Tapiissuteqartarfik Sermeq kommunimi kulturimut tunngasunut suliniutinut aammaarluni aningaasanik tapiissuteqassaaq. Kulturimut tunngassutilinnik suliaqartartut, peqatigiiffiit inuillu eqimattat ataasiakkaallu 1. marsi tikillugu tapiissutinik qinnuteqarsinnaapput – qanoq iliornissat pillugu paasissutissat sukumiinerusut atuarsinnaavatit.
Sapinngisamik kulturikkut pisuussutit siuarsarnissaat Kommuneqarfik Sermersuup kissaatigaa, tamannalu pillugu Tapiissuteqartarfik Sermeq pilersinneqarpoq. Tapiissuteqartarfimmit suliniutit assigiinngitsut piviusunngortinnissaanut tapiissuteqartoqartarpoq, tapiiffigineqarnissamillu kissaateqaruit/ssi qinnuteqaatersi kingusinnerpaamik 1. marsi nassiutereersimassavarsi, tassa suliniut ukioq manna qinnuteqartunut akuunissaa kissatigineqarpat.
”Kommunitsinni suliniutit kulturimut tunngassutillit piviusunngortinneqartussat suussanersut takunissai qilanaaraarput. Qinnuteqartut suliniutaat eqqarsaatigalugit kulturimut tunngassutillit suliniutit innuttaasunut ulluinnarni eqqumiitsulianik kulturimullu tunngassutilinnik takoriaannaasaannik aqqutissiuisut ilaatigut pingaartinneqassapput. Kommuneqarfik Sermersuumi sumiiffinni tamanit qinnuteqaatit tiguneqarsinnaapput, taakkulu Kulturitta siuarsarneqarnissaa pillugu Siunnersuisoqatigiinnut saqqummiunneqassapput”, suliniummut aqutsisoq Jula Maegaard-Hoffmann oqarpoq.
Angumerinngikkussiuk ukiamut aappassaaneerluni qinnuteqartitsineq ingerlanneqassaaq. Tassunga qinnuteqarfissaq 1. oktobarimut killeqarpoq.