagaqaruit)

Sulinngiffeqarnerit assigiinngitsut pigineqarput:

  • Naartunermi sulinngiffeqarneq sulinngiffiuvoq, erninissaq sioqqullugu naartusup sapaatit akunnerini marlunni atorsinnaasaa
  • Anaanaasup erninermut atatillugu sulinngiffeqarnera sapaatit akunnerinik 15-inik sivisussuseqarpoq, anaanaasup erninerup kingorna atorsinnaasatut pisinnaatitaaffigisaa
  • Ataataasup erninermut atatillugu sulinngiffeqarnera sapaatit akunnerinik pingasunik sivisussuseqarpoq, ataataasup erninerup kingorna atorsinnaasatut pisinnaatitaaffigisaa. Anaanaasup erninermut atatillugu sapaatit akunnerini 15-ini sulinngiffeqarnerata ingerlanerani sulinngiffeqarneq ingerlanneqassaaq
  • Angajoqqaat erninermut atatillugu sulinngiffeqarnerat sapaatit akunnerinik 17-inik sivisussuseqarpoq. Taanna anaanaasup sapaatit akunnerini 15-ini sulinngiffeqarneranut sivitsuinertut ingerlanneqartussaavoq. Sulinngiffeqarneq angajoqqaat ataatsikkut ingerlassinnaanngilaat

Sivitsukkamik sulinngiffeqarneq

  • Erninissaq sioqqullugu sulinngiffeqarneq anaanaasup sivitsortissinnaavaa. Tamanna peqqissutsimut aarlerinaateqartoqarpat pisinnaavoq, nakorsallu allagarsiussatut uppernarsaataa matumani pisariaqarpoq
  • Marlulissanik erninermi anaanaasoq erninermut atatillugu sapaatit akunnerini 19-ini sulinngiffeqarsinnaavoq aamma angajoqqaat sapaatit akunnerini 21-ni sulinngiffeqarsinnaapput, taakku avillugit
  • Anaanaasup immikkut ittumik sapaatit akunnerini 13-ini sulinngiffeqarnini sivitsorsinnaavaa, meeraq napparsimmavimmut unitsinneqarpat. Meeqqap napparsimavimmi uninngasimanera nakorsamit uppernarsarneqassaaq

Malugiuk
Inuttut atukkatit aamma aningaasaqarnikkut atukkatit allannguuteqarpata ilisimatitsinissannut pisussaaffeqarputit. Allannguutit erninermi ullormusiannut sunniuteqarsinnaapput.

Erninermut atatillugu sulinngiffeqarnivit nalaani akissarsiaqaruit, erninermi ullormusianik pisartagaqarnissat annaassavat.

Erninermi ullormusiaqarnissamik qinnuteqaatinnut itigartinneqaruit, aalajangiineq allaganngugaq tunngavilersuummik ilaqartoq pissarsiarissallugu pisinnaatitaavutit, aalajangiinerlu pissarsiarisat pillugu naammagittaalliornissamut pisinnaatitaavutittaaq.

Sullissivik.gl-mi annerusumik atuaruk