Kommuneqarfik Sermersooq aamma CSR Greenland inuiaqatigiinnut tunngasutigut akisussaaqataanissaq pillugu suleqatigiilerput

Kommuneqarfik Sermersuup CSR Greenlandillu suleqatigiinnissamik isumaqatigiissuteqarnerisigut suliffeqarfiit mikisut anngajaallu inuiaqatigiinnut tunngasutigut akisussaaqataaneq pillugu aaqqisuulluagaanerusumik sulisarnissaat tunngavilerneqarpoq.Inuiaqatigiinnut tunngasutigut akisussaaqataaneq aamma CSR-mik (Corporate Social Responsibility) taagorneqartarpoq.

Tallimanngornermi juunip ulluisa 26-anni nal. 13.00 kommunalbestyrelsip ataatsimiittarfiani nalliuttorsiualaartitsisoqarnerani Kommuneqarfik Sermersuup CSR Greenlandilu suleqatigiinnissamik isumaqatigiissut atsiussavaat.

”Inuiaqatigiinnut tunngasutigut akisussaaqataaneq pingaaruteqartorujussuuvoq aamma pisortat inuinnaallu ikiuuttarnissaat pingaaruteqaqaaq. Taamaattumik CSR Greenland matuminnga isumaqatigiissusioqatigisinnaagakku nuannaarutigaara, tamannami suleqatigiinnerup nukittorsarneqarneranik kinguneqassaaq. Tamanna inuiaqatigiinnut tunngasutigut akisussaaqataanermik kivitseqatigiinnissamut periarfissatut Kommuneqarfik Sermersuup tungaaniit isigaara, tamatumunngalugu ilutigitillugu aamma suliffeqarfiit mikisut anngajaallu taamaaliornissaannut ikiussavavut”, borgmesteri Charlotte Davidsen oqarpoq.   

Kommuneqarfik Sermersuup suleqatigiinnissamik isumaqatigiissut CSR Greenlandilu atsiorpaat suliffeqarfiit mikisut anngajaallu inuiaqatigiinnut tunngasutigut akisussaaqataanerulernissaannut ikiorniarlugit. Tamatumunnga ilutigitillugu kommunip nammineq aamma inuiatigiinnut tunngasutigut akisussaaqataanerulernissani sulissutigissavaa, inuinnaat pisortallu taamaaliornissaq pikkoriffiginerulerniassammassuk. Suliniutit FN-ip piujuartitsisumik ineriartortitsineq, ilinniagaqarneq piginnaasanillu siuarsaaneq kiisalu avatangiisit pillugit nunarsuaq tamakkerlugu anguniagaanut tunngasut illuatungeriit suleqatigiissutigissavaat.

Aamma Kommuneqarfik Sermersooq EarthCheck suleqatigalugu tamatumunnga assingusumik suliniuteqarpoq, tassa Nuuk EarthCheck-imit akuerisatut ornitassat piujuartitsinermik pingaartitaqartut ilaannut ilanngutsinneqassasoq, piujuartitsineq tunngavigalugu takornariaqarneq suleqatigiissutigineqarluni. CSR Greenland tamatumani suleqatissaqqilluinnarpoq, kattuffiummi ilaatigut aaqqissuuttarpaa Saligaatsoq – ulloq ataaseq atorlugu saliineq, ukioq manna juunip ulluisa aqqaneq-aappaani ingerlanneqartoq.