Aalisarnermik nakkutilliineq – nalinginnaasumik paasissutissiineq

Aalisarnermut, Piniarnermut Nunalerinermullu Naalakkersuisoqarfiup pinngortitami pissusilersortarnerput pinngortitamillu atuisarnerput pillugu maleruagassanik aqutsinissaq suliassaraa. Suliassanullu ilaavoq aalisarnermik nakkutilliineq.

Aalisarnermik nakkutilliineq pisortat oqartussaaffigaat, qularnaassallugu aalisarneq naalakkersuinikkut suliallit aamma suliniaqatigiiffiit soorlu North Atlantic Fisheries Organization-ip (NAFO) aamma North East Atlantic Fisheries Commission-ip (NEAFC) maleruagassatut aalajangigaat malillugit ingerlanneqassasoq. Aalisarnermut tunngasutigut aalajangersakkat qulakkiissavaat, aalisarneq illersorneqarsinnaasumik nungusaataanngitsumik ingerlanneqassasoq, assersuutigalugu aalisakkat ataasiakkaat piujuaannartitsineq aallaavigalugu aalisarneqarnissaat.

Aalisarnermik nakkutilliineq ilaatigut aalisarnerup nakkutigineqarneratigut ilaatigullu pisarisat nalunaarsorneratigut pisarpoq.

Aalisarnermik nakkutilliineq oqartussaqarfinnit marlunnit ingerlanneqartarpoq; Kalaallit Nunaanni Aalisarsinnaanermut Akuersissutinik Nakkutilliisoqarfik (KANUAANA/GFLK), Piniarnermik Aalisarnermillu nakkutilliisunik atorfeqartitsisoq aamma Kalaallit Nunaanni Sakkutooqarfik (GLK). KANUAANA aamma GLK aalisarnermik nakkutilliinertik ingerlattarpaat maleruagassat malillugit soorlu makkuusut:

  • kina aalisarsinnaatitaava
  • sumi aalisartoqarsinnaava
  • qanoq pisassat amerlatigippat
  • qaqugu aalisartoqarsinnaava
  • atortut suut atorneqartussaappat
  • periutsit suut atorneqartussaappat
  • angallatit suut atorneqartussaappat

Sunngiffimmi imaluunniit inuussutissarsiutigalugu aalisartuugaluaruilluunniit, aalisarnermi maleruagassat ilisimaarinissaat malinnissaallu pisussaaffigaat. Maleruagassat malinngikkukkit, inatsisitigut malersorneqaratarsinnaavutit, assersuutigalugu akiligassinneqarsinnaavutit imaluunniit atortuutitit pisatilluunniit arsaarinnissutigineqarsinnaapput.

Malugiuk
Aalisarnermik nakkutilliinermi suleqatigiinnissamut pisussaaffeqarputit. Taamak iliunngikkuit mianersoqqussummik tunineqarsinnaavutit imaluunniit politiinut nalunaarutigineqarsinnaavutit akiligassinneqarlutillu.

Sullissivik.gl-mi annerusumik atuaruk