Innuttaasunut

Angerlarsimaffimmi Ikiorteqarfik ima sulisunik ilinniarsimasunik amerlanernik pissarsivoq napparsimanerlu pillugu sulinngitsoortarnerit ima ikilisinneqarput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Suliat pingaarnerit sammineqarneri, ataatsimut naleqartitaqarneq sulisullu oqaloqatigineqartarnerat angerlarsimaffimmi ikiorteqarnermi assigiinngitsutigut kivitsisuusimapput. Ilaatigut Nuummi sulisut ilinniarsimasut amerlassusaat 40 procentiniit 80 procentinut amerleriaateqarput, napparsimanerlu pillugu sulinngitsoortarnerit affaannanngortinneqarlutik.

Nuummi Angerlarsimaffimmi Ikiorteqarfiup ilorraap tungaanut saatinnissaanut suliaq sivisusimavoq ilungersunarlunilu. Annertuumik sulineq imminut akilingaatsiarsimavoq, tamannalu pillugu misilittakkat taakku pitsaasut Ittoqqortoormiini, Paamiuni, Tasiilami kommunimi nunaqarfinnilu ingerlateqqinneqassapput.

Sulisut angerlarsimaffimmilu ikiorteqartartut akornanni naammagisimaarinerup annertusarnissaanut suliaq sivisuumik ingerlanneqarsimavoq, inernerilli takutippaat iluatsilluarsimasoq.

Angerlarsimaffimmi ikiortit ilinniarsimasut assut amerleriaateqarsimapput. Siullermik ilinniarsimasut 40 procentiupput ilinniarsimanngitsullu 60 procentiullutik, maanna oqimaaqatigiilersimapput ilinniarsimasut 80 procentiulerlutik ilinniarsimanngitsullu 20 procentinngorlutik.

Saniatigut Nuummi Angerlarsimaffimmi Ikiorteqarfimmi sulisut akornanni napparsimaneq pissutigalugu sulinngitsoortarnerat takkutinngitsoortarnerillu annertuumik ikilisinneqarsimapput. Ukiup ataatsip ingerlanerani napparsimaneq pissutigalugu sulinngitsoortarnerit affaannanngortinneqarput, takkutinngitsoortarnerillu taamaallaat tallimararterutaannanngorsimallutik. Piffissami januaarimiit juulimut kisitsisit sanilliutissagaanni ima isikkoqarput:

2019

Ullut napparsimaffiit:         443

Takkutinngitsut:                  94

2020

Ullut napparsimaffiit:         224

Takkutinngitsut:                  21

Ataatsimut naleqartitsineq / Suliat pingaarnerit pingaartinneqarneri

Piffissap taama sivikitsigisup iluani taama annertutigisumik ilorraap tungaanut saatinneqarnera pillugu apererusunnarpoq, qanoruna iliorsimasut? Akissut tassaavoq, ilungersorluni ingerlaannavillunilu sulineq. Sivisuumik ilungersorluni, tassanngaannartumillu aaqqiiniapallannanni. Aqutsisut assigiinngitsut peqataapput, sulisullu allannguutit assigiinngitsut aqqusaarsimavaat. Assersuutigalugu naleqartitat arlallit aalajangiunneqarput, tamannalu sulisut suliffimminni naammagisimaarinerannut pitsanngorsaataasimavoq.

Tamatuma saniatigut angerlarsimaffimmi ikiorteqarfimmi suliat pingaarnerit annertuumik sammineqarsimapput. Sulineq ajornannginnerulersinneqarpoq, taamalu ullup aallartinnerani paaqqutarinninnermik suliassat piffissaqarfigineqarnerulerlutik, uppernarsaatillu kingorna suliarineqartarlutik.