Nalunaarutit

Siulittaasumut nalunaarutit
 
Sanaartornermut immikkoortoqarfik kommunip allaffianut uterpoq
Sanaartornermut immikkoortoqarfik kommunip allaffianut uterpoq, septembarimili 2020-mi Issortarfik 1B-mi Iserit A/S allaffeqatigereerlugu.
Utertitsinermut siunertarineqarpoq ingerlatsiviup iluani aamma kommunimi tamarmi susassaqartut akornanni suleqatigiinnerup pitsaanerulersinnissaa.
 
Ingerlatsinermut Avatangiisinullu pisortaq – sulinngiffeqarnissamik qinnuteqaat
Allaffeqarfimmit Kommuneqarfik Sermersuumi fagchefitut atorfillip, Ingerlatsinermut Avatangiisinullu pisortaq, sulinngiffeqarnissamik qinnuteqaataa akuerineqarpoq.
Sulinngiffeqarneq atuutissaaq piffissami 1. oktobari 2021-miit 30. septembari 2022-p tungaanut.
 
Kommunimut pilersaarummut tapiliussaq 1C14-4, Nuutoqaq, Nuuk, ulloq 01.06.2021 akuersissutigineqarpoq.
Kommunimut pilersaarummut tapiliussap akuerineqarnera malillugu Immikkuualuttoq D allagartaliinikkut biilerfiujunnaarsinneqarpoq
Tamatuma kingorna immikkoortumukaassisarneq pillugu paasiniaasunik saaffiginnittoqartarpoq.
Ilaatigut neriniartarfimmiit Restaurant Unicorn-imit saaffiginnissuteqartoqarpoq, taannalu allaffeqarfimmiit oqaloqatigiinneq ingerlanneqarpoq.
 
Innuttaasumit saaffiginnissut illumik misiliummik nappaanissamik kissaateqarneq pillugu
Innuttaasoq piffissami sivisuumi ingerlatsivimmi pisortaasimasumik oqaloqateqartarsimavoq Nuummi misiliutaasumik illuliornissaq pillugu.
Innuttaasoq kommunimut pilersaarummi 1A18-imi, misiliutaasumik sanaartornermut atugassanngortinneqartumi, sanaartorfissamik innersuunneqarsimavoq.
Kommunimut pilersaarummi 1A18 aalajangersarneqarpoq: ”Sanaartugaq inissinneqassaaq aamma sammivilerneqassaaq imaalillugu, C. E. Janssensvejimi sanaartukkat sammivii malillugit, aamma qaliaasa sivingarngi assigiissillugit (immikkoortoq "Sanariaaseq" innersuussutigalugu")”
Innuttaasumit illup qaliai assigiissinneqarnissaat kissaatigineqanngilaq immikkullu akuerineqarusulluni.
Immikkut akuersissuteqarnissaq matumani allaffeqarfimmit itigartitasiissutigineqarpoq, kommunimut pilersaarummi immikkoortumut nutaamut pingaartinneqarmat sanaartoriaatsip ingerlateqqinneqarnissaa qitiutinneqarmat aamma illoqarfiup ilaatut Qaqortutut isikkoqartinneqarnissaa.
Innuttaasup kissaatigisimavaa tassunga tunngasoq sanarfinermut avatangiisinullu ataatsimiititamut saqqummiunnissaa. Innuttaasoq itigartinneqarpoq, suliaq allaffissornikkut suliarineqarsimanera tunngavilersuutigalugu.
 
ANGALLANNEQ PILLUGU PILERSAARUT IMM. 1: Nuummi aqquserngit aqqusineeqqallu – akuerineqarpoq ulloq 31-08-2021
Angallannermut pilersaarut imm. 1 malillugu ilaatigut pisuinnarnut sikkilertunullu tunngatillugu taakkununnga pitsanngorsaasoqarpoq.
Ataatsimiititami siulittaasumit allaffeqarfik peqatigalugu suliniutitut siullertut Ilimmarfiup eqqaani majuartarfiliornissaq aallartinneqarpoq.
Majuartarfiliortoqassaaq Ilimmarfimmut pisuinnaat atugaat pitsaanerulersinniarlugit. Maannakkut Ilimmarfimmut aqqut Maliup eqqaani kaajallattarfimmiit pisarpoq aamma sinerlugu aqqutikkut, tassani sangoriarnera takisooq pingaartumik pisuinnarnut sikkilertunullu navianaateqarsinnaavoq.
Sangoriaq takisooq sioqqullugu majuartarfiliornikkut taava pisuinnaat takisuumik aqqusinikkoornissaat pinngitsoortinneqassaaq aqqullu naannerulerluni.
 
