Arfernik angisuunik piniarneq

Arfernik angisuunik arlalinnik piniarsinnaaneq akuerisaavoq. Tassaapput arfivik, tikaagulliusaaq, tikaagullik aamma qipoqqaq, taakku tamarmik piniarneqartarput neqaat, mattaat, orsuat aamma soqqaat pillugit. Arferit assigiinngitsut sisamaasut tamarmik kitaani sineriaata aamma kangiata sineriaata avataani uumasuupput.

Arfernik angisuunik sisamanik piniarneq pisassiissutinik killilerneqarpoq. Nunani tamalaani Arfanniartarneq pillugu Isumasioqatigiissitap (Den Internationale Hvalfangstkommission (IWC)) ukiunut tallimanut pisassiissutit annertussusissaat aalajangersartarpai biolog-init siunnersuineq tunngavigalugu. Aammattaaq Atlantikup Avannaani Imaani miluumasut pillugit Isumasioqatigiissitaq (Den Nordatlantiske Havpattedyrskommission (NAMMCO)) biolog-init siunnersuisuuteqartarpoq.

Arfernut angisuunik pisassiissutit marloriarlugit agguaanneqartarput. Siullermik Naalakkersuisut pisassatut pisassiissutit annertussusiat aamma nunami agguaanneqartarnissaat aalajangersartarpaat Agguaassisartoqatigiit, APNN-imit, Kalaallit Nunaanni Aalisartut Piniartullu Kattuaffianit (KNAPK) aamma Kalaallit Nunaanni Kommunit Kattuffianit (KANUKOKA) inuttaqartoq isumasioqatigalugit. Tamatuma kingorna kommunit najukkani KNAPP-it isumasioqatigalugit nunap immikkoortortaani pisassatut pisassiissutit agguaattarpaat. Nunap immikkoortortaani agguaassineq qinnuteqareernerup kingorna pisarpoq. Pisassiissutit uumasoqatigiinnut ataasiakkaanut ukiumullu ataatsimut atuuttarput.

Arfernik angisuunik sisamanik piniassaguit makku pigissavatit

  • inuussutissarsiutigalugu piniarsinnaanermut aallaaniarsinnaanermullu allagartaq atuuttoq
  • uumasumut piniarusutarnut pisaqarsinnaanissamut akuersissut
  • piniarnermut sakkut peqqussutaasut atortassallugit

Qamutillit arfanniutit qaartartortalinnik tuukkartallit arfanniarnermi atornissaanut piumasaqaataavoq inuit qamutilinnik arfanniutinik qaartartortalinnik atuinissamut pikkorissarsimanermut atorsinnaasumik uppernarsaatillit kisimik, taamaattunik pisisinnaallutillu passussisinnaasut.

Malugiuk
Kikkut tamarmik arfermik angisuumik pisaqarsimasut, pisussaaffeqarput najukkami qitiusumik sullissivimmut timaanit misissugassatut tigusamik tunniussisussaatitaanermut paasissutissartalerlugit arferup suuneranik, pisarineqarsimanerani ulloq sumiiffillu ilanngullugit. Timaanit misissugassatut tigusaq Pinngortitaleriffimmut nassiuteqqinneqassaaq, taakku taanna atortarpaat arfeqassutsip qanoq ittuuneranut nakkutilliinermut.

Sullissivik.gl-mi annerusumik atuaruk