Innuttaasunut

Knud Mathiassen – Juullimi eqqaamasanni nuannernerpaaq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.


Kommuneqarfik Sermersuup juullimi ammartagaa juullernissaata tungaanut ingerlavoq. Kommunalbestyrelsimi ilaasortat apersornikuuagut ukiup ingerlanerani suliaminni suut nuannarinersaasimaneraat aamma inuunerminni juullimi eqqaamasaminni suna nuannernersaanersoq.

Kommunalbestyrelsemi qinigaaqqammerpunga qaammatillu siulliit nutaarpassuarnik misigisaqarsimavunga ilinniutigalugillu. Piffissami tassani misilittagaqalersimavunga nutaarpassuarnik. Nuannersorpassuit aqqusaarsimavakka, ”anorersuarsiornerit”, artornartut, ilungersunartut kisianni aamma nuannersorpassuit.

Qinigaaqatikkalu oqaloqatigiikkaangatta, oqarasuaatikkuunnaanngitsoq, nuannisartaqaagut, qanimut oqaloqatigiilluta, paaseqatigiilluta, oqaluuserisassat imartuut eqqartorlugit.

Kommunalbestyrelsemut qineqqusaarniarlunga aalajangerama ”meeqqat ilaqutariillu” qineqqusaarutigisimavakka, taakkuummatami uummateqarfigisakka. Kisianni aamma inuussutissat sanaartornerlu aamma soqutigisaraakka.

Meeraaninni juullimi eqqaamasakka nuannernerpaat tassaapput Kuummiuni juulli. Nunaqqatigiilluta ataqatigiittorujussuusaratta kiisalu aamma qanilaarneq asanninnerlu misigisaqarfigisaratsigu. Juullip nalaani nunaqqatigiiulluta ilaqutariiullutalu assigiinngitsunik sammisaqartarpugut, nuannisarluta. Aamma meeraangallarama silatagiaasarpugut.

Inersimasunngorninni apeqqutaatippallaarneq ajorpara sumi juullisiornissaq. Nammineq juulli nuannersoq pilersittarparput. Nukappiaqqamut arfineq marlunnik ukiulimmut niviarsiaqqamullu marlunnik ukiulimmut ataataavunga, pisussaaffigaaralu meeqqama toqqissisimanissaat.

Kommuneqarfik Sermersuup juullimi unammisitsinerani #julenuuk-mut peqataanissat eqqaamajuk. Hashtag #julenuuk atorlugu Facebookimut Instagramimulluunniit assimik ikkussiguit unammisitsinermut peqataassaatit.