Qinngutsinni majuartarfiit uppissimasut
Allaffeqarfiup siunnersuisoq nalunaarfigivaa taanna siunnersuisup akisussaaffigigaa. Siunnersuisup majuartarfiit nutaat marluk pilersaarusiorpai, taakkulu silamut akiuussinnaallutillu innuttaasunit isumannaatsumik atorneqarsinnaassapput. Majuartarfiit siunnersuisup akiligaanik iluarsaanneqarnissaat naatsorsuutigineqassaaq.
 
Tasiilami inissiat nutaat
Tasiilami maannakkut immikkoortoq 30A11-mi sanaartorfissagissaasoqarpoq, tassanilu sanaartorfissat nutaat pingasut pilersinneqassapput, illullu uiguleriiaatut isikkullit sananeqassapput. Sanaartorfissagissaaneq naatsorsuutigineqarpoq 2022-mi inaarneqassasoq, tamatumalu kingorna sanaartorfissani nutaanik inissialiortoqarsinnaalissaaq.
 
Upalungaarsimaneq – ilinniartitsinerit:
Iliuusissat tunngaviusut, Tasiilami piffissami 09-08-2021-miit 20-08-2021-mut – tassani pikkorissartunit 13-init 11-t angusipput
Nunaqarfimmi atuuffiit pillugit ilinniagaqarneq Tasiilami massakkut ingerlanneqarpoq. 30-08-2021-miit 12-09-2021-mut – pikkorissartut 17-it tallimanngornermi 12-09-2021 naammassissapput
Iliuusissat tunngaviusut Ittoqqortoormiini oktobarimi 2021-mi ingerlanneqarnissaat kissaatigineqarpoq. Ilitsersuisussat angalanissamut periarfissarsiorput.
Atuuffiit pillugit ilinniagaqarneq Nuummi pilersaarutigineqarpoq piffissami sap. ak. 42-miit sap. ak. 45-mut – pikkorissartussat 16-it
Suleqatigiinnik aqutsisutut ilinniagaqarneq 2021 – pikkorissartut 5-it – 3-t naammassipput – 2-k suli ingerlapput
Iliuuseqarnermi aqutsisutut illoqarfimmi – pikkorissartut 2-k
Ikuallattoornissamut teknikkimut tunngaviusumik ilinniagaqarneq (BGU) – pikkorissartut 5-t
 
Upalungaarsimaneq – Suliffimmut atatillugu DK-mut angalaneq piffissami 23/08 – 02/09
Suliniut Nordplus:
Suliffimmut atatillugu annaassiniartartuni aqutseqatigiit DK-mi angalanerannut atatillugu KBH-imi workshoppertitsisoqarpoq. Suliniummi NordPlusimi illoqarfinni mikinerusuni nunaqarfinnilu ikiuigasuarnissamut upalungaarsimanerup pitsaanerulersinneqarnissaa siunertarineqarpoq, tassungalu atatillugu Københavns Professionshøjskole-mit sulinermut qaaqquneqarpugut. Isumaqatigiissutigineqarpoq Tasiilami ajunaarnersuaqarnissamut sungiusartoqassaaq piffissami oktobarip 03-niit 05-ianut. Politiit, Peqqinnissaqarfik, Mittarfeqarfiit, Polaroil, Hjørdis, Justus allallu sungiusarnermi peqataarusunnersut attavigineqassapput. Sungiusarneq Københavns Professionshøjskole-mit isumagineqassaaq.
 
Qallunaat Nunaanni Upalungaarsimasut:
Qallunaat Nunaanni Upalungaarsimasut ataatsimeeqatigineqarput. Taakku kissaatigivaat (politikkikkut oqariartuut) nunani avannarlerni suleqatigiinnerup nukittunerulernissaa, tassunga atatillugu aningaasaliissutit. Ataatsimiinnermi oqaluuserisassaniippoq tamatumani qanoq suleqatigiittoqarsinnaanersoq. Taakkunani nammineq piumassutsimik sulisoqalernissaa kissaatigineqarpoq, hjemmeværnet-mut imaluunniit civilforsvaret-nut assingusumik. Utertitsissutigivarput Issittumi Sakkutooqarfiup suliniutaanut assingusoq innersuussutigalugulu assigiinnik ataatsikkut ingerlatsisoqannginnissaa. Danske Beredskaber-nut siunnersuutigivarput soorlu illuaqqani ikuallattoornissamut upalungaarsimaneq imaluunniit imaani isumannaallisaaneq pillugu kampagne/ilinniartitsineq. Illuaraatileqatigiinni umiatsiaaraatileqatigiinniluunniit ataqatigiissarneqarsinnaavoq.
 
Midtjysk Beredskab:
Midtjysk beredskab pulaarneqarpoq, annaassiniarnermik upalungaarsimasunit nammineq piumassutsimik, ullup ilaannaani ullorlu tamaat sulisartut qanoq aaqqiivigineqarnersut takunissaa siunertaralugu. Taanna siunissami Nuummi atorneqarsinnaanera pillugu isumassarsiorfiuvoq, Nuup nunaminertatigut annertusiartornera inuttoqqussutsikkullu amerliartuinnarnera politikkikkut oqaluuserisassaniippoq.
 
Svendborg maritim skole (Svendborgimi imarsiornermik ilinniarfik):
Svendbord Maritimskole (imarsiornermik ilinniarfik) pulaarneqarpoq, siunissami Nuummi umiarsuarni ikuallattoornissamik pinaveersaartitsinermik, Kalaallit Nunaanni Imarsiornermik Ilinniarfimmit aamma Sermersooq Qatserisartut-nit, pikkorissartitsinissap siunersiorneqarnissaa suleqatigiissinnaanerlu siunertaralugit. Kalaallit Nunaanni Imarsiornermik Ilinniarfiup Paamiuni neqeroorutigivaa, kommunimullu saaffiginnissimapput pikkorissarnerup Nuummi ingerlanneqarnissaanut ikioqqullutik, tunngavilersuutigineqarpoq suliassaqarfiup pikkorissarneq allami Paamiut pinnagu Kalaallit Nunaata avataani pinissaa toqqarmagu Nuummi Sisimiuniluunniit sulisut nikerartarnerat pissutigalugu.
 
Østjyllands Beredskab (Østjyllandimi upalungaarsimasut):
Østjyllands beredskab pulaarneqarpoq tassani Lystrupimi qatserisartoqarfissaq misissuataarneqarpoq. Pulaarneq qatserisartoqarfiup mikinerusup aaqqissuunnissaanut isumassarsiornermik siunersioqatigiinnissamillu siunertaqarpoq. Isumassarsiortoqarpoq Tasiilami Paamiunilu siunissami qatserisartoqarfiliortoqarnissaa eqqarsaatigalugu. Qatserisartoqarfiup ingerlasup nuunneqarnerata pilersaarusiorneranut naammassineqarneranullu, ulluinnarni ingerlatsinermik annerusumik kalluinngitsumik, misilittakkanik saqqummiivigeqatigiittarnissaq aamma isumaqatigiissutigineqarpoq. Taamatut iliortoqarpoq Nuummi nuunnissaq eqqarsaatigalugu, tassani nuunneq ingerlatsinermut minnerpaamik sunniuteqassaaq.
Qarasaasiamut aqutsissutip C3-p atorneqarnera pillugu isumasioqatigiinneq, nukissanik paasinninnissamut, ulluinnarni suliassanut, illup iluani aamma nunap immikkoortuini taakkulu iluminni attaveqaqatigiinnermut/paasissutissiinermut tunngatillugu